ەۋروپا قانداي ەلدەردىڭ ازاماتتارىنا باسپانا بەرۋدەن باس تارتتى

استانا. KAZINFORM - ەۋروكوميسسيا بريۋسسەلدە قاۋىپسىز دەپ تانىلعان جانە ميگرانتتاردى قايتا قايتارۋعا بولاتىن ەلدەردىڭ ءتىزىمىن جاريالادى، دەپ حابارلادى Kazinform اگەنتتىگى.

بۇل تىزىمگە كوسوۆو، بانگلادەش، ءۇندىستان، كولۋمبيا، مىسىر، ماروككو جانە تۋنيس كىرەدى.

اتالعان ءتىزىمدى دايىنداۋ - كەلەسى جىلى جازدا كۇشىنە ەنۋى ءتيىس جاڭا «ميگراتسيا جانە باسپانا تۋرالى پاكتىنى» جۇزەگە اسىرۋدى جەدەلدەتۋ باعىتىنداعى قادامداردىڭ ءبىرى. الدا بۇل قۇجاتتى ەۋروپارلامەنت پەن ەۋروكەڭەس ماقۇلداۋى قاجەت. ەگەر ولار كەلىسىم بەرسە، ە و ەلدەرى وسى تىزىمدەگى قاۋىپسىز مەملەكەتتەردەن كەلگەن باسپانا سۇراۋشىلاردىڭ وتىنىشتەرىن جەدەلدەتىلگەن تارتىپتە قاراستىرا الادى.

بۇل ادامداردىڭ ەۋرووداقتا قالۋ مۇمكىندىگى ايتارلىقتاي تومەن بولادى. ەۋروكوميسسيانىڭ باسپا ءسوز حاتشىسى ماركۋس لاممەرت بۇل ءتىزىمنىڭ «قوزعالمالى» ەكەنىن اتاپ ءوتتى.

- بۇل ءتىزىم ۋاقىت وتە كەلە كەڭەيتىلۋى نەمەسە قايتا قارالۋى مۇمكىن. ەگەر قانداي دا ءبىر ەل قاۋىپسىز ەل رەتىندە قاراستىرۋ تالاپتارىنا سايكەس كەلمەي قالسا، ول تىزىمنەن الىنىپ تاستالۋى ىقتيمال، - دەدى ول.

اتالعان جەتى مەملەكەت بۇعان دەيىن قاۋىپسىز دەپ تانىلعان ەلدەر قاتارىنا قوسىلدى. بۇل ساناتقا اۆتوماتتى تۇردە ە و- عا مۇشە بولۋعا ۇمىتكەر ەلدەر (سوعىس ءجۇرىپ جاتقان ۋكراينادان باسقا) دە كىرەدى.

بريۋسسەل ە و- نىڭ كەيبىر مۇشەلەرى ءوز دەڭگەيىندە مۇنداي تىزىمدەردى الدەقاشان قولدانىپ كەلە جاتقانىن ەسكە سالدى. ەۋروكوميسسيانىڭ پىكىرىنشە، ءبىرىڭعاي ەۋروپالىق ءتىزىم قابىلداۋ ميگراتسيالىق پروتسەستەردى ءتيىمدى باسقارۋعا، وتىنىشتەردى قاراۋ ءتارتىبىن بىرىزدەندىرۋگە جانە ميگرانتتار جۇگىن ءادىل بولۋگە مۇمكىندىك بەرەدى.

كوميسسيا قاۋىپسىز ەلدەردەن كەلگەن وتىنىشتەردى 3 اي ىشىندە قاراستىرۋدى ۇسىنادى، دەگەنمەن ءاربىر جاعداي جەكە تارتىپپەن زەرتتەلۋى كەرەك ەكەنىن باسا ايتادى. الايدا كەيبىر قۇقىق قورعاۋشىلار بۇل تىزىممەن كەلىسپەيدى. ماسەلەن، EuroMed Rights ۇيىمىنىڭ وكىلى سارا پرەستياني مىسىر، تۋنيس جانە تۇركيادا ادام قۇقىقتارىنىڭ جۇيەلى تۇردە بۇزىلىپ، ءادىل سوتقا قولجەتىمدىلىك شەكتەلگەنىن العا تارتادى.

سونىمەن قاتار، جاڭا ەرەجەلەر باس تارتىلعان وتىنىشكە شاعىمدانۋ كەزىندە ەو اۋماعىندا بولۋ قۇقىعىنا دا اسەر ەتۋى مۇمكىن. قازىرگى ءتارتىپ بويىنشا، شاعىم قارالعانشا ادام ەلدە قالا الادى. ەۋروكوميسسيا بۇل ءتارتىپتى وزگەرتىپ، بولاشاقتا تەك ارنايى رۇقساتپەن عانا ەلدە قالۋعا مۇمكىندىك بەرەتىن نۇسقانى قاراستىرۋدا.

ايتا كەتەيىك، بۇعان دەيىن گەرمانيانىڭ جاڭا ۇكىمەتى باسپانا سۇراۋشىلاردىڭ سانىن قىسقارتۋدى جوسپارلاپ وتىرعانى حابارلانعان.

ەسكە سالا كەتەيىك، بۇعان دەيىن ەۋروپارلامەنت كوسوۆوعا قاتىستى قابىلدانعان شارالاردى دەرەۋ الىپ تاستاۋدى تالاپ ەتكەنىن جازعان بولاتىنبىز.