ەۋروپا ەلدەرى ب ۇ ۇ حالىقارالىق سوتىنا قولداۋ ءبىلدىردى
استانا. KAZINFORM - ەۋروپا ەلدەرى ا ق ش اكىمشىلىگىنىڭ حالىقارالىق قىلمىستىق سوتتىڭ (ح ق س) اپەللياتسيالىق پالاتاسىنىڭ ءتورت سۋدياسىنا جاڭا سانكسيالار ەنگىزۋ تۋرالى شەشىمىنە بايلانىستى حالىقارالىق سوتقا قولداۋ ءبىلدىردى.
بۇل پالاتا يزرايل پرەمەر-ءمينيسترى بينيامين نەتانياحۋ مەن بۇرىنعى قورعانىس ءمينيسترى يواۆ گاللانتقا شىعارىلعان قاماۋعا الۋ وردەرلەرى بويىنشا اپەللياتسيالاردى قاراستىرۋدا.
ەۋروپانىڭ كوپتەگەن ەلى ۆاشينگتون اكىمشىلىگىنىڭ سانكسيالىق شەشىمىنە قاتىستى مالىمدەمە جاسادى.
ەۋروپا وداعى (ە و) كوميسسياسىنىڭ ءتورايىمى ۋرسۋلا فون دەر ليايەن X الەۋمەتتىك جەلىسىندە:
- كوميسسيا حالىقارالىق قىلمىستىق سوتتى جانە ونىڭ لاۋازىمدى تۇلعالارىن تولىعىمەن قولدايدى، - دەپ جازدى.
ونىڭ ايتۋىنشا، ح ق س الەمدەگى ەڭ اۋىر قىلمىس جاساعان ادامداردى جاۋاپقا تارتادى. ۋرسۋلا فون دەر ليايەن سوتتىڭ ەشقانداي قىسىمسىز ەركىن جۇمىس ىستەۋى قاجەت ەكەنىن اتاپ ءوتتى.
ساياساتكەر حالىقارالىق ادىلەتتىلىك پەن حالىقارالىق قۇقىقتى قۇرمەتتەۋدى ءاردايىم قولدايتىنىن ايتتى.
نيدەرلاندى
نيدەرلاند سىرتقى ىستەر ءمينيسترى كاسپار ۆەلدكامپ نيدەرلاند حالىقارالىق قىلمىستىق سوتتىڭ لاۋازىمدى تۇلعالارىنا قارسى جاڭا سانكسيالاردى قۇپتامايتىنىن اتاپ ءوتتى. تاۋەلسىز حالىقارالىق سوت ءوز جۇمىسىن ەش كەدەرگىسىز اتقارۋى ءتيىس. ءبىز سوتتى نىق قولدايمىز.
- 125 مۇشە مەملەكەتتىڭ ءبىرى جانە سوتتى قابىلداۋشى ەل رەتىندە ءبىز ونىڭ بارىنشا كەدەرگىسىز جۇمىس ىستەۋىن قامتاماسىز ەتۋگە تولىق بەيىلدىمىز، - دەدى ۆەلدكامپ.
سلوۆەنيا ا ق ش- تىڭ ح ق س سۋديالارىنا سانكسيا سالۋ تۋرالى شەشىمىن قاتاڭ ايىپتادى.
- مەن ا ق ش- تىڭ حالىقارالىق قىلمىستىق سوت سۋديالارىنا، سونىڭ ىشىندە سلوۆەنيالىق سۋديا بەتي حولەرگە سانكسيا سالۋ تۋرالى شەشىمىن قاتاڭ ايىپتايمىن. بۇل وتە الاڭداتارلىق ءارى قابىلداۋعا بولمايتىن قادام، - دەدى سلوۆەنيا پرەزيدەنتى ناتاشا پيرتس مۋسار.
ول ادىلەت پەن زاڭ ۇستەمدىگىنە قىزمەت ەتەتىندەرگە ەشبىر ەل قوقان-لوقى جاساماۋى نەمەسە جازا قولدانباۋى ءتيىس ەكەنىن باسا ايتتى.
مۋسار ح ق س - ادامزاتقا قارسى اسا اۋىر قىلمىستاردى قۋدالاۋ ءۇشىن حالىقارالىق قاۋىمداستىق قۇرعان تاۋەلسىز سوت ورگانى ەكەنىن اتاپ ءوتىپ، بۇل سوتتىڭ سۋديالارىنا كۇمان كەلتىرۋ ەسەپ بەرۋ مەن ادىلەت يدەياسىنا «شابۋىل» دەدى.
پرەزيدەنت سلوۆەنيا ح ق س- تىڭ تاۋەلسىزدىگىن قورعاۋدى جالعاستىراتىنىن مالىمدەدى.
- ا ق ش شەشىمى حالىقارالىق قۇقىقتىڭ كۇيرەۋى ەمەس. كەرىسىنشە، بۇل ونى قورعاۋىمىز قاجەتتىگىن كۇشەيتەدى، ويتكەنى حالىقارالىق قۇقىقتى قۇرمەتتەۋ - سلوۆەنيا سىرتقى ساياساتىنىڭ وزەگى. سلوۆەنيا ا ق ش ۇكىمەتىنىڭ ح ق س- تىڭ ءتورت سۋدياسىنا، سونىڭ ىشىندە سلوۆەنيالىق سۋدياعا قاتىستى جاريالاعان سانكسيالارىنا وكىنىش بىلدىرەدى، - دەلىنگەن سلوۆەنيا سىرتقى ىستەر مينيسترلىگىنىڭ مالىمدەمەسىندە.
- سلوۆەنيا سوت مەكەمەلەرىنە قىسىم مەن سوت جۇمىسىنا ارالاسۋدى قابىلدامايدى، ال سوتتار زاڭ مەن ادىلەت مۇددەسىندە ارەكەت ەتۋى ءتيىس. ءبىز قازىرگى ۋاقىتتا ازاماتىمىز بولاتىن سۋديانىڭ ءوز مىندەتتەرىن اتقارۋىن قولدايمىز. ە و- عا مۇشە ەلدىڭ ءبىر ازاماتى سانكسيالىق تىزىمگە ەنگەنىنە بايلانىستى سلوۆەنيا سانكسيالارعا جول بەرمەيتىن زاڭناما قابىلداۋدى دەرەۋ ۇسىنادى».
اۋستريا
اۋستريا سىرتقى ىستەر مينيسترلىگى X الەۋمەتتىك جەلىسىندە جاريالاعان مالىمدەمەسىندە، ا ق ش- تىڭ ح ق س- تىڭ ءتورت سۋدياسىنا سانكسيا سالۋ شەشىمى تەرەڭ وكىنىش تۋدىراتىنىن جەتكىزدى.
- حالىقارالىق قىلمىستار ءۇشىن جازاسىزدىقتى بولدىرماۋ باعىتىندا جۇمىس ىستەيتىن حالىقارالىق قىلمىستىق سوتتىڭ قىزمەتىنە كەدەرگى كەلتىرىلمەۋى ءتيىس، - دەلىنگەن مالىمدەمەدە.
فينليانديا
فينليانديا سىرتقى ىستەر مينيسترلىگىنىڭ مالىمدەمەسىندە، ا ق ش- تىڭ سانكسيا تۋرالى شەشىمى ۇلكەن الاڭداۋشىلىق تۋدىراتىنى ايتىلدى.
حەلسينكيدە ح ق س ءوز ميسسياسىن قورىقپاي ورىنداۋى ءتيىس ەكەنى جانە سوت جۇيەسى مەن ايىپتاۋدىڭ تاۋەلسىزدىگى ماڭىزدى ەكەنى اتاپ ءوتىلدى.
ا ق ش مەملەكەتتىك حاتشىسى ماركو رۋبيو ح ق س- تىڭ ءتورت سۋدياسى ا ق ش پەن يزرايلدىڭ ەگەمەندىگىن بۇزدى دەگەن جەلەۋمەن سانكسيالىق تىزىمگە ەنگىزىلگەنىن حابارلادى.
اۆتور
نازىم بولەسوۆا