ەۋروپا باسشىلارى پۋتيننىڭ كەلىسسوزدەر تۋرالى ۇسىنىسىنا قالاي جاۋاپ بەردى

استانا. KAZINFORM - جەكسەنبى كۇنى ۋكراينامەن وداقتاس ەۋروپالىق ەلدەر دەرلىك بىردەي مالىمدەمە جاساپ، ءبىتىم تالاپتارىن ۇستاناتىندارىن اتاپ ءوتتى، دەپ حابارلايدى BBC.

فرانسيا پرەزيدەنتى ەممانۋەل ماكرون رەسەي پرەزيدەنتىنىڭ ۇسىنىسىن «العاشقى قادام، ءبىراق جەتكىلىكسىز» دەپ اتادى.

- ءبىتىم جايلى كەلىسسوزدەرگە دەيىن ءسوزسىز اتىستى توقتاتۋ بولمايدى. پۋتين جول ىزدەپ وتىر، ءبىراق ۋاقىت ۇتقىسى كەلەدى، - دەدى ماكرون كيەۆتەن قايتىپ كەلە جاتىپ، پشەمىسل قالاسىندا جۋرناليستەرگە.

جەكسەنبى كۇنى تاڭەرتەڭ ماكرون ءوزىنىڭ  جەلىسىندەگى جازباسىندا كەلىسسوزدەر ۇرىسپەن قاتار جۇرە المايتىنىن ايتتى.

- كيەۆتە جانە پرەزيدەنت ترامپپەن بىرگە ءبىز ناقتى ۇسىنىس جاسادىق: دۇيسەنبىدەن باستاپ ەشقانداي شارتسىز 30 كۇندىك ءبىتىم. پرەزيدەنت زەلەنسكي بۇعان كەلىستى جانە ەشقانداي تالاپ قويعان جوق. قازىر ءبىز رەسەيدەن ءدال سونداي ايقىن جاۋاپ كۇتەمىز. زەڭبىرەكتەر اتىلىپ جاتقاندا كەلىسسوز بولمايدى. ازاماتتىق حالىققا بومبا ءتۇسىپ جاتقاندا كەلىسسوز مۇمكىن ەمەس. كەلىسسوز باستالۋى ءۇشىن ءبىتىم قازىر كەرەك، - دەپ جازدى ماكرون.

ماكرون سياقتى، گەرمانيا كانسلەرى فريدريح مەرتس تە پۋتيننىڭ سوزدەرىن «جاقسى بەلگى» دەپ اتادى، ءبىراق بۇل «قاجەتتى دەڭگەيدەن تىم الىس» ەكەنىن اتاپ ءوتتى.

- ءبىز ماسكەۋدىڭ ناقتى كەلىسسوز جۇرگىزۋگە مۇمكىندىك بەرەتىن بىتىمگە كەلىسكەنىن كۇتەمىز. الدىمەن قارۋ تىنۋى كەرەك، سودان كەيىن عانا پىكىرتالاس باستالۋى مۇمكىن، - دەلىنگەن مەرتستىڭ AFP اگەنتتىگى كەلتىرگەن مالىمدەمەسىندە.

پولشا پرەمەر-ءمينيسترى دونالد تۋسك الەم ەشقانداي شارتسىز، دەرەۋ ءبىتىمدى كۇتىپ وتىرعانىن ايتتى.

- ءبىزدىڭ ۇندەۋگە جاۋاپ رەتىندە رەسەيلىكتەر 15-مامىردان باستاپ بەيبىت كەلىسسوزدەردى ۇسىندى. ءبىراق الەم ەشقانداي شارتسىز، دەرەۋ ءبىتىمدى كۇتىپ وتىر. ۋكراينا دايىن. قۇرباندار جەتكىلىكتى، - دەپ جازدى  جەلىسىندە.

ا ق ش پرەزيدەنتى دونالد ترامپ پۋتيننىڭ باستاماسىنا تىكەلەي پىكىر بىلدىرگەن جوق، ءبىراق سەنبى كۇنگى وقيعالاردى «رەسەي مەن ۋكراينا ءۇشىن ءۇمىت سىيلاعان كۇن» دەپ اتادى.

- بۇل اياقتالماي كەلە جاتقان «قاندى قىرعىن» توقتاعان سوڭ، ۇمىتتەنەمىز، ءجۇز مىڭداعان ادامنىڭ ءومىرى ساقتالادى. بۇل - بۇرىنعىدان دا جاقسى جاڭا الەم بولادى. مەن وسىعان قول جەتكىزۋ ءۇشىن ەكى تاراپپەن دە جۇمىس ىستەۋدى جالعاستىرامىن، - دەپ جازدى ول.

الايدا ترامپتىڭ Truth Social جەلىسىندەگى جازباسىنان ونىڭ نەگە ۇمىتتەنىپ وتىرعانىن ناقتى ءتۇسىنۋ قيىن: ۋكراينا وداقتاستارىنىڭ 30 كۇندىك ءبىتىم تۋرالى ورتاق تالابىنا ما، الدە اتىستى توقتاتۋدان باس تارتقانىنا قاراماستان پۋتيننىڭ تىكەلەي كەلىسسوزگە شاقىرۋىنا ما.