ەۋروپا گازدىڭ 18 پايىزىن ءالى دە رەسەيدەن الىپ وتىر
استانا. KAZINFORM - «ە و ەنەرگەتيكالىق وداعىنىڭ جاعدايى» جىل سايىنعى بايانداماسى ەۋروپانىڭ ءالى دە رەسەيگە ارقا سۇيەيتىنىن جانە ە و اتقارۋشى بيلىگى قازبا وتىنىنان باس تارتۋدىڭ باياۋ قارقىنىنا الاڭدايتىنىن كورسەتىپ وتىر، دەپ حابارلايدى Euronews.
2022 -جىلدان بەرى جەتكىزىلىمدەردىڭ ايتارلىقتاي قىسقارعانىنا قاراماستان ە و ءوز گازىنىڭ بەستەن ءبىر بولىگىنە جۋىعى رەسەيگە تاۋەلدى بولىپ قالا بەرەدى، ال ە و- نىڭ ەنەرگەتيكا جونىندەگى كوميسسارى كادري سيمسون بلوكتىڭ ونى ۇنەمى كەڭەيتىلىپ وتىراتىن سانكسيا رەجيمىنە قوسۋعا دايىن با دەگەن سۇراققا جاۋاپ بەرۋدەن باس تارتتى.
«ءبىز ەۋروپانىڭ ەنەرگەتيكالىق قاۋىپسىزدىگىنە نۇقسان كەلتىرمەي، اقىرىنداپ رەسەيلىك گازدان كەزەڭ- كەزەڭىمەن باس تارتۋعا تولىق دايىنبىز»، - دەدى سيمسون بريۋسسەلدە تىلشىلەرگە ە و ەنەرگەتيكا وداعىنىڭ جىل سايىنعى جاعدايى تۋرالى بايانداماسىن جاريالاۋ كەزىندە.
باياندامادا رەسەيلىك گازدى تۇتىنۋ 150 ميلليارد تەكشە مەتردەن نەمەسە 2022-جىلعا دەيىنگى بارلىق يمپورتتىڭ 45 پايىزىنان ايتارلىقتاي تومەندەگەنىمەن، تامىز ايىنا دەيىنگى سەگىز اي ىشىندە ە و بۇرىنعىداي يمپورتتىڭ 18 پايىزىن رەسەيدەن العانىن مويىندايدى.
بۇل رەسەي ءالى دە ەۋروپانىڭ نورۆەگيادان كەيىنگى ەكىنشى ءىرى جەتكىزۋشىسى ەكەنىن بىلدىرەدى.
ەۋروكوميسسيا رەسەيدىڭ تابيعي گاز يمپورتىنا سانكسيا سالۋدى جوسپارلاپ وتىر ما دەگەن سۇراققا سيمسون رەسەي قازىردىڭ وزىندە قولدا بار بارلىق تەتىكتەرىن جوعالتقانىن ايتتى.
«كەيبىر كومپانيالاردىڭ رەسەيدەن ءالى دە الىپ جاتقان كولەمى ولاردىڭ ءبىزدى بۇدان بىلاي بوپسالاۋىن مۇمكىن ەمەس ەتەدى - بالاما نۇسقالار بار»، - دەدى سيمسون.
ول ەۋروپاداعى گاز قويمالارىنىڭ قىس باستالماي تۇرىپ تولىپ كەتكەنىن اتاپ ءوتتى.
اۆتور
زارينا تۋعانبايەۆا