مامانداردىڭ ايتۋىنشا، كادىمگى سوقىرتىشقان (Ellobius talpinus) — ەۋرازيانىڭ دالالىق جانە ورماندى- دالا ايماقتارىن مەكەندەيتىن ۇساق كەمىرگىش. ول نەگىزىنەن جەر استىندا تىرشىلىك ەتىپ، توپىراقتا كۇردەلى ىندەر جۇيەسىن قازادى.
سوقىرتىشقاننىڭ ەرەكشەلىگى - ءومىرىنىڭ باسىم بولىگىن جەر استىندا وتكىزۋى. ءىن قازۋ ارقىلى توپىراقتى قوپسىتىپ، اۋا الماسۋىنا ىقپال ەتەدى. سونداي-اق توپىراق بولشەكتەرىن قوزعاپ، جەر بەدەرىنىڭ شاعىن پىشىندەرىنىڭ قالىپتاسۋىنا اسەر ەتۋى مۇمكىن.
- بۇل كەمىرگىش وسىمدىكتەردىڭ جەر استىنداعى بولىكتەرىمەن، سونىڭ ىشىندە تامىرلارىمەن، پيازشىقتارىمەن جانە تۇينەكتەرىمەن قورەكتەنەدى. سوندىقتان ونىڭ تىرشىلىگى جەكەلەگەن اۋماقتارداعى وسىمدىك جامىلعىسىنىڭ قۇرامىنا دا ىقپال ەتۋى ىقتيمال، - دەپ حابارلادى رەزەرۆاتتان.
بۇعان قوسا اتالعان جاندىك كەيبىر جىرتقىش سۇتقورەكتىلەر مەن قۇستارعا قورەك بولادى. وسى ارقىلى تابيعي قورەكتىك تىزبەكتىڭ ساقتالۋىنا قاتىسادى.
وسىلايشا، سىرت كوزگە بايقالا بەرمەيتىن سوقىرتىشقاننىڭ تىرشىلىگى ەرتىس ورمانى رەزەرۆاتىنداعى تابيعي تەپە-تەڭدىكپەن تىعىز بايلانىستى. ونى زەرتتەۋ توپىراق پەن وسىمدىك جامىلعىسىنىڭ ءوزارا بايلانىسىن جانە ەكوجۇيەدەگى تابيعي ۇدەرىستەردى تەرەڭىرەك تۇسىنۋگە مۇمكىندىك بەرەدى.
بۇعان دەيىن ەرتىس ورمانىندا بۇلان كوبەيە تۇسكەنىن، جانۋارلاردىڭ ەكوجۇيەگە تيگىزەتىن پايداسى تۋرالى جازعانبىز.