ەرتىس جاعاسىنداعى ەلدى مەكەندەر ءۇشىن قاۋىپتى كەزەڭ 20-ساۋىردە باستالۋى مۇمكىن - ينسپەكسيا

پاۆلودار. KAZINFORM - شىعىس قازاقستانداعى بۇقتىرما مەن ءشۇلبى سۋ قويمالارىنان ەرتىسكە جالپى كولەمى 6,5 تەكشە كيلومەتر سۋ جىبەرىلەدى. بۇل - وتكەن جىلمەن سالىستىرعاندا 1,5 ەسە كوپ.

سۋ رەسۋرستارى كوميتەتىنىڭ سۋ رەسۋرستارىن پايدالانۋ جانە قورعاۋ جونىندەگى «ەرتىس» باسسەيندىك ينسپەكسياسى باسشىسىنىڭ ورىنباسارى ەلەۋسىز قامباروۆ Kazinform اگەنتتىگىنىڭ تىلشىسىنە بەرگەن سۇحباتىندا شىعىس قازاقستانداعى قويمالار قازىر سۋ جىبەرۋدىڭ نەگىزگى يادروسىنا كىرىسكەنىن حابارلادى.

ياعني 13-ساۋىردەن بەرى وزەنگە سەكۋندىنا 3500 تەكشە مەتر سۋ قۇيىلىپ جاتىر. بۇل قۇبىلىس 24-ساۋىرگە دەيىن جالعاسادى.

ونىڭ سوزىنشە، سۋدىڭ العاشقى لەگى پاۆلودار وبلىسىنا 20-ساۋىردە كەلىپ جەتەدى دەپ كۇتىلىپ وتىر.

وزەننىڭ ويپاڭ تۇستارىندا ورنالاسقان ەلدى مەكەندەر ءۇشىن سول ۋاقىتتا قاۋىپتى جاعداي تۋىنداۋى مۇمكىن.

- قازگيدرومەت مەكەمەسىنىڭ گيدروبەكەتتەرى بەرىپ وتىرعان مالىمەتكە سۇيەنسەك، ەرتىستىڭ سۋى ازىرشە كوپ كوتەرىلە قويعان جوق. مىسال ءۇشىن پاۆلودار قالاسىنداعى زاتون بەكەتىندە سۋ دەڭگەيى 592 سانتيمەتردى (قاۋىپتى دەڭگەي - 800 س م) جانە اۆتوموبيل كوپىرى ماڭىندا ول 479 سانتيمەتردى (1084) كورسەتىپ وتىر. وزەننىڭ تومەنگى اعىسىنداعى گيدروبەكەتتەردىڭ كەيبىرى سۋ دەڭگەيى ءتىپتى تومەندەپ كەتكەنىن تىركەدى. ياعني ەرتىستە سۋ دەڭگەيى ازىرشە قالىپتى. 20-ساۋىردەن باستاپ ەرتىس وزەنى ارقىلى ۇلكەن تولقىندار كەلەدى. سول ۋاقىتتا سۋ دەڭگەيى كۇرت كوتەرىلەدى دەپ كۇتىلىپ وتىر. جىبەرىلەتىن سۋ ەڭ اۋەلى جايىلمالاردىڭ سۋعا قانىعۋى ءۇشىن جاسالىپ وتىرعان شارا ەكەنىن ەسكەرۋ كەرەك. سۋ مول ەكپىنمەن كەلسە، جايىلمالارعا مول سۋ شىعادى. شامامەن 300 مىڭ گەكتاردان استام اۋماقتى سۋ باسۋى كەرەك. ەكىنشى ماسەلە، وزەننىڭ ويپاڭ تۇستارىندا ورنالاسقان ەلدى مەكەندەرگە تاسقىن سۋدىڭ كىرۋ ىقتيمالدىلىعى. ءبىزدىڭ شامالاۋىمىزشا، ماي اۋدانىنىڭ قاراتارەك، كوكتوبە، اقساراي اۋىلدارىنا، پاۆلودار قالاسىنىڭ كەنجەكول، اتامەكەن كەنتتەرىنىڭ تومەنگى اۋماقتارىندا، پاۆلودار اۋدانىنىڭ ميچۋرين اۋىلىندا سۋدىڭ جايىلۋى بولۋى مۇمكىن. جەرگىلىكتى بيلىك جاقسى قامدانسا، تۇرعىن ۇيلەرگە ءتونىپ تۇرعان سونشالىقتى قاۋىپ جوق، - دەيدى ە. قامباروۆ.

ەسكە سالا كەتەيىك، وتكەن اپتادان ەرتىس وزەنىنە شىعىس قازاقستانداعى قويمالاردان سۋ جىبەرىلە باستادى.

پاۆلودار وبلىسى سۋ تاسقىنىنىڭ ەكىنشى كەزەڭىنە دايىندالىپ جاتىر.

ەسكە سالا كەتەيىك، پاۆلوداردا ۇيلەرىن سۋ باسقان وتباسىلارعا جاڭا باسپانا تۇرعىزىلۋدا.

اۆتور
مۇرات اياعان