ايتۋىنشا، بۇل پرەزيدەنتتىڭ «زاڭ مەن ءتارتىپ» قاعيداتىن بەرىك ۇستاناتىنىن بىلدىرەدى.
- پرەزيدەنت قاسىم-جومارت توقايەۆ «زاڭ مەن ءتارتىپ» دەگەن قاعيداتتى بەرىك ۇستانا باستادى. بۇگىن سامۇرىق پەن ق ت ج سەكىلدى الپاۋىت كومپانيا باسشىلارىنىڭ قۇرىققا ءىلىنۋى - سونىڭ ايقىن دالەلى. بۇرىن تەك شاباقتار مەن شورتاندار قارماققا ىلىنسە، بۇگىن ەكى بىردەي اكۋلا اۋعا ءتۇستى. اق-قاراسىن تەرگەپ-تەكسەرۋشىلەر انىقتاي جاتار. ءبىزدى وسىنداي قارجىلىق مەكەمە باسشىلارىنىڭ كوزسىز ارەكەتى ويلاندىرادى، - دەدى ول.
سونىمەن قاتار جەمقورلىق قىلمىسى مەملەكەتتىڭ ىرگەتاسىن ىرىتەتىنىن اتاپ ءوتتى.
- «سامۇرىق-قازىنا» ۇلتتىق قوردىڭ قارجىسىنا يەلىك ەتەدى. ق ت ج - مەملەكەت ىشىندەگى كىشىگىرىم مەملەكەت ءتارىزدى قۇرىلىم. مۇنداي قادامعا نەلىكتەن باردى؟ كۇنكورىسى تومەن بە؟ ايلىقتان بولەك ءبىر عانا جىلدىق بونۋسى پالەن ءمۇعالىم مەن تۇگەن دارىگەردىڭ جىلدىق تابىسىن بىرنەشە ەسە وراماي ما!؟. تويىمسىزدىق، اشكوزدىك، قاناعاتسىزدىق، جاۋاپسىزدىق، جۇلىمىرلىق پەن جەمقورلىق مەملەكەتتىڭ ىرگەتاسىن ءىرىتىپ، شىرىتەتىنىن بىلە تۇرا، وسىنداي جويقىن جەمقورلىققا نە ءۇشىن بارىپ جاتىر؟ نەگە توقتام جوق؟ پرەزيدەنت ۇستانىمى دۇرىس. زاڭ بۇزدىڭ با، ارىڭمەن دە، بارىڭمەن دە جاۋاپ بەر! تازا قوعام قۇرۋ ءۇشىن تازالانۋ كەرەك-اق. جۇرتقا كەرەگى - جۇيەلى ءتارتىپ، - دەدى نۇرتورە ءجۇسىپ.
ايتا كەتەيىك، «سامۇرىق» قورى مەن وعان ەنشىلەس ق ت ج باسشىسىنىڭ ۇستالعانى تۋرالى حاباردان كەيىن مەملەكەتتىك اكتيۆتەردى باسقارۋشىلاردىڭ جاۋاپكەرشىلىگى تاعى دا تالقىعا ءتۇستى. ساياسات تانۋشىلار بۇل وقيعانى بيلىكتىڭ «زاڭ جانە ءتارتىپ» قاعيداتىن جۇزەگە اسىرۋعا كوشكەنىنىڭ بەلگىسى دەپ سانايدى.