ەرتەڭ تۇركىستاندا 500 وقۋشى «اداي» كۇيىن ورىندايدى

 تۇركىستان. KAZINFORM - بالالاردى قورعاۋ كۇنىنە وراي تۇركىستاندا «باقىتتى بالالىق شاق» مەرەكەلىك ءىس شاراسى وتەدى.

وندا ءار اۋدان، قالا مەكتەپتەرىنەن جينالعان وقۋشىلار ءبىر مەزەتتتە قۇرمانعازىنىڭ «اداي»، «بالبىراۋىن» كۇيلەرىن ورىندايدى. بۇل جايىندا تۇركىستان وبلىسى ءبىلىم باسقارماسى باسشىسىنىڭ ورىنباسارى ايگۇل قاسىمبەكوۆا مالىمدەدى.

مەرەكەلىك شارا بارىسىندا بالالارعا ارنالعان ءتۇرلى قويىلىمدار، كورمەلەر، سپورتتىق ويىندار، كونسەرتتىك باعدارلامالار كوپشىلىك نازارىنا ۇسىنىلادى. ماسەلەن، «قۋىرشاق» تەاترىنىڭ ۇزدىك قويىلىمدارى مەن بالالار جازۋشىلارىنىڭ كىتاپ كورمەسىن تاماشالاۋعا مۇمكىندىك بار. سونداي-اق، بالالار ءۇشىن اكۆاگريم جاسالىپ، تەگىن تاتتىلەر ۇيلەستىرىلەدى.

وقۋشىلاردىڭ قولونەر جۇمىستارىنىڭ جارمەڭكەسى ءوتىپ، شەبەرلىك ساباقتارى ۇيىمداستىرىلادى.

«مەكتەپ وقۋشىلارى مەن كوللەدج ستۋدەنتتەرى اراسىندا شاحمات، توعىزقۇمالاق ويىندارىنان تۋرنير وتكىزۋ، ارمرەستلينگ سپورتىنان الەم چەمپيوندارىمەن شەبەرلىك ساعاتىن ۇيىمداستىرۋ جانە «ارالداعى سيرك» مەرەكەلىك قويىلىمىن كورسەتۋ جوسپارلانىپ وتىر. سونداي- اق، «تۇركىستان بالالار كوزىمەن» كوركەمسۋرەت گالەرەياسى، 500 وقۋشىدان قۇرالعان «Dombyra party» فلەش-موبى، «ايبىن» اسكەري- پاتريوتتىق قوزعالىسى وقۋشىلارىنان قۇرالعان توپ ونەرى كورەرمەن نازارىنا ۇسىنىلادى»- دەدى ايگۇل قاسىمبەكوۆا.

سونىمەن قاتار، سپيكەر بيىل تۇركىستان وبلىسىندا 35 مىڭنان استام بالا الەۋمەتتىك جاعدايىنا بايلانىستى بيۋدجەت ەسەبىنەن جازعى ساۋىقتىرۋ لاگەرلەرىندە دەمالاتىندىعىن جەتكىزدى. ال، بالالاردىڭ جازعى دەمالىسىن ۇيىمداستىرۋدا ارنايى دايىندىقتان وتكەن 14444 پەداگوگ قىزمەت ەتەدى.