ەرتەڭ بازار يەلەرىن بيۋدجەتتەن قولداۋ باعدارلاماسى ىسكە قوسىلادى

استانا. KAZINFORM - ساۋدا جانە ينتەگراتسيا مينيسترلىگى ساۋدا كوميتەتىنىڭ ءتوراعاسى ايدار ادىلبەكوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ەلدىڭ 3 مەگاپوليسىنەن باسقا قالالارداعى بازارلاردى قولداۋدىڭ جاڭا تەتىگى ىسكە قوسىلاتىنىن ايتتى.

« 2024 - جىلدىڭ 1-قازانىنان باستاپ قازاقستان رەسرۋبليكاسى ساۋدا جانە ينتەگراتسيا مينيسترلىگى ساۋدا كوميتەتى تاراپىنان ىشكى ساۋدا سۋبەكتىلەرىن جاڭارتۋ ءۇشىن مەملەكەتتىك قولداۋ شارالارىن كورسەتۋ باستالادى.

مەملەكەتتىك قولداۋ شارالارى 2 ءتۇرلى ءتاسىل ارقىلى كورسەتىلەدى. ءبىرىنشىسى - نەسيە مولشەرلەمەسىن سۋبسيديالاۋ، ەكىنشىسى - نەسيەگە كەپىل بولۋ»، - دەدى كوميتەت ءتوراعاسى.

ونىڭ سوزىنشە، اتالعان مەملەكەتتىك قولداۋ شارالارى 4 ءتۇرلى ماقساتقا باعىتتالعان. ولار:

1. ساۋدا بازارلارىن جاڭعىرۋ ءۇشىن؛

2. ساۋدا وبەكتىلەرىن سالۋ، كەڭەيتۋ، رەكونسترۋكتسيالاۋ ءۇشىن:

3. ءۇي جانىنان دۇكەن سالۋ ءۇشىن

4. وسى سالادا IT باعدارلامالار جاساۋ ءۇشىن.

« بۇل باعدارلاماعا ەلىمىزدەگى 3 مەگاپوليس استانا، الماتى، شىمكەنت قالالارى جانە ەلدەگى ويىن-ساۋىق ورتالىقتارى قاتىسا المايدى. باعدارلامانىڭ شارتى بويىنشا ساۋدا نىساندارىنا قاتىستى جوبالارىن وبلىس ورتالىقتارىندا جۇزەگە اسىراتىن جەكە كاسىپكەرگە بەرىلەتىن ماكسيمالدى سوما - 3 ميلليارد تەڭگە. ال جوبانى مونوقالالاردا نەمەسە اۋىلدىق ەلدى مەكەندەردە جۇزەگە اسىراتىندار ءۇشىن بەرىلەتىن ماكسيمالدى سوما - 1,5 ميلليارد تەڭگە»، - دەدى ايدار ادىلبەكوۆ.

مەملەكەتتىك قولداۋ شارالارى «دامۋ» قورى ارقىلى ىسكە اسادى.

اۆتور

ەسىمجان ناقتىباي