رەسەيلىك تەلەجۋرناليست قازاقستانعا كىرگىزىلمەيدى: مەملەكەت وندايدى كەشىرمەيدى

استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ رەسەيلىك تەلەجۋرناليست تينا كاندەلاكيدىڭ قازاقستاندا ورىس ءتىلىنىڭ قولدانىس اياسى تارىلىپ بارا جاتقانى تۋرالى مالىمدەمەسىنە پىكىر ءبىلدىردى.

«كورشى ەلدەگى ازاماتتار، ءوز دوستارىمىزدىڭ ءبىزدىڭ ەل تۋرالى بەيحابار ەكەنى ادامدى كىشكەنە وكپەلەتەدى. ويتكەنى ولاردىڭ ءبىز تۋرالى اقپاراتى دۇرىس ەمەس. ءبىزدىڭ ەلگە كەلىپ قالاي ءومىر ءسۇرىپ جاتقانىمىزدى ءوز كوزىمەن كورسىن. ويدان شىعارىپ جازا بەرگەنشە، الەۋمەتتىك جەلىدە قىرىلىسقانشا ودان دا ءوزىمىزدىڭ جۇمىسىمىزدى ودان ءارى قاراي جالعاستىرايىق»، - دەدى س ءى م رەسمي وكىلى.

دەگەنمەن، ا. سمادياروۆ اتالمىش جۋرناليستىڭ قازاقستانعا كىرە المايتىنىن ايتتى.

«ءتىزىم دەپ سىزدەر قايتا- قايتا سۇراي بەرەسىزدەر. ناقتى ءبىر، ەكى، ءۇش دەگەن ءتىزىم جوق. ول - جالپى ءار مەملەكەتتىڭ ءوزىنىڭ ىشكى شاراسى. سىزگە بىرەۋ ۇناماسا، ۇيىڭىزگە كىرگىزبەيسىز عوي. تۋرا سول سياقتى ءبىز دە كىرگىزبەيمىز. كەرەك كەزدە شارا قابىلدانادى. ونى ناقتى «بۇگىن كىرگىزدىڭىزدەر مە، ەرتەڭ كىرگىزەسىزدەر مە» دەپ تالاپ ەتپەڭىزدەر. مەملەكەت وندايدى ەشقاشان كەشىرمەيدى. ول قازاقستانعا كەلە قويماس، كەلگەن جاعدايدا كىرمەيدى»، - دەدى ايبەك سمادياروۆ.

ايتا كەتەيىك، بۇعان دەيىن رەسەيلىك تەلەجۋرناليست تينا كاندەلاكي الەۋمەتتىك جەلىدەگى پاراقشاسىندا قازاقستاندا بىرنەشە تەمىرجول ستانساسىنىڭ اتاۋى وزگەرۋىن ورىس ءتىلىنىڭ اياسىن تارىلتۋ دەپ پىكىر بىلدىرگەن بولاتىن.

اۆتور

ەسىمجان ناقتىباي