قازاقستاننىڭ رەسەيدەگى ەلشىلىگى مەملەكەت باسشىسىنىڭ جولداۋىن تالقىلاۋعا ارنالعان دوڭگەلەك ۇستەل ۇيىمداستىردى. جيىندا الەكسەي ۆلاسوۆ پرەزيدەنت سوزىندە الەۋمەتتىك ماسەلەلەرگە ەرەكشە كوڭىل بولىنگەنىن اتاپ ءوتتى. ونىڭ ايتۋىنشا، ۇسىنىلعان شارالار حالىقتىڭ تۇرمىس ساپاسىن جاقسارتۋعا باعىتتالعان.
ساراپشى جولداۋدا قازاقستاننىڭ جاڭا ساياسي كەزەڭگە قادام باسقانى دا ايقىن كورىنەتىنىن ايتتى. بۇعان دەيىن ەلدە شامامەن ءبىر جىلعا سوزىلعان وزگەرىستەر بولدى. وسى كەزەڭدە جاڭا كونستيتۋتسيا قابىلدانىپ، قۇرىلتاي سايلاۋى ءوتتى، مەملەكەتتىك باسقارۋ جۇيەسىندە قۇرىلىمدىق وزگەرىستەر جاسالىپ، ءبىرقاتار ماڭىزدى مەملەكەتتىك ورگانداردىڭ باسشىلىق قۇرامى جاڭاردى. ەندىگى باستى مىندەت - العا قويىلعان ماقساتتاردى ءىس جۇزىندە جۇزەگە اسىرۋ.
- جولداۋدىڭ مازمۇنىنا جالپى باعا بەرسەم، ەڭ الدىمەن قويىلعان ماقساتتاردىڭ ومىرشەڭدىگىن اتار ەدىم. باسىمدىقتاردى ايقىنداپ قانا قويماي، ولارعا جەتۋدىڭ ناقتى جولدارىن ۇسىنۋ دا ماڭىزدى. پرەزيدەنت سوزىندە «حالىق» پەن «ادىلدىك» ۇعىمدارىنا ەرەكشە ءمان بەرىلگەنى نازار اۋدارتادى. بۇل مەملەكەتتىڭ ازاماتتاردىڭ ناقتى قاجەتتىلىكتەرىن ەسكەرۋگە ۇمتىلاتىنىن كورسەتەدى، - دەدى ول.
الەكسەي ۆلاسوۆ جاستاردى قولداۋدىڭ ماڭىزىن دا اتاپ ءوتتى. ونىڭ پىكىرىنشە، حالىقتىڭ مۇقتاج توپتارىنا باعىتتالعان الەۋمەتتىك ساياسات پەن قولجەتىمدى ينفراقۇرىلىم ازاماتتاردىڭ بولاشاققا دەگەن سەنىمىن نىعايتا الادى.
- اقشا - تەك قۇرال. ەڭ باستىسى، مەملەكەت قارجىنى قانداي جوبالارعا جۇمسايتىنى ماڭىزدى. بۇل - جولدار، مەكتەپتەر، اۋرۋحانالار سالۋ، ساپالى مەديتسينالىق كومەك پەن قولجەتىمدى ءبىلىم بەرۋ. وسىنداي ينۆەستيتسيالاردىڭ ارقاسىندا ادامدار ەكونوميكالىق دامۋدىڭ ناقتى ناتيجەسىن سەزىنە الادى، - دەدى ساراپشى.
ۆلاسوۆتىڭ پىكىرىنشە، جولداۋدا ايتىلعان باسىمدىقتاردى ءبىر-بىرىنەن بولەك قاراستىرۋعا بولمايدى. بيۋدجەت جانە سالىق ساياساتى، شاعىن جانە ورتا بيزنەستى دامىتۋعا جاعداي جاساۋ، ەل ىشىندەگى ينۆەستيتسيالاردى ارتتىرۋ سياقتى باعىتتاردىڭ بارلىعى ناقتى الەۋمەتتىك جانە ەكونوميكالىق ناتيجەگە جەتكىزۋى ءتيىس.
بۇعان دەيىن تۇركيالىق ساراپشى قاسىم-جومارت توقايەۆتىڭ جولداۋى قازاقستان دامۋىنىڭ جاڭا باعىتتارىن ايقىندايتىنىن ايتقان ەدى.