رەسەيدەگى تەراكتىدەن بالالار زارداپ شەكتى

ماسكەۋ. KAZINFORM - ماسكەۋ تۇبىندەگى كراسنوگورسك قالاسىندا بولعان تەراكت سالدارىنان ەكى بالا زارداپ شەكتى.

بۇعان دەيىن حابارلانعانداي، بەلگىسىز بىرەۋلەر كراسنوگورسك قالاسىنداعى كروكۋس سيتي حول عيماراتىندا وق جاۋدىرعان. كۋاگەرلەردىڭ ايتۋىنشا، قىلمىسكەرلەر كەشكى ساعات 20:30 شاماسىندا، كونسەرت باستالار الدىندا نەگىزگى پودەزد ارقىلى عيماراتقا كىرىپ، كەلۋشىلەر مەن كۇزەتشىلەرگە بىردەن وق اتقان. سودان ءۇش-ءتورت ادام كونسەرت زالىنا كىرىپ، كورەرمەندەردى اتىپ، «مولوتوۆ كوكتەيلدەرىن» لاقتىرا باستاعان. وسىدان كەيىن شابۋىل جاساعاندار قاشىپ كەتتى.

بەس ادامنىڭ اۆتوماتتان ادامدارعا وق اتقانى حابارلاندى. ولار كامۋفلياجدىق كيىم كيگەن جانە ءارقايسىسىندا ريۋكزاك بولعان (ءورت تۇتاندىرۋ قۇرىلعىسى بولۋى مۇمكىن).

رەسەي پرەزيدەنتىنىڭ باسپا ءسوز حاتشىسى دميتري پەسكوۆتىڭ ايتۋىنشا، مەملەكەت باسشىسىنا تەراكت تۋرالى ءبىرىنشى مينۋتتا-اق حابارلانعان.

رەسەيدىڭ تەرگەۋ كوميتەتى ماسكەۋ وبلىسىندا ر ف قىلمىستىق كودەكسىنىڭ 205-بابى (تەراكت) بويىنشا قىلمىستىق ءىس قوزعادى.

رەسەي فەدەرالدى قاۋىپسىزدىك قىزمەتى لاڭكەستىك ارەكەت سالدارىنان 40 ادام قازا تاۋىپ، 100 دەن استام ادام جارالانعانىن حابارلادى. بالالار ومبۋدسمەنى ماريا لۆوۆا-بەلوۆانىڭ ايتۋىنشا، ەكى بالا جاراقات العان، قازىر ولاردىڭ جاعدايى ورتاشا اۋىر.

قازىر ساۋدا ورتالىعىنىڭ اۋماعىندا 50 دەن استام وبلىستىق جانە استانالىق جەدەل جاردەم بريگاداسى، ونداعان ءورت ءسوندىرۋ ماشيناسى بار. توتەنشە جاعدايلار مينيسترلىگى ءورت ءتۇن ورتاسىنا قاراي سوندىرىلگەنىن حابارلادى.

الداعى كۇندەرى ماسكەۋدە مەملەكەتتىك مەكەمەلەردەگى بارلىق ويىن-ساۋىق شارالارى توقتاتىلدى.

ءبىرقاتار تەلەگرام-ارنالاردىڭ مالىمەتىنشە، حالىقارالىق Reuters جانە CNN اگەنتتىكتەرى ماسكەۋدەگى لاڭكەستىك ارەكەتتى دايش لاڭكەستىك توبى ءوز موينىنا العانىن حابارلادى.

ايتا كەتەيىك، ماسكەۋدەگى كروكۋس سيتي حول كونسەرت زالىندا بولعان قايعىلى وقيعاعا بايلانىستى قازاقستان ازاماتتارى ءۇشىن مىنا سەنىم تەلەفونى بويىنشا جەدەل جەلى ىسكە قوسىلدى: 89258977114.

ق ر سىرتقى ىستەر مينيسترلىگى حابارلاعانداي، رەسەيدەگى تەراكتىدە قازا تاپقاندار مەن زارداپ شەككەندەر اراسىندا قازاقستاندىقتار بار ەكەنى تۋرالى اقپارات جوق.