رەسەيدەن 4 جولبارىس ەلىمىزگە قاشان جەتكىزىلەدى
استانا. KAZINFORM - رەسەيدەن ەلىمىزگە جولبارىستاردى جەتكىزۋ ماسەلەسى ءالى پىسىقتالىپ جاتىر. بۇل تۋرالى ەكولوگيا جانە تابيعي رەسۋرستار مينيسترلىگىنەن ءمالىم ەتتى.
- قازىرگى ۋاقىتتا قازاقستان رەسپۋبليكاسى مەن رەسەي فەدەراتسياسى اراسىنداعى جولبارىس بويىنشا مەملەكەتارالىق جۇمىس توبىنىڭ وتىرىستارى ءجۇرىپ جاتىر. مينيسترلىك العاشقى جولبارىستاردى قازاقستانعا اكەلۋ ماسەلەسىن پىسىقتاپ جاتىر. ازىرگە ناقتى ۋاقىتى انىقتالعان جوق، - دەدى مينيسترلىكتەن اگەنتتىكتىڭ ساۋالىنا وراي.
ايتا كەتەيىك، 2024 -جىلى 21 - قىركۇيەكتە نيدەرلاندىنىڭ حەندەرداەلل زووباعىنان «ىلە- بالقاش» رەزەرۆاتىنا 2 جولبارىس جەتكىزىلدى. قازىر جولبارىستاردىڭ جاعدايى ءبىرقالىپتى. قىس مەزگىلىن جاقسى قىستاپ شىقتى.
- جولبارىستار قورشاۋ ىشىندە بولعاندىقتان ولاردىڭ كۇندەلىكتى كۇتىمىمەن «جولبارىس» جابايى مىسىق تەكتەستەردى ساقتاۋ قاۋىمداستىعىنىڭ ماماندارى اينالىسادى. رەزەرۆات قىزمەتكەرلەرى، ياعني مەملەكەتتىك ينسپەكتورلار اۋماقتا زاڭسىزدىققا جول بەرمەۋ جانە ورمان ءورتىن بولدىرماۋ، بالقاش كولىن جاعالاي كەزەكشىلىك جۇمىستارىن جۇرگىزۋ، ارنايى بەكەتتەر ارقىلى باقىلاۋ جۇمىستارىمەن اينالىسادى. رەزەرۆات شتاتىندا جولبارىستاردى كۇتىپ ۇستاۋ بويىنشا ارنايى مامان قاراستىرىلماعان. سوندىقتان رەزەرۆات جولبارىستاردى كۇتۋ، باقىلاۋ جانە ۆەتەرينارلىق قىزمەت كورسەتۋدى جۇزەگە اسىراتىن «جولبارىس» قاۋىمداستىعىمەن شارت جاساسقان. ال رەزەرۆات قاۋىمداستىقتىڭ جۇمىسىن باقىلاۋ جۇرگىزەدى، - دەدى ۆەدومستۆودان.
ايتا كەتەيىك، 2010 -جىلى سانكت- پەتەربۋرگتە جەر جاھانداعى جولبارىستاردى امان الىپ قالۋ بويىنشا حالىقارالىق فورۋم ءوتتى. ءدال وسى فورۋمدا WWF (دۇنيەجۇزىلىك جابايى تابيعات قورى) ۇسىنىسى نەگىزىندە قازاقستان مەن رەسەي ورتالىق ازياداعى جولبارىستاردى قايتا ءوسىرۋ باعدارلاماسىنىڭ قولعا الىنعانى جاريالاندى. سودان كەيىن وزبەكستان، ازەربايجان، گرۋزيا، يران، قىرعىزستان، قىتاي، تاجىكستان، تۇركيا ەلدەرىنىڭ تۇران جولبارىسىن وسىرۋگە بولادى-اۋ دەگەن ايماقتارى زەرتتەلىپ، سارالانعانىمەن، اقىرى، ەكى ورىن، اتاپ ايتقاندا ارال تەڭىزىنىڭ وزبەكستانعا قاراستى اۋماعى مەن قازاقستاننىڭ بالقاش كولىنىڭ ماڭى تاڭدالىپ الىندى. WWF تۇران جولبارىستارىن (نەگىزىنەن امۋر جولبارىستارىنان ءوسىرۋ) قازاقستاندا - بالقاش وڭىرىندە قالپىنا كەلتىرۋ باستاماسىنا قولداۋ ءبىلدىردى. 2017 -جىلدىڭ 8 -قىركۇيەگىندە قازاقستان ۇكىمەتى جولبارىستى ىلە-بالقاش ايماعىنداعى تاريحي تىرشىلىك مەكەنىنە قايتارۋ بويىنشا جوسپارىن جاريا ەتىپ، جولبارىس رەينترودۋكسياسىنىڭ بىرلەسكەن باعدارلاماسىن ىسكە اسىرۋ جونىندە WWF مەن مەموراندۋمعا قول قويدى.
بۇعان دەيىن ەكولوگيا جانە تابيعي رەسۋرستار ءمينيسترى ەرلان نىسانبايەۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا تۇران جولبارىسىنىڭ پوپۋلياتسياسىن قالپىنا كەلتىرۋ جۇمىستارى قالاي ءجۇرىپ جاتقانىن ايتتى.