رەسەيدە زاڭسىز كوشى-قون ۇيىمداستىرعاندارعا جازا كۇشەيتىلدى

استانا. KAZINFORM - رەسەيدە مەملەكەتتىك دۋما زاڭسىز كوشى-قوندى ۇيىمداستىرعانى ءۇشىن قىلمىستىق جازانى قاتايتۋ تۋرالى زاڭ جوباسىن قابىلدادى. ەندى وسى قىلمىستى جاساعاندار سەگىز جىلدان ون بەس جىلعا دەيىن باس بوستاندىعىنان ايىرىلادى، دەپ حابارلايدى Kazinform اگەنتتىگىنىڭ ءتىلشىسى.

زاڭ جوباسى اۆتورلارىنىڭ ءبىرى، رەسەي پارلامەنتى تومەنگى پالاتاسىنىڭ ءتوراعاسى ۆياچەسلاۆ ۆولوديننىڭ اتاپ وتۋىنشە، زاڭ جوباسىندا 3 ميلليوننان 5 ميلليون رۋبلگە دەيىن ايىپپۇل (15 ميلليون 60 مىڭ تەڭگەدەن 25 ميلليون 100 مىڭ تەڭگەگە دەيىن، 29-قازانداعى جاعداي بويىنشا 1 رۋبل - 5,02 قازاقستاندىق تەڭگە)، سونداي-اق بەلگىلى ءبىر لاۋازىمداردى اتقارۋ قۇقىعىنان ايىرۋ جازاسى قاراستىرىلعان.

قۇجاتتا سونىمەن قاتار جالعان قۇجات جاساۋ، سونداي-اق شەتەل ازاماتتارىن جالعان تىركەۋ جانە تىركەۋگە بايلانىستى قۇقىق بۇزۋشىلىقتار ءۇشىن جاۋاپكەرشىلىكتى كۇشەيتۋ ۇسىنىلدى. ول بويىنشا 2 جىلدان 6 جىلعا دەيىن باس بوستاندىعىنان ايىرۋ جازاسى قاراستىرىلعان.

قۇجات اۆتورلارى - مەملەكەتتىك دۋما ءتوراعاسى ۆياچەسلاۆ ۆولودين، م د كوشى-قون ساياساتى جونىندەگى كوميسسيا جەتەكشىسى، ۆيتسە-سپيكەر يرينا ياروۆايا، م د بارلىق پارلامەنتتىك فراكسيالاردىڭ جەتەكشىلەرى مەن دەپۋتاتتارى. زاڭ جوباسىن رەسەي فەدەراتسياسىنىڭ ۇكىمەتى، جوعارعى سوتى، باس پروكۋراتۋراسى جانە رەسەيدىڭ تەرگەۋ كوميتەتى قولداپ وتىر.

بۇرىن حابارلانعانداي، فرانسيا 2025-جىلعا قاراي ميگراتسيالىق زاڭنامانى كۇشەيتپەك.

ەسكە سالا كەتسەك، ماۋسىم ايىندا ەۋرووداقتا باسپانا سۇراعان وتىنىشتەر سانى 17 پايىزعا قىسقارعان.