رەسەيدە قازاق ءتىلىن ۇيرەتەتىن وقۋلىقتار دايىندالىپ جاتىر

استانا. قازاقپارات - التاي رەسپۋبليكاسىنىڭ قوساعاش مەكتەبىنىڭ ۇستازدارى بىرنەشە جىلدان بەرى قازاق ءتىلى مەن ادەبيەتىن وقىتۋ بويىنشا ارنايى وقۋ-ادىستەمەلىك قۇرالدار ازىرلەپ جاتىر.

وسى ۇجىمنىڭ 1-4-سىنىپتارعا ارنالعان «الىپپە» مەن «قازاق ءتىلى» وقۋلىقتارى ساراپتامادان ءوتىپ، فەدەرالدى باعدارلاماعا ەنگىزىلدى. ولار رەسەيدە تۇرىپ جاتقان قانداستارىمىزعا تۋعان ءتىلىن مەكتەپتەردە وقۋعا مۇمكىندىك بەردى.

رەسمي دەرەكتەر بويىنشا، رەسەيدىڭ التاي رەسپۋبليكاسىندا 20 مىڭداي قانداسىمىز ءومىر سۇرەدى. ونىڭ 12 مىڭى قوس اعاش اۋدانىندا تۇرادى. وسىنداعى سەگىز مەكتەپتە قازاق ءتىلى مەن ادەبيەتىن وقىتاتىن 28 ۇستاز بار. 2300 بالا انا ءتىلىن ۇيرەنىپ جاتىر. قوساعاش مۇعالىمدەرىنىڭ ارقاسىندا ءتورت جىلدان بەرى رەسەي مەكتەپتەرىندە قازاق ءتىلى وقىتىلىپ ءجۇر.

سەرىكجان قىدىربايەۆ، قوساعاش اۋدانىنىڭ اكىمى:

- بىرىنشىدەن ءتورتىنشى سىنىپقا دەيىن قازاق ءتىلدىڭ كىتابىن جاساپ العاننان كەيىن، بىرىنشىدەن تورتىنشىگە دەيىن قازاق تىلدە وقيمىز. ال بەسىنشىدەن توعىزعا دەيىن فاكۋلتاتيۆ. ول ۋاقىتشا. ەندىگى جىلعا دەيىن ول كىتاپتاردى جاسايمىز. كىشكەنتاي ءبىر اۋدان بولساق تا، كىتابىمىز بار. رەسەي ىشىندە قازاقتاردان ۇلكەن اعالارىم، جەڭگەلەرىم ماعان شىعىپ، بىزگە دە وسى كىتاپتان بەرىڭدەرشى، بىزگە دە ساتىڭدارشى دەگەن اڭگىمە بولىپ تۇر. سوندا مەن بىرەۋىن دە ساتقان جوقپىن. كەلىڭدەر، الىڭدار دەيمىن.

مۇعالىمدەر بەسىنشى سىنىپتان توعىزىنشى سىنىپقا دەيىنگى وقۋشىلارعا ارنالعان كىتاپتار كەلەسى وقۋ جىلىنا دەيىن شىعادى دەگەن ۇمىتتە. قازىر بۇل وقۋلىقتار ارنايى ساراپتامادان ءوتىپ جاتىر.

يگور سولتانبايەۆ، التاي رەسپۋبليكاسى ءبىلىم باسقارماسىنىڭ بولىمشە باسشىسى:

- ماتەريالداردى كوپ ىزدەندىك. التاي حالىقپەن بىرگە تۇرعان سوڭ، جانە مەملەكەتتىك ستاندارتقا ساي كىتاپتىڭ قۇرامىندا جيىرما پايىزى جەرگىلىكتى ماتەريالدار بولۋ كەرەك، سەكسەن پايىزى ءبىزدىڭ مەملەكەتتىك رەسەي ماتەريالدارى بولۋ كەرەك. سوندىقتان ءبىز ورىس تىلدەن قازاق تىلىنە اقىن، جازۋشىلاردىڭ جازبالارىن اۋداردىق. قازىر رەسەيدىڭ بىرنەشە ايماعىندا قازاق بالالارى التاي مۇعالىمدەرىنىڭ دايىنداعان باعدارلاماسىمەن وقۋعا كىرىستى. مىسالى، ومبى وبلىسىنىڭ 11 مەكتەبىندە قازاق ءتىلى مەن ادەبيەتى وسى كىتاپتارمەن وقىتىلادى.

24.kz