رەسەيدە قازاق ءتىلدى تەلەارنا اشقان تۇڭعىش قازاق
ۇيگە بارعان سوڭ قازاقستاندىق تەلەارنا باسشىلارىنا حات جازامىن. بىزگە كەرەگى - سول ءوزىڭىز ايتقان قازاقشا كينولار، كونسەرتتەر مەن مۋلتفيلمدەر عوي. ۇلكەندەرىمىز قازاقشا كينو كورگىسى كەلەدى. نەمەرەلەرى دە قازاقشا مۋلتفيلم كورىپ وسسە دەيدى. مەن قازىر وسىنداي دۇنيەلەر ىزدەپ، سۇراستىرىپ ءجۇرمىن. رۇقساتسىز تاراتۋعا استە بولمايدى.
ەربولات بولەنحان ۇلى التاي رەسپۋبليكاسىندا (رەسەي) قازاق كوپ تۇراتىن قوساعاش اۋدانىندا الدىمەن اۋىل اكىمى، سوسىن اۋدان اكىمىنىڭ ورىنباسارى قىزمەتتەرىن اتقارعان. كەيىن «قازاق نۇرى» دەگەن اتپەن ۇلتتىق مادەني ۇيىم قۇرىپ، ءتۇرلى باستامالاردىڭ جارشىسى بولعان. اتقارعان يگى ىستەرى بەيجاي قالماسىن ءارى كوپشىلىكتىڭ كوزى، قۇلاعى ءھام ءتىلى بولسىن دەگەن نيەتپەن «ۇلى جىبەك جولى» گازەتى مەن «قوساعاش-ت ۆ» تەلەارناسىن اشقان. قايتسەم قوساعاشتىقتاردىڭ رۋحاني-مادەني بولمىسىن ساقتايمىن، ولارعا قانداي قازاقشا كونتەنت ۇسىنامىن دەپ جۇرگەن ەربولات بولەنحان ۇلىمەن از-كەم سۇحباتتاسقان ەدىك.
- ءسىزدى تانيتىن كوپشىلىك قازاق كوپ شوعىرلانعان قوساعاش اۋدانىندا ەڭ جاس اكىم بولعان قازاق دەپ ايتادى. سوندا قوعامدىق جۇمىستارمەن وقۋشى كەزىڭىزدەن باستاپ اينالىستىڭىز با؟
- كەلەسى جىلى قوعامدىق جۇمىسپەن اينالىسىپ جۇرگەنىمە وتىز جىل تولادى. مەن رەسەيدەگى التاي رەسپۋبليكاسى قوساعاش اۋدانىنا قاراستى قوساعاش اۋىلىندا تۇرامىن. وقۋشى كەزىمنەن قوعامدىق جۇمىستارمەن اينالىسقان مەن مەكتەپ بىتىرگەن سوڭ بۇل ىسپەن بەلسەندى ارالاسا باستادىم. ۇلتجاندى، جاناشىر جاستارمەن ۇنەمى باس قوسىپ، ءتۇرلى سپورتتىق ءىس-شارالارعا قاتىسىپ، قوعام اراسىندا كوپ باستاما كوتەرىپ، ەل ىشىندە بەلسەندى بالا اتاندىق.
1994 -جىلى ۇلكەن قۇرىلتاي ءوتىپ، «بىرلىك» دەگەن قازاق قوعامىنا جەتەكشى سايلانار كەزدە ۇلكەندەر توپ ىشىنەن مەنى الىپ شىعىپ، سول قوعامنىڭ باسشىسى بولۋعا لايىق ۇمىتكەر دەپ ۇسىندى. ءالى ەسىمنەن كەتپەيدى، بۇل 1994 -جىلدىڭ تامىزى بولاتىن. ول كەزدە 24 جاستا ەدىم. كسرو ىدىراعان سوڭ ءتىل مەن مادەنيەتتى ۇمىتتىرماۋ ماقساتىندا قۇرىلعان بۇل قوعامنىڭ جۇمىسىن شامامىز كەلگەنشە دوڭگەلەتتىك. ات جارىستار، قۇرىلتايلار وتكىزىپ تۇردىق.
قازاق، التاي كۇرەستەرىنەن سايىستار ۇيىمداستىردىق. اقساقالدارىمىزبەن اقىلداسىپ، تالاي باستاما كوتەردىك. «بىرلىك» دەگەن اتپەن فۋتبول كومانداسىن قۇرىپ، رەسپۋبليكالىق ويىنداردا توپ جاردىق. اتى زاتىنا ساي قوعام بولۋىنا بار كۇشىمىزدى سالدىق. ماعان دەيىن قارقىندى جۇمىس ىستەپ تۇرعان قوعامنىڭ جۇمىسىن بۇرىنعىدان بەتەر ىلگەرىلەتىپ، تالاي شارۋا اتقاردىق. ول قوعامدى 2000 جىلعا دەيىن باسقاردىم. سودان سوڭ ءوزىم تۋىپ-وسكەن قوساعاش اۋىلىنىڭ اكىمى لاۋازىمىنا تاعايىندالدىم.
- ول كەزدە نەشەدە ەدىڭىز؟
- ءيا. 2000 -جىلى ءبىرىنشى رەت اۋىل اكىمدەرىن سايلاۋ جۇيەسى ەنگىزىلدى. سول كەزدە تاعى دا ۇلكەن كىسىلەر مەنى ۇمىتكەر رەتىندە ۇسىنىپ، اقىرىندا اۋىل اكىمى بولىپ سايلاندىم. وعان دەيىن دە قازاق اكىمدەر اۋىلدى باسقارعان، الايدا ەڭ جاس اكىم مەن بولدىم. 29 جاستامىن.
- اكىم قىزمەتىن اتقارىپ تۇرعاندا دا «بىرلىكتە» كوتەرگەن باستامالار بۇدان دا ىلگەرىلەي تۇسكەن بولار؟
- البەتتە! مەن اكىم بولىپ سايلانعاندا ءبىز جاقتا سەگىز مىڭعا جۋىق قازاق تۇراتىن. قازىر ون ءۇش مىڭنان استىق. اكىم بولعان سوڭ اۋىلدا تۇراتىن بارلىق ۇلتقا تەڭ قاراۋىم كەرەك قوي. ەشكىمدى ءبولىپ- جارماۋعا تىرىستىم. الايدا ءبارىبىر قازاق مادەنيەتىن ناسيحاتتاۋدان اجىراپ كەتپەي، «بىرلىكتە» جۇرگەندە نە ىستەدىم، سونى وتكىزىپ تۇردىم. اكىم رەتىندە لاۋازىمىم جوعارىلاعان سوڭ، مادەنيەتكە قاتىستى يدەيالاردى كەڭىنەن دامىتتىم. بىزدە جىل سايىن قۇرىلتاي وتكىزىلىپ تۇرادى. كيىز ءۇي تىگىپ، حالىقتىڭ باسىن قوسىپ، ات جارىستىرىپ، قازاق كۇرەسىنەن سايىستار ۇيىمداستىرامىز. ەڭ باستىسى، حالىقتى نە الاڭداتادى؟
كوڭىل كونشىتەر قانداي ناتيجەگە قول جەتكىزدىك؟ نەدەن قالىس قالىپ جاتىرمىز؟ وسىنىڭ ءبارىن ەلمەن بىرگە وتىرىپ، تالقىلايمىز. ودان بولەك اۋىل تۇرعىندارىنىڭ نازارىنا ءتۇرلى باستامالار ۇسىنامىز. ولار كەلىسەتىنىن- كەلىسپەيتىنىن سول جەردە ايتىپ، شەشىم قابىلدايمىز. سول قۇرىلتايلاردىڭ كوبىن اۋەلحان جازيت ۇلى دەگەن بەلسەندى كىسى ەكەۋىمىز ۇيىمداستىردىق. ءبىز شەتتە جاتقان ءبىر قاۋىم ەل بولعاندىقتان، حالىقتىڭ باسىن ءجيى قوسىپ، وسىنداي قۇرىلتايلار وتكىزۋدىڭ ماڭىزى زور.
وسىنداي قارقىنمەن بەس جىل جۇمىس ىستەگەن سوڭ «تۇلپار» دەگەن فيرما اشىپ، جەكە كاسىپكەرلىكپەن اينالىسۋعا بەت بۇردىم. كوممەرتسيالىق جوبا بولعانىمەن، ۇلتتىق ويىنداردى، اتاپ ايتسام، الامان بايگە، تەڭگە الۋ، اۋدارىسپاق، قازاق كۇرەسى سەكىلدى سپورت تۇرلەرىن كەڭىنەن ناسيحاتتاۋمەن اينالىستىم. بىرتە-بىرتە بۇل جوبا دا جەمىسىن بەرىپ، دىتتەگەنىمىزگە قول جەتكىزىپ، جوسپارلاعان دۇنيەلەرىمىز ىسكە استى. سوسىن 2008 -جىلى اۋدان اكىمىنىڭ ورىنباسارى قىزمەتىنە تاعايىندالدىم. وندا مەن الەۋمەتتىك ماسەلەلەرگە جاۋاپتى بولدىم.
- قوساعاش اۋدانىنا تارالاتىن «ءشۇيدىڭ نۇرى» گازەتىنىڭ رەداكتورى ارقالىق اعاي بىزگە بەرگەن سۇحباتىندا «رەسەيدەگى ۇلتتىق بولمىسى تازا ساقتالعان قازاقتار قوساعاشتا تۇرادى» دەگەن ەدى. اۋدان كولەمىندە جۇمىس ىستەسەڭىز دە، مۇندا دا ءتول مادەنيەتتى دامىتۋدان الىس كەتپەگەن بولارسىز؟
- ارينە. ءبىزدىڭ اۋدانعا ون ءبىر اۋىل قارايدى. سول ون ءبىر اۋىلدىڭ بەس اۋىلىندا قازاق كوپ تۇرادى. لاۋازىمدىق قىزمەت نۇسقاۋلىعىندا جازىلعان بارلىق تالاپتى ورىنداۋعا تىرىستىم. دەيتۇرعانمەن، ءوزىڭىز ءبىلىپ تۇرعانداي، ءتول مادەنيەتتى دامىتۋدى دا كۇن تارتىبىنەن قالدىرمادىق. بىزدە اۋداندا قازاق ءتىلى مەن ادەبيەتىنەن ساباق بەرەتىن 33 مۇعالىم بار. مەن سول 33 مۇعالىمنىڭ 24 ىن قازاقستانعا جىبەرىپ، سەمينارعا قاتىستىردىم. ارنايى سەرتيفيكات يەلەنىپ قايتقان ولاردىڭ بىلىكتىلىگىن جوعارىلاتۋعا مۇمكىندىك جاسادىق.
ودان بولەك، قازاق تىلىندە ءۇش حالىقارالىق كونفەرەنسيا وتكىزدىك. بىزگە قاتونقاراعايدان بىلىكتى ماماندار كەلدى، سودان سوڭ ولار وزدەرى وتكىزگەن كونفەرەنسياعا ءبىزدى شاقىرىپ، ەكەۋارا بايلانىس ورناتتىق. سودان سوڭ شىعىس قازاقستان وبلىسىنداعى سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ وقىتۋشىلارىمەن ەكى رەت كونفەرەنسيا وتكىزدىك. جازعى كانيكۋل كەزىندە وقۋشىلاردىڭ باسىن قوسىپ، سالت-ءداستۇردى ناسيحاتتاۋعا باعىتتالعان لاگەر ۇيىمداستىردىق. ولاردى قازاق تىلىنەن وتكەن وليمپيادالارعا جىبەردىك. اۋداننان شىققان ەكى سوعىس ارداگەرى جانىبەك ەلەۋىسوۆ جانە قىدران تۋعامبايەۆتىڭ قۇرمەتىنە قازاق كۇرەسىنەن حالىقارالىق تۋرنير ۇيىمداستىرىلدى. وندا ءوزىمىزدىڭ بالۋانداردان بولەك، قازاقستان، موڭعوليا اتلەتتەرى دە كۇش سىناستى. تاريحتا تۇڭعىش رەت قازاق مادەنيەتىنىڭ كۇنىن اتاپ وتتىك.
سول كەزدە مادەنيەت ءمينيسترى بولعان مۇحتار قۇل-مۇحاممەد مىرزاعا حات جازىپ، ارتىنشا كەزدەسىپ، مادەنيەت كۇنى سەكىلدى ماڭىزدى ءىس-شارادا حالىق ءارتىسى التىنبەك قورازبايەۆتىڭ قوساعاشقا ات باسىن تىرەۋىنە مۇرىندىق بولدىق.
اكىم ورىنباسارى قىزمەتىنەن كەتكەن سوڭ، 2014 -جىلى «قازاق نۇرى» دەگەن اتپەن التاي رەسپۋبليكالىق قازاق ۇلتتىق مادەني ورتالىعىن اشتىم. قول بوساعاندىقتان، جۇمىس قارقىنى بۇرىنعىدان بەتەر ۇدەي ءتۇستى. اۋدان كولەمىندە ءبىرىنشى رەت ءبىلىم بولىمىمەن بىرلەسىپ، «بالاپان» بالالار فەستيۆالىن وتكىزدىك.
ودان بولەك، ورتا ازيالىق ۋنيۆەرسيتەتتىڭ پروفەسسورلارىن شاقىرىپ، مۇعالىمدەردىڭ بىلىكتىلىگىن ارتتىراتىن كونفەرەنتسيانىڭ وتۋىنە مۇرىندىق بولدىم. ولار قازاقستاننان الىپ كەلگەن ءتۇرلى وقۋلىق پەن جۋرنالداردى تاراتىپ، مۇعالىمدەردى قارىق قىلدى. ءبىز ۇيىمداستىرعان ءشامشى قالداياقوۆ اتىنداعى رەترو فەستيۆال دە كوپشىلىكتىڭ ەسىندە. سول كەزدە بىزگە شىعىس قازاقستان وبلىسىنىڭ اكىمى قىزمەتىن اتقارعان مارقۇم بەردىبەك ساپاربايەۆتىڭ كومەگى كوپ ءتيدى.
ول كىسى بىزگە ۇلتتىق كيىمدەر، قازاقشا وقۋلىقتار، ءتىپتى دومبىرا سىيلاپ، جوق نارسەمىزدىڭ تۇگەلىن تۇگەندەپ بەردى. ەرەكشە قامقورلىق تانىتىپ، ۇلكەن قولداۋ كورسەتتى. مۇنداي كەزدە ەكى ەسە جۇمىس ىستەگىڭ كەلىپ تۇرادى عوي. سوندىقتان بۇرىن-سوڭدى بولماعان جوبالاردى ىسكە اسىرىپ، بەلسەندىلىگىمىز ارتا ءتۇستى. ەكى رەت اقىندار جارىسىن وتكىزدىك. «مەن - قازاقپىن» مەگا جوباسىنا ۇمىتكەرلەردى ىرىكتەۋگە اتسالىستىق.
ىرىكتەۋدەن وتكەندەر استانادا وتكەن فينالدا ابىرويمەن باق سىنادى. ودان بولەك، جەرگىلىكتى جانە موڭعوليا قازاقتارىنىڭ قاتىسۋىمەن التىنبەك قورازبايەۆتىڭ 70 جىلدىعىنا وراي كونكۋرس وتكىزدىك. 2018 -جىلى «شانشار» تەاترىنىڭ جەتەكشىسى ۋاليبەك ءابدىرايىموۆ قولداۋ كورسەتكەن سوڭ، قوساعاشتاعى مىقتى انشىلەرىمىزدى قازاقستانعا باستاپ اپاردىم. ءسويتىپ، «شانشارمەن» بىرگە تۇركىستان وبلىسىنداعى اۋدانداردى ارالاپ، شىمكەنتتە ۇلكەن كونسەرت قويدىق.
ودان وزگە، ۇلتتىق ويىندارىمىزدى دا نازاردان تىس قالدىرعان جوقپىز. مەرەكە بولسىن، بولماسىن، ۇنەمى وتكىزىپ تۇرۋعا تىرىستىق. سوسىن بىزگە وسىنىڭ ءبارىن باسىپ شىعاراتىن، ەل ىشىندە جاريا قىلاتىن باسىلىم كەرەك ەكەنىن ءتۇسىندىم. ءسويتىپ، 2019 -جىلى «ۇلى جىبەك جولى» دەگەن اتپەن گازەت اشتىم. الايدا ءۇش جىلعا جالعاسقان پاندەميادان سوڭ، مۇمكىندىگىمىز شەكتەلىپ، اناۋ ايتقانداي ەشتەڭە ىستەي المادىق.
ءبىراق 2022 -جىلى باسىلىم شىعارۋ ءىسىن قايتا قولعا الىپ، اپتا سايىن شىعارىپ تۇردىق. الايدا قازىر ايىنا ءبىر رەت قانا شىعامىز. ويتكەنى قازىر «ۇلى جىبەك جولى» گازەتىنەن بولەك، «قوساعاش-ت ۆ» دەگەن اتپەن اشقان تەلەارنانىڭ جۇمىسى دا كوپ ۋاقىتىمىز بەن نازارىمىزدى الىپ تۇر. ەكەۋىندە دە ءوزىم باس رەداكتور قىزمەتىن اتقاراتىندىقتان، ەكەۋىن قاتار الىپ ءجۇرۋ قيىنعا سوعىپ تۇر. دەگەنمەن شاما-شارقىمىز جەتكەنشە ەكەۋىن اقىرىنداپ جۇرگىزىپ كەلەمىز.
- «قوساعاش- ت ۆ» تەلەارناسىن اشۋعا نە تۇرتكى بولدى؟ مادەني ورتالىق اتقارعان جۇمىستى باسىلىمعا شىعارعاننان بولەك، كوگىلدىر ەكران ارقىلى دا كورسەتكىڭىز كەلدى مە؟
- ول دا بار. الايدا باستى سەبەپ - ەل ىشىندە قوردالانىپ قالعان وزەكتى ماسەلەلەردى جاريا قىلۋ، شەشىلۋى وڭاي پروبلەمالاردى ءسوز ەتۋ. ءبىز بۇل ماسەلەلەردى اۋدان كولەمىندە مىڭ بەس ءجۇز دانامەن تارايتىن گازەتىمىزدە دە كوتەرگەنبىز. دەيتۇرعانمەن، تەلەارنانىڭ ءجونى بولەك قوي. ءسويتىپ، اقىلداسا كەلە تەلەارنا اشقان ابزالىراق دەگەن توقتامعا كەلىپ، ليتسەنزيا الۋدىڭ امالىن قاراستىردىق. بىلتىر «ۇلى جىبەك جولى» دەگەن اتپەن فەستيۆال وتكىزىپ، ات جارىس، قازاق، التاي كۇرەسىنەن سايىس ۇيىمداستىرعانبىز.
سول كەزدە اكىمدەر مەن بەلسەندىلەردى شاقىرىپ، تەلەارنانىڭ تۇساۋكەسەرىن وتكىزدىك. كابەلدى تەليەۆيزيا ارقىلى تاراتىلاتىن بۇل تەلەارنا بيىل قاڭتار ايىندا كورەرمەنگە جول تارتتى. اياق الىسىمىز جامان ەمەس. قاتارىمىزدا كاسىبي جۋرناليستەر بولماسا دا، ساپالى دۇنيە جاساۋعا تىرىستىق.
الدىمەن قازىنالى قارتتارىمىزبەن سۇحباتتاسۋدى قولعا الدىق. ولاردىڭ ءومىربايانىن، ءجۇرىپ وتكەن جولىن، تىڭداي بەرگىڭ كەلەتىن اڭگىمەلەرىن قازىر پلەنكاعا ءتۇسىرىپ الماساق، ەرتەڭ كەش بولادى عوي.
ولاردىڭ اڭگىمەسىنىڭ تاربيەلىك ءمانى زور بولعاندىقتان، بۇل تۇسىرىلىمدەر بولاشاق ۇرپاققا كورسەتەر دۇنيە ەكەنى ايتپاسا دا تۇسىنىكتى. ءوزىم ارنايى رۋبريكا جۇرگىزەمىن. دەگەنمەن اشىلعانىنا از ۋاقىت بولعان تەلەارنانىڭ كونتەنتىن قاتىرىپ جاتىرمىز دەپ ايتا المايمىن. ساپالى جۇمىس ىستەۋگە قاجەت جابدىق بولماعاندىقتان، ءبىراز يدەيامىز ىشىمىزدە ءپىسىپ جاتىر. كوبىنە ءوزىمىز تۇسىرگەن ەسكى ماتەريالداردى مونتاجداپ، بەرىپ جاتىرمىز. ودان بولەك، زاڭعا قارسى كەلمەيتىن دۇنيەلەردى ۇسىنۋدامىز.
الداعى ۋاقىتتا جابدىقتاردى تۇگەندەپ، جاڭالىقتار توپتاماسىن جۇرگىزەتىن ديكتوردى جۇمىسقا شاقىرىپ، قوسىمشا جۋرناليستەردى جۇمىلدىرۋدى ماقسات ەتىپ وتىرمىن. سول كۇنگە تەزىرەك جەتسەك ەكەن دەگەن نيەتپەن قازىر قازاقستانعا ىسساپارمەن كەلىپ، جاۋاپتى ادامدارمەن سويلەسىپ، ارى-بەرى شاپقىلاپ ءجۇرمىن. بىلايشا ايتقاندا، كونتەنت جيناي الماي ءجۇرمىن.
- رەسەيدە بۇعان دەيىن قازاق ءتىلدى تەلەارنا بولعان عوي، ءيا؟
- جوق.
- سوندا ءسىز رەسەيدە قازاق ءتىلدى تەلەارنا اشقان تۇڭعىش قازاق بولىپ تۇرسىز عوي؟
- سولاي بولىپ تۇر عوي (كۇلىپ).
- بۇل تەلەارنانى تەك التاي قازاقتارى كورە الادى عوي سوندا؟
- ءيا. قازىر جيىرما ەكى مىڭ ابونەنت بار. جالپى، حالىقتىڭ ءبىزدىڭ بۇل باستامامىزعا دەگەن كوزقاراسى كەرەمەت. كورگىسى كەلەتىن دۇنيەلەردى ورتاعا سالىپ، كەرى بايلانىس ورناتادى. كوپ جاعدايدا «مىنا باعدارلاما جاقسى شىعىپتى» دەپ اعىنان جارىلىپ، حابارلاسادى. بىردە توقساندى القىمداعان ءبىر اجەيدىڭ سۇحباتىن بەرگەنبىز. ول كىسىنىڭ كىندىك قانى تامعان جەرى قوساعاشتان ءجۇز قىرىق شاقىرىم جەردە ورنالاسقان ەكەن. ونداعى تۋىستارى اجەيدى كۇندە كورە بەرمەيدى. سول كىسى تۋرالى باعدارلاما شىعارعان كەزدە، اعايىن-تۋىستارى ءبىرىنىڭ سوڭىنان ءبىرى ماعان تەلەفون شالىپ، العىستى قارشا بوراتتى. اجەيدى كوپتەن بەرى كورمەگەن ولار ءبىزدىڭ تەلەارنا ارقىلى كورىپ، كوزايىم بولسا كەرەك.
ايتىپ تۇرمىن عوي، وسىلاي حالىقتىڭ كوڭىلىنەن شىعاتىن ءتۇرلى نارسە ىستەۋگە بولادى. الايدا قۇرال- جابدىق جەتىسپەگەندىكتەن، شاعىن ستۋديادا جۇمىس ىستەۋگە ءماجبۇرمىز. دەگەنمەن بۇل جوبانىڭ باستالعانىنا ءبىر جىل دا بولعان جوق قوي. سوعان قاراماستان شاما-شارقىمىز جەتكەنشە اتقارىپ جاتقان جۇمىسىمىزعا الگى اجەيدىڭ تۋىستارى سەكىلدى تۇرعىندار وڭ باعاسىن بەرىپ جاتسا، كۇنى ەرتەڭ «كۇشىمىزگە» مىنگەن سوڭ، ريزا بولاتىندار سانى ارتا تۇسەتىنى انىق. قازىر سەرۆەر اۋىستىرىپ جاتىرمىز. مەن قازاقستانعا ءىسساپارعا كەتىپ قالعان سوڭ، بۇل ءىستى توقتاتا تۇرعان ەدىك. ەندى جۇمىستى جانداندىرامىز.
- قازاقستانعا كەلگەندە كىممەن كەزدەسە الدىڭىز؟ كىمنەن قانداي كومەك كەرەك؟
- بىزگە ابزال ساپاربەك ۇلى باستاعان «وتانداستار قورى» كوپ كومەكتەسىپ جاتىر. جالپى، «وتانداستار قورى» بيىل ەرەكشە قارقىنمەن جۇمىس ىستەدى عوي. ولار كورسەتكەن جولدى ءبىز جالعاپ، بارىنشا ءتول مادەنيەتىمىزدى ناسيحاتتاۋعا كۇش جۇمساپ جاتىرمىز. وزىمىزگە كەرەك دۇنيەنى، قاجەت كونتەنتتى سول قوردان الامىز دەگەن نيەتتەمىز.
- «وتانداستار قورىنان» بولەك، قازاقستاندىق تەلەارنالارعا دا سۇراۋ سالساق قايتەدى؟ سىزگە ناقتى نە قاجەت؟ قازاقشا دەرەكتى فيلمدەر، مۋلتفيلمدەر، كونسەرتتىك باعدارلامالار عوي؟
- ءيا، بىزگە قازاقشا كونتەنت اۋاداي قاجەت. ەفيردى پايدالى دۇنيەمەن تولتىرۋ ءۇشىن جان-جاققا جازباقپىن. كەشە ەلگە كەلىپ، مۇنى شەشۋدىڭ بىرنەشە جولىن كوردىم، تىڭدادىم. ۇيگە بارعان سوڭ قازاقستاندىق تەلەارنا باسشىلارىنا حات جازامىن. بىزگە كەرەگى - سول ءوزىڭىز ايتقان قازاقشا كينولار، كونسەرتتەر مەن مۋلتفيلمدەر عوي. ۇلكەندەرىمىز قازاقشا كينو كورگىسى كەلەدى. نەمەرەلەرى دە قازاقشا مۋلتفيلم كورىپ وسسە دەيدى. مەن قازىر وسىنداي دۇنيەلەر ىزدەپ، سۇراستىرىپ ءجۇرمىن. رۇقساتسىز تاراتۋعا استە بولمايدى. ول ءۇشىن الدىمەن كەلىسىمشارت جاساسۋ كەرەك. قازاقستاندىق تەلەارنالاردىڭ ەفيردەن تالاي جىل بۇرىن كورسەتىلگەن، ارحيۆكە سالىپ تاستاعان ەسكى دۇنيەلەرى بىزگە جارايتىن ەدى. وسى جاعىنان تەلەارنانى تىزگىندەپ وتىرعان باۋىرلار بىزگە كومەكتەسىپ جىبەرسە دەيمىن.
- بۇل ماسەلە وڭىنان شەشىلەدى دەپ ويلايمىز! اڭگىمەلەسكەنىڭىزگە راحمەت!
سۇحباتتاسقان
ءاليا تىلەۋجان قىزى
«تۇركىستان» گازەتى