رەسەيدە مي-8 تىكۇشاعى جوعالىپ كەتتى

استانا. KAZINFORM - كامچاتكادا «ۆيتياز-ايەرو» اۋە كومپانياسىنىڭ مي-8 تىكۇشاعى جوعالىپ كەتتى. بۇل تۋرالى ت ا س س اگەنتتىگىنە جەدەل قىزمەتتەر حابارلادى.

«كامچاتكادا «ۆيتياز-ايەرو» اۋە كومپانياسىنىڭ مي-8 تىكۇشاعى دىتتەگەن جەرىنە كەلمەدى دەگەن حابار ءتۇستى. الدىن الا مالىمەت بويىنشا، بورتتا ءۇش ەكيپاج مۇشەسى بار»، - دەپ حابارلادى ت ا س س اقپارات كوزىنە.

ونىڭ ايتۋىنشا، تىكۇشاقتى ىزدەۋ ءۇشىن اۋە كومپانياسىنىڭ تاعى ءبىر ۇشاعى كوتەرىلگەن، تاعى ءبىر مي-8 تىكۇشاعى مەن جەردەگى قۇتقارۋ توبى باعىت بويىنشا جۇرۋگە دايىن.

«جوعالعان تىكۇشاق ۆاچكاجەتس جانارتاۋى - نيكولايەۆكا اۋىلى باعىتىمەن ءجۇردى. قاشىقتىق 25 شاقىرىم»، - دەپ اتاپ ءوتتى جەدەل قىزمەت وكىلى.

فەدەرالدىق اۋە كولىگى اگەنتتىگىنىڭ مالىمەتىنشە، ۇشاقتا 22 ادام بولعان.

«كامچاتكا ولكەسىندە «ۆيتياز- اەرو» اۋە كومپانياسىنىڭ مي-8ت تىكۇشاعىن ىزدەۋ جۇمىستارى ءجۇرىپ جاتىر. تىكۇشاقتىڭ بورتىندا الدىن الا مالىمەت بويىنشا 22 ادام: 3 ەكيپاج مۇشەسى جانە 19 جولاۋشى بار»، - دەلىنگەن حابارلامادا.

اۆتور

ەلميرا ورالبايەۆا