رەسەيدە ايەلدەردىڭ جۇمىس كۇنىن ءبىر ساعاتقا قىسقارتۋ ۇسىنىلدى

استانا. KAZINFORM - ايەلدەر وتباسىنا كوبىرەك ۋاقىت ءبولۋ ءۇشىن جۇمىس كۇنىن كەم دەگەندە ءبىر ساعاتقا قىسقارتۋ كەرەك. مۇنداي پىكىردى مەملەكەتتىك دۋمانىڭ دەپۋتاتى يگور انتروپەنكو ءبىلدىردى، دەپ حابارلايدى تاسس.

يگور انتروپەنكونىڭ اتاپ وتۋىنشە، قازىر ءاربىر بالا كەم دەگەندە ءبىر قوسىمشا ءبىلىم بەرۋ ۇيىرمەسىنە نەمەسە سپورت سەكسياسىنا بارىپ ءجۇر، ال كەيبىر بالا بىرنەشەۋىنە قاتىسادى.

- كەشكى ساعات 18:00- دە جۇمىستان شىعىپ، بالالاردى ۇيىرمەگە اپارۋ وتە قيىن، ول كوبىنەسە ءبىر ۋاقىتتا، ال كەيبىرەۋلەرى ودان دا ەرتەرەك باستالادى. سونىڭ سالدارىنان بالالاردىڭ اناسى شارشايدى، بۇل وسكەلەڭ ۇرپاق ءۇشىن ەڭ جاقسى ۇلگى ەمەس. جاس قىزدار مۇنى قالامايتىنىن ايتىپ، قازىردىڭ وزىندە بالالى بولمايتىنىن مالىمدەپ جاتىر، - دەپ ءتۇسىندىردى دەپۋتات.

انتروپەنكو وتباسى، ءۇيى، بالا-شاعاسىنا بايلانىستى الاڭداۋشىلىق كەيدە ايەلدەردى جۇمىستان كەتۋگە ءماجبۇر ەتەتىنىن جانە بۇل بارىنە بىردەي جارامايتىنىن اتاپ ءوتتى. پارلامەنت مۇشەسىنىڭ اتاپ وتۋىنشە، ايەلدىڭ وتباسى مەن بالا-شاعاسى بولماسا دا، مىسالى، جۇمىسقا دايىندالۋ ءۇشىن كۇنىنە قوسىمشا ساعات قاجەت.

- ەر ادامعا قاراعاندا ايەلگە الدەقايدا كوپ ۋاقىت كەرەك. ءبىز ادامزاتتىڭ ەڭ ادەمى جاراتىلىسى تۋرالى ايتىپ وتىرمىز عوي! دەموگرافيانى كوتەرۋ ماسەلەسى بار، ال جاس قىز كۇنى بويى جۇمىستا بولىپ، ۇيىنە شارشاپ قايتسا، جەكە ءومىرىن قۇرۋعا قاشان ۇلگەرەدى؟ جالاقىنى ساقتاي وتىرىپ، نازىك جاندىلار ءۇشىن جۇمىس كۇنىن كەم دەگەندە ءبىر ساعاتقا قىسقارتۋ ورىندى جانە ۋاقىتىلى دەپ سانايمىن، - دەپ تۇيىندەدى ءسوزىن دەپۋتات.

اۆتور

زارينا تۋعانبايەۆا