رەسەيدە 27 مىڭ ۆولت توق سوققان ەر ادام ءتىرى قالدى

استانا. KAZINFORM - رەسەيدىڭ ۆولگوگراد قالاسىندا دارىگەرلەر 27 مىڭ ۆولت توق سوققان ناۋقاستى امان الىپ قالدى.

ۆولگوگراد وبلىسى دەنساۋلىق ساقتاۋ مينيسترلىگى باسپا ءسوز قىزمەتىنىڭ حابارلاۋىنشا، كۇيىك ورتالىعىنداعى دارىگەرلەر مەن مەدبيكەلەر ونىڭ ءومىرى ءۇشىن بىرنەشە اي بويى كۇرەسكەن. قايعىلى وقيعا 2024 -جىلدىڭ شىلدە ايىنىڭ باسىندا بولعان.

ساراتوۆ وبلىسىنىڭ قىرىق جاستاعى تۇرعىنى ۆولگوگرادتاعى قۇرىلىس الاڭىندا اۋىر جاراقات الدى: مەتالل كونسترۋكتسيالارىن ءتۇسىرۋ كەزىندە ەر ادامدى توق سوقتى.

- جۇك كولىكتەرى كەلدى، باسپالداق مارشتارىن شەشىپ، سىمارقانداردى بەرۋ كەرەك بولدى. مەن سىمارقاندى الىپ ەدىم، ول كەرنەۋلى بولعان ەكەن. قاتتى توق سوعىپ، جەرگە قۇلادىم»، - دەدى ناۋقاس.

ول دەرەۋ مەملەكەتتىك دەنساۋلىق ساقتاۋ مەكەمەسىنىڭ جانساقتاۋ بولىمىنە جەتكىزىلدى. وسىدان كەيىن كوپتەگەن كۇيىك شالعان ەر ادام مامانداندىرىلعان مەديتسينالىق كومەك الۋ ءۇشىن «گ ك ب س م پ 25» مەكەمەسىنە قاراستى قالاداعى جالعىز كۇيىك شالۋ ورتالىعىنا جاتقىزىلدى.

ەمدەۋشى دارىگەر كۇيىك حيرۋرگى يگور گۋرينوۆتىڭ ايتۋىنشا، ناۋقاس شامامەن 27 مىڭ ۆولت توق سوققاننان كەيىن ەلەكتر جاراقاتىمەن وتە اۋىر جاعدايعا ءتۇستى.

«توق باسىنان ىشكى مۇشەلەرىنە ءوتىپ، اياعىنان ءبىر-اق شىققان. مۇنداي جاراقات العان ادام كوپ جاعدايدا ءتىرى قالمايتىن ەدى. تەكسەرۋ قورىتىندىسى، سونىڭ ىشىندە كت بويىنشا، ىشكى اعزالارى - جۇرەك، بۇيرەك، وكپە، باۋىرىنا زاقىم كەلىپ، ەكى اياعىن قاتتى كۇيىك شالعان. كومبۋستيولوگيالىق، رەانيماتسيالىق بريگادالارىنىڭ كەرەمەت كۇش-جىگەرىنىڭ ارقاسىندا ناۋقاستىڭ جانىن ساقتاپ قالدىق، ءبىراق باستاپقىدا ونى قۇتقارا المايمىز دەپ ويلادىق. الايدا، ءبىز مويىعان جوقپىز، ناۋقاستىڭ ءومىرى ءۇشىن كۇرەس جالعاستى»، - دەپ باياندادى كومبۋستيولوگيا (كۇيىك) ءبولىمىنىڭ مەڭگەرۋشىسى ۆالەري تاتارچيەۆسكي.

ناۋقاس بولىمشەدە 40 تاۋلىك جاتتى. وسى ۋاقىت ىشىندە وعان بىرنەشە كۇردەلى وتا جاسالدى. ونىڭ ىشىندە پلاستيكالىق جانە رەكونسترۋكتيۆتىك وتالار بار. شىلدە ايىنىڭ سوڭىنا قاراي دارىگەرلەر نەگىزگى قاجەتتى شارالاردى اياقتاپ، ناۋقاس قالپىنا كەلە باستادى. قازىر ونىڭ ومىرىنە قاۋىپ ءتونىپ تۇرعان جوق. ول ۇيىنە شىعارىلدى.

اۆتور
ەركەجان سماعۇلوۆا