رەسەي ترامپتىڭ ۋكرايناداعى قاقتىعىستى رەتتەۋ تۋرالى مالىمدەمەسىن نازارعا الدى

استانا. KAZINFORM - كرەمل ا ق ش پرەزيدەنتى دونالد ترامپتىڭ ۋكرايناداعى قاقتىعىستى رەتتەۋ مەرزىمدەرىن قىسقارتۋ جانە جوعارعى دەڭگەيدەگى بايلانىستارعا قىزىعۋشىلىقتىڭ جوقتىعى تۋرالى مالىمدەمەسىمەن تانىستى، دەپ حابارلايدى تاسس.

- ءبىز ترامپتىڭ كەشەگى مالىمدەمەسىن نازارعا الدىق، - دەپ جاۋاپ بەردى رەسەي پرەزيدەنتىنىڭ باسپا ءسوز حاتشىسى دميتري پەسكوۆ.

امەريكالىق باسشىنىڭ سوزدەرىنە باعا بەرگىسى كەلمەيتىنىن ايتتى.

14- شىلدەدە ترامپ ەگەر ماسكەۋ مەن ۆاشينگتون 50 كۇن ىشىندە رەسەي مەن ۋكراينا اراسىنداعى قاقتىعىستى رەتتەۋ تۋرالى كەلىسىمگە كەلە الماسا، رەسەي مەن ونىڭ ساۋدا سەرىكتەستەرى ءۇشىن يمپورتتىق باج سالىعىن شامامەن 100 پايىزعا دەيىن ەنگىزۋدى جوسپارلاپ وتىرعانىن مالىمدەدى.

ودان بۇرىن، شوتلانديادا ۇلى بريتانيانىڭ پرەمەر-ءمينيسترى كير ستارمەرمەن بىرلەسكەن باسپا ءسوز كونفەرەنسياسىندا ا ق ش پرەزيدەنتى 50 كۇندىك مەرزىمدى قىسقارتىپ، ۆلاديمير پۋتينگە دۇيسەنبىدەن باستاپ 10-12 كۇن ىشىندە رەسەي مەن ۋكراينا اراسىنداعى قاقتىعىستى رەتتەۋدى ۇسىنعانىن ايتتى.