قازاقستانعا قاۋىپ بار ما؟
دەنساۋلىق ساقتاۋ مينيسترلىگىنىڭ حابارلاۋىنشا، شەكاراداعى بارلىق وتكىزۋ بەكەتىندە سانيتاريالىق-كارانتيندىك باقىلاۋ جۇرگىزىلىپ جاتىر. دەنە قىزۋى كوتەرىلگەن نەمەسە اۋرۋ بەلگىلەرى بايقالعان جولاۋشىلار انىقتالماعان.
- ينفەكسيانىڭ قازاقستانعا اكەلىنۋ قاۋپى تومەن دەڭگەيدە قالىپ وتىر. رەسمي اقپارات تۇسكەن سايىن جاعدايعا بەرىلەتىن باعا مەن قابىلدانىپ جاتقان شارالار ناقتىلانادى، - دەلىنگەن ۆەدومستۆو حابارلاماسىندا.
دەنساۋلىق ساقتاۋ مينيسترلىگى شەتەلدەن ساپارلاپ كەلگەن قازاقستاندىقتارعا اۋرۋ بەلگىلەرى بايقالعان جاعدايدا دارىگەرگە قارالىپ، قاي جەرلەردە بولعانىن حابارلاۋدى ۇسىنادى.
يركۋتسكىدەگى وقيعا
2-قازانعا قاراعان ءتۇنى رەسەيدە يركۋتسك وباعا قارسى ينستيتۋتىنىڭ قىزمەتكەرى، 28 جاستاعى داريا شيپيلوۆا شەلەحوۆ اۋداندىق اۋرۋحاناسىندا قايتىس بولدى.
بۇعان دەيىن ب ا ق- تا ونىڭ 25-قىركۇيەكتە زەرتحانادا وكپە وباسىنىڭ قوزدىرعىشى بار سىناۋىق سىنىپ كەتكەننەن كەيىن ىندەت جۇقتىرۋى مۇمكىن دەگەن نۇسقا تاراعان. الايدا بۇل بولجام رەسمي تۇردە راستالعان جوق.
مەديتسينا ماماندارى مارقۇممەن بايلانىستا بولعان 197 ادامدى باقىلاۋعا الدى، ولاردىڭ 189 ى اۋرۋحاناعا جاتقىزىلدى. بيلىكتىڭ مالىمەتىنشە، ولاردان اۋرۋ بەلگىلەرى انىقتالماعان، جۇرگىزىلگەن تالداۋلاردىڭ ناتيجەسى دە تەرىس بولعان.
الايدا «يزۆەستيا» باسىلىمى دەرەككوزگە سىلتەمە جاساپ، اۋرۋحاناعا جاتقىزىلعانداردىڭ كەيبىرىنەن جەكەلەگەن بەلگىلەر بايقالعانىن حابارلادى.
ناۋقاس قايتىس بولعاننان كەيىن شەلەحوۆ اۋرۋحاناسى كارانتين رەجيمىنە كوشىرىلدى. يركۋتسكىگە رەسەيدىڭ تۇتىنۋشىلاردىڭ قۇقىقتارىن قورعاۋ جانە ادام ءال-اۋقاتىن باقىلاۋ جونىندەگى فەدەرالدىق قىزمەتىنىڭ باسشىسى اننا پوپوۆا باردى.
بۇل وبا ما؟
ازىرگە ناقتى دياگنوز قويىلعان جوق. 4-قازان، جەكسەنبى كۇنى روسپوترەبنادزور يركۋتسك وبلىسىنداعى جاعداي تۇراقتى ەكەنىن جانە وبا دەرەگى انىقتالماعانىن مالىمدەدى. ۆەدومستۆو ءولىم سەبەبىن ەتيولوگياسى انىقتالماعان پنيەۆمونيا دەپ اتادى.
بۇعان دەيىن بۋرياتيا باسشىسى الەكسەي سىدەنوۆ ولىمگە وبا سەبەپ بولۋى مۇمكىن ەكەنىن ايتقان ەدى. كەيىن ول بۇل تۇجىرىمىن وزگەرتتى.
ال وباعا قارسى ينستيتۋت جاعدايعا قاتىستى ازىرگە رەسمي تۇسىنىكتەمە بەرگەن جوق.
بۇل وقيعاعا دەيىن رەسەيدە ادام اراسىندا وبا جۇقتىرۋدىڭ سوڭعى دەرەگى 2016-جىلى التاي رەسپۋبليكاسىندا تىركەلگەن. ول كەزدە سۋىرمەن بايلانىستا بولعان 10 جاستاعى بالا اۋىرعان. دارىگەرلەر ونىڭ ءومىرىن ساقتاپ قالدى.
وكپە وباسى تەز ءورشيدى. الايدا اۋرۋ ەرتە انىقتالعان جاعدايدا ونى انتيبيوتيكتەرمەن ەمدەۋگە بولادى.