رەسەي پرەزيدەنتى ۆلاديمير پۋتين رەسمي ساپارمەن قىتايعا كەلدى

استانا. KAZINFORM - رەسەي فەدەراتسياسىنىڭ پرەزيدەنتى ۆلاديمير پۋتين بەيسەنبى كۇنى تاڭەرتەڭ قىتاي حالىق رەسپۋبليكاسىنىڭ استاناسى بەيجىڭگە ەكى كۇندىك مەملەكەتتىك ساپارمەن كەلدى.

«بۇل ۆ. پۋتيننىڭ رەسەي پرەزيدەنتى قىزمەتىنە جاڭا مەرزىمگە كىرىسكەننەن كەيىنگى العاشقى مەملەكەتتىك ساپارى بولماق»، - دەپ حابارلادى قىتاي سىرتقى ىستەر مينيسترلىگىنىڭ رەسمي وكىلى ۆان ۆەنبين.

ونىڭ ايتۋىنشا، ساپار بارىسىندا ق ح ر ءتوراعاسى شي جينپيڭ پرەزيدەنت پۋتينمەن قىتاي مەن رەسەي اراسىنداعى ديپلوماتيالىق قارىم-قاتىناستاردىڭ ورناتىلعانىنا 75 جىل تولۋى اياسىنداعى ەكىجاقتى قارىم-قاتىناس ماسەلەلەرى، ءتۇرلى سالالارداعى ىنتىماقتاستىق، سونداي-اق ءوزارا مۇددەنى قوزعايتىن حالىقارالىق جانە ايماقتىق ماسەلەلەر بويىنشا پىكىر الماسادى.

ت ا س س اگەنتتىگىنىڭ حابارلاۋىنشا، رەسەي پرەزيدەنتى بەيجىڭ مەن حاربينگە بارادى. قىتاي استاناسىندا رەسەي فەدەراتسياسى مەن قىتاي حالىق رەسپۋبليكاسى باسشىلارىنىڭ كەلىسسوزدەرى تار جانە كەڭەيتىلگەن قۇرامدا وتەدى. رەسەي دەلەگاتسياسىنىڭ قۇرامىندا بەس ۆيتسە-پرەمەر، ەكونوميكا، ديپلوماتيالىق جانە قاۋىپسىزدىك ۆەدومستۆولارىنىڭ باسشىلارى، رەسەي تەمىر جولدارى، روساتوم جانە روسكوسموس باسشىلارى، سونداي-اق رەسەيدىڭ 20 ايماعىنىڭ باسشىلىعى بار.

حاربين قالاسىندا (حيلۋڭجياڭ پروۆينتسياسىنىڭ اكىمشىلىك ورتالىعى) پۋتين VIII «قىتاي- رەسەي» ەكسپو كورمەسىنىڭ اشىلۋ سالتاناتىنا جانە ايماقارالىق ىنتىماقتاستىق جونىندەگى IV رەسەي-قىتاي فورۋمىنا قاتىسادى.

ق ح ر باس كەدەن باسقارماسىنىڭ مالىمەتىنشە، قىتاي مەن رەسەي اراسىنداعى تاۋار اينالىمى 2023 -جىلى 240 ميلليارد دوللاردان استى.

اۆتور
زارينا تۋعانبايەۆا