رەسەي مەن ۋكراينا كەلىسسوزىنىڭ ەكىنشى راۋندى ىستانبۇلدا ءوتۋى مۇمكىن

استانا. KAZINFORM - ر ف سىرتقى ىستەر ءمينيسترى سەرگەي لاۆروۆ رەسەي بارلىق اسپەكتىلەر بويىنشا ءوز ۇستانىمىن بىلدىرەتىن ءتيىستى مەموراندۋم ازىرلەگەنىن جانە ونى 2 - ماۋسىمدا ۋكراينالىق تاراپقا ىستانبۇلدا بەرۋگە دايىن ەكەنىن مالىمدەدى، دەپ حابارلايدى Kazinform ر ف سىرتقى ساياسي ۆەدومستۆوسىنىڭ سايتىنا سىلتەمە جاساپ.

رەسەي پرەزيدەنتىنىڭ كومەكشىسى ۆ. مەدينسكي باستاعان رەسەيلىك دەلەگاتسيا كەلەسى دۇيسەنبى، 2 -ماۋسىمدا ىستانبۇلدا قايتا جالعاساتىن تىكەلەي كەلىسسوزدىڭ ەكىنشى راۋندى بارىسىندا ۋكراينا دەلەگاتسياسىنا وسى مەموراندۋمدى ۇسىنۋعا جانە قاجەتتى تۇسىنىكتەمەلەردى بەرۋگە دايىن ەكەنى ايتىلعان.

- ا ق ش، ساۋد ارابياسى جانە تۇركيانىڭ قولداۋىمەن رەسەي- ۋكراينا تىكەلەي كەلىسسوزىن قايتا باستاۋعا جاعداي جاساۋ مۇمكىن بولدى. ءبىرىنشى راۋند اعىمداعى جىلدىڭ 16- مامىرىندا ىستانبۇلدا ءوتتى، - دەپ ەسكە سالدى س. لاۆروۆ.

ول سونداي-اق سول جەردە قول جەتكىزىلگەن كەلىسىمدەرگە سايكەس «1000 ادامعا 1000» فورماتىندا تۇتقىندار الماسۋ جۇرگىزىلگەنىن اتاپ ءوتتى. سول كەزدە ىستانبۇلدا ماسكەۋ مەن كيەۆ تۇراقتى رەتتەۋگە قول جەتكىزۋ ءۇشىن ءار تاراپتىڭ ۇستانىمىن كورسەتەتىن قۇجاتتار ازىرلەنەتىنى كەلىسىلدى.
ر ف پرەزيدەنتىنىڭ كومەكشىسى ۆ. مەدينسكي سارسەنبى كۇنى ۋكراينا قورعانىس ءمينيسترى ر. ۋمەروۆكە مەموراندۋمدار الماسۋ ءۇشىن كەزدەسۋدىڭ ناقتى كۇنى مەن ورنىن ۇسىنعانىن حابارلادى.

ول سونداي-اق اتىستى ىقتيمال توقتاتۋ تۋرالى پاكەتتىك كەلىسىمنىڭ ءاربىر تارماعى بويىنشا مازمۇندى تالقىلاۋدى باستاۋعا دايىن ەكەنىن اتاپ ءوتتى. ولار راستاۋدى كۇتۋدە جانە وزدەرى بەلگىلەگەن كۇنى جەكە كەزدەسۋگە جانە جۇمىسقا كىرىسۋگە دايىن.

ر ف س ءى م رەسمي وكىلى ماريا زاحاروۆا رەسەيدىڭ كيەۆپەن رەتتەۋ تۋرالى مەموراندۋم جوبالارىن الماسۋدا باسقا ەلدەرمەن دەلدالدىق كەلىسىمى جوق ەكەنىن مالىمدەدى.

ءوز كەزەگىندە ۋكراينا قورعانىس ءمينيسترى رۋستەم ۋمەروۆ الەۋمەتتىك جەلىدەگى پاراقشاسىندا رەسەيلىك تاراپقا ۋكراينانىڭ ۇستانىمىن كورسەتەتىن قاقتىعىستى رەتتەۋ تۋرالى مەموراندۋم جوباسىن تاپسىرعانىن حابارلادى. ول سونداي- اق ۋكراينانىڭ اتىستى تولىق جانە ءسوزسىز توقتاتۋعا جانە ودان ءارى ديپلوماتيالىق جۇمىسقا دايىندىعىن راستايتىنىن جازدى.

بۇعان دەيىن 15-مامىر رەسەي-ۋكراينا قاقتىعىسى تاريحىنداعى بەتبۇرىس كەزەڭى بولۋى مۇمكىن ەكەنىن جازعان بولاتىنبىز.

ىستانبۇلدا جوسپارلانعان رەسەي-ۋكراينا كەلىسسوزى مەملەكەت باسشىلارىنىڭ قاتىسۋىنسىز باستالدى.