رەسەي مەن ۋكراينا بىتىمگەرشىلىككە قاتىستى تۇسىنىكتەمە بەردى
استانا. KAZINFORM - ەر- ريادتاعى ءۇش كۇندىك كەلىسسوزدەن كەيىن اق ءۇي قارا تەڭىزدەگى رەسەي مەن ۋكراينا اراسىندا بىتىمگەرشىلىك تۋرالى جاريالادى، دەپ حابارلايدى euronews.
ا ق ش- تىڭ مالىمدەۋىنشە، ۋكراينا مەن رەسەي قارا تەڭىزدەگى اتىستى توقتاتۋ تۋرالى ۇسىنىستى قولدايدى.
سەيسەنبىدە جاريالانعان ەكى مالىمدەمەدە اق ءۇي كيەۆ پەن ماسكەۋ «قاۋىپسىز تاسىمالداۋدى قامتاماسىز ەتۋگە، كۇش قولدانۋدى بولدىرماۋعا جانە كوممەرتسيالىق كەمەلەردى قارا تەڭىزدە اسكەري ماقساتتا پايدالانۋعا جول بەرمەۋگە كەلىستى» دەپ حابارلادى.
بۇل كەلىسىمگە ساۋد ارابياسىنىڭ استاناسى ەر- ريادتاعى ا ق ش پەن ەكى قارسىلاس اراسىنداعى ءۇش كۇندىك كەلىسسوزدەن كەيىن قول جەتكىزىلدى.
الايدا كرەملدىڭ مالىمدەمەسىندە كەمە قاتىناسى قاۋىپسىزدىگى تۋرالى كەيبىر شەكتەۋلەر الىنىپ تاستالعاننان كەيىن عانا كەلىسسوز كۇشىنە ەنەتىنى كورسەتىلگەن. شارتتاردىڭ ىشىندە ازىق-تۇلىكپەن (ونىڭ ىشىندە بالىق ونىمدەرىمەن) جانە تىڭايتقىشتارمەن حالىقارالىق ساۋدا وپەراتسيالارىن قامتاماسىز ەتۋگە تارتىلعان روسسەلحوزبانك پەن وزگە دە قارجى ۇيىمدارىنان سانكسيالاردى الىپ تاستاۋ، ولاردى SWIFT- كە قوسۋ، قاجەتتى كوررەسپوندەنتتىك شوتتار اشۋ، ازىق- تۇلىك پەن تىڭايتقىشتاردى ءوندىرۋشى جانە ەكسپورتتاۋشى كومپانيالاردان سانكسيالاردى الىپ تاستاۋ، پورتتاردا قىزمەت كورسەتۋگە شەكتەۋلەر مەن سانكسيالاردى الىپ تاستاۋ، سونداي-اق رەسەيگە اۋىلشارۋاشىلىق تەحنيكاسىن جانە ازىق- تۇلىك پەن تىڭايتقىشتار وندىرىسىنە قاتىساتىن باسقا تاۋارلاردى جەتكىزۋگە شەكتەۋلەردى الىپ تاستاۋ تۋرالى ايتىلعان.
ۋكراينا قورعانىس ءمينيسترى رۇستەم ۋمەروۆ قارا تەڭىزدە كەمەلەردىڭ قاۋىپسىز قوزعالىسى تۋرالى ماسەلەگە نازار اۋداردى.
- رەسەي اسكەري كەمەلەرىنىڭ قارا تەڭىزدىڭ شىعىس بولىگىنەن تىس جەرلەرگە قوزعالىسى وسى كەلىسىمدەردىڭ رەتىن بۇزۋ، قارا تەڭىزدە ەركىن ءجۇزۋدى قامتاماسىز ەتۋ جونىندەگى مىندەتتەمەلەردى بۇزۋ جانە ۋكراينانىڭ ۇلتتىق قاۋىپسىزدىگىنە قاتەر ءتوندىرۋ رەتىندە قاراستىرىلادى. بۇل جاعدايدا ۋكراينانىڭ ءوزىن-ءوزى قورعاۋعا تولىق قۇقىعى بولادى، - دەپ جازدى ۋمەروۆ.
ۋكراينا پرەزيدەنتى اق ءۇي جاريالاعان مالىمدەمەگە تۇسىنىكتەمە بەرىپ، كەيبىر مالىمەتتەردى اتاپ ءوتتى. زەلەنسكيدىڭ ايتۋىنشا، ەركىن كەمە قاتىناسى تۋرالى تارماق مۇمكىندىگىنشە كەڭىرەك ءتۇسىندىرىلۋى كەرەك.
- تەڭىزدە بەيبىتشىلىك پەن ەركىن كەمە قاتىناسى تۋرالى ايتاتىن بولساق، ينفراقۇرىلىم تۋرالى دا ايتىپ وتىرمىز. ونىڭ قالاي جۇزەگە اساتىنىن كورەيىك، - دەدى ول.
بۇعان قوسا، ول ۋكراينا ا ق ش- قا شابۋىلداردان قورعالۋى ءتيىس نىساندار ءتىزىمىن بەرگەنىن راستادى.
ۋكراينا پرەزيدەنتى رەسەي مەن ۋكراينانىڭ ءار تاراپقا ماڭىزدى ءبىر تارماعى بار ەكەنىنە نازار اۋداردى. ۋكراينا اسكەري تۇتقىنداردى بوساتۋ تۋرالى، ال رەسەي كەيبىر سانكتسيالاردى الىپ تاستاۋ تۋرالى ءوتىنىش جاساعان.
سەيسەنبى كۇنى ساۋد ارابياسىنىڭ استاناسى ەر-ريادتا ۋكراينا مەن ا ق ش دەلەگاتسيالارى اراسىنداعى كەلىسسوزدەردىڭ جاڭا راۋندى اياقتالعانىن جازعان بولاتىنبىز.