رەسەي مەن ۋكراينا 115-كە 115 تۇتقىن الماستى

استانا. KAZINFORM - سەنبى كۇنى رەسەي مەن ۋكراينا اسكەري تۇتقىندارمەن الماسىپ، ءارقايسىسى 115 ادامدى ۇيىنە قايتاردى. ورالعان ۋكراينداردىڭ اراسىندا «ازوۆستالدى» قورعاعان ونداعان جاۋىنگەر، ورىستاردىڭ اراسىندا كۋرسك وبلىسىندا بورىشىن وتەپ جۇرگەن اسكەري مەرزىمدى قىزمەتكەرلەر بار، دەپ جازادى BBC.

مامىلە بىرىككەن اراب امىرلىكتەرىنىڭ دەلدالدىعىمەن جاسالدى.

ب ا ءا وكىلدەرى بۇل 2022 -جىلدان بەرى تاراپتار اراسىنداعى 55- اسكەري تۇتقىن الماسۋ ەكەنىن جانە ونىڭ كوپشىلىگى ابۋ-ءدابيدىڭ دەلدالدىعىمەن بولعانىن اتاپ ءوتتى.

سەنبىگە تۇتقىن الماسۋ جوسپارلانعانىن سول كۇنى ءبىرىنشى بولىپ Reuters حابارلادى. وعان ب ا ءا وكىلى انونيم تۇسىنىكتەمە بەرگەن. ءبىر ساعاتقا جەتەر-جەتپەس ۋاقىت وتكەندە رەسەي فەدەراتسياسى قورعانىس مينيسترلىگى ايىرباس جاسالعانىن راستادى.

ۆەدومستۆونىڭ مالىمەتىنشە، ورالعان 115 ورىستىڭ ءبارى - كۋرسك وبلىسىنداعى وپەراتسيا كەزىندە تۇتقىنعا الىنعاندار.

قازىر ولار بەلارۋس ەلىندە، ءبىراز ەم الىپ، وڭالتۋدان وتكەننەن كەيىن ۇيىنە جەتكىزىلەدى.

رەسەيلىك «ريا-نوۆوستي» اگەنتتىگى ورىستاردىڭ ورالعانى تۋرالى ۆيدەو جاريالادى.

ۇيگە ورالعان ۋكراينداردىڭ اراسىندا شەكاراشىلار، تەڭىزشىلەر، چەرنوبىل اتوم ستانسياسىنىڭ كۇزەت گارنيزونىنان التى ۇلتتىق گۆارديا ساربازى جانە ماريۋپولدىڭ 82 قورعاۋشىسى بار، ونىڭ 50 ى «ازوۆستالدى» قورعاۋ كەزىندە تۇتقىنعا تۇسكەن.

«ۋكراينسكايا پراۆدا» باسىلىمىنىڭ حابارلاۋىنشا، ورالعان ادامداردىڭ توعىزىن رەسەي سوتى ءبىرقاتار باپتار بويىنشا سوتتاعان.

وسىعان سۇيەنە وتىرىپ، رەسەيدە كەم دەگەندە توعىز ادام اسكەري تۇتقىن ەمەس، قىلمىسكەر رەتىندە قاماۋدا بولدى دەپ بولجاۋعا بولادى.

ب ا ءا شەنەۋنىكتەرىنىڭ ايتۋىنشا، سوعىس باستالعاننان بەرى ۋكراينادا ابۋ-ءدابيدىڭ دەلدالدىعىمەن 1788 ادام ايىرباستالعان.