رەسەي ءبىر اي بويى ب ۇ ۇ قاۋىپسىزدىك كەڭەسىنە ءتوراعا بولادى

استانا. KAZINFORM - ب ۇ ۇ قاۋىپسىزدىك كەڭەسىنە ءتوراعالىق ءبىر ايعا رەسەيگە ءوتتى. سوڭعى رەت رەسەي فەدەراتسياسى بۇكىلالەمدىك ۇيىمنىڭ نەگىزگى قۇرىلىمىنىڭ جۇمىسىن 2023 -جىلدىڭ ساۋىرىندە ۇيلەستىرگەن بولاتىن، دەپ حابارلايدى تاسس اقپارات اگەنتتىگى.

رەسەي باستاعان قاۋىپسىزدىك كەڭەسىنىڭ ءبىرىنشى وتىرىسى دۇيسەنبى كۇنى نيۋ-يورك ۋاقىتىمەن تاڭەرتەڭ وتەدى. وندا قاۋىپسىزدىك كەڭەسىنىڭ الداعى ايعا ارنالعان جۇمىس باعدارلاماسى بەكىتىلەدى.

ودان كەيىن رەسەي فەدەراتسياسىنىڭ تۇراقتى وكىلى ۆاسيلي نەبەنزيا باسپا ءسوز ءماسليحاتىن، كەيىن ب ۇ ۇ باس اسسامبلەياسىنا مۇشە مەملەكەتتەر ءۇشىن جابىق بريفينگ وتكىزەدى.

رەسەي ءتوراعالىعىنىڭ ورتالىق ءىس-شارالارى ايدىڭ ورتاسىندا وتەدى دەپ شامالانىپ وتىر جانە ولار نەعۇرلىم ءادىل، دەموكراتيالىق جانە تۇراقتى الەمدىك ءتارتىپتى قۇرۋعا، تاياۋ شىعىستاعى جانجالدى رەتتەۋگە، سونداي- اق ب ۇ ۇ-نىڭ ۇ ق ش ۇ، ت م د جانە شاڭحاي ىنتىماقتاستىق ۇيىمىمەن ىنتىماقتاستىققا ارنالعان.

بۇعان دەيىن رەسەي سىرتقى ىستەر ءمينيسترى سەرگەي لاۆروۆ مالىمدەگەندەي، سوڭعى تاقىرىپ قولداۋ تاۋىپ، وسى وتىرىسقا ۇ ق ش ۇ باس حاتشىسى يمانعالي تاسماعامبەتوۆ ءسوز سويلەيدى.

جالپى العاندا، ءبىر ايدىڭ ىشىندە ب ۇ ۇ قاۋىپسىزدىك كەڭەسى جيىرماعا جۋىق اشىق وتىرىس پەن جابىق كونسۋلتاتسيا وتكىزەدى.

ب ۇ ۇ قاۋىپسىزدىك كەڭەسى 15 مۇشەدەن تۇرادى، ونىڭ ىشىندە بەس تۇراقتى مۇشە – ۇلى بريتانيا، قىتاي، رەسەي، ا ق ش جانە فرانسيا. بەسەۋىنىڭ ءارقايسىسىنىڭ ۆەتو قۇقىعى بار. ب ۇ ۇ قاۋىپسىزدىك كەڭەسىنىڭ ون ۋاقىتشا مۇشەسى - الجير، گايانا، مالتا، موزامبيك، كورەيا رەسپۋبليكاسى، سلوۆەنيا، سەررا-لەونە، شۆەيتساريا، ەكۆادور جانە جاپونيا. دۇنيەجۇزىلىك ۇيىمنىڭ جارعىسىنا سايكەس، قاۋىپسىزدىك كەڭەسى بەيبىتشىلىك پەن حالىقارالىق قاۋىپسىزدىكتى ساقتاۋعا جاۋاپتى جانە ب ۇ ۇ-عا مۇشە بارلىق ەلدەر ونىڭ شەشىمدەرىنە باعىنۋعا مىندەتتى.

قاۋىپسىزدىك كەڭەسىندە ۇسىنىلعان مەملەكەتتەر ءوز جۇمىسىن اعىلشىن ءتىلىنىڭ الفاۆيت ءتارتىبى بويىنشا كەزەكپەن جۇرگىزەدى. ەلدىڭ قاۋىپسىزدىك كەڭەسىنە ءتوراعالىعى ءبىر كۇنتىزبەلىك ايعا سوزىلادى. ماۋسىم ايىندا بۇل فۋنكسيالاردى كورەيا رەسپۋبليكاسى اتقاردى، ال تامىزدا سەررا-لەونە قاۋىپسىزدىك كەڭەسىنىڭ جۇمىسىن باسقارادى.

Kazinform ءۇشىن ارنايى تاسس سەرىكتەس اگەنتتىگى ۇسىنعان.

اۆتور

زارينا تۋعانبايەۆا