جوبانىڭ ماقساتى - قايتا وڭدەۋگە كەلمەيتىن پوليەتيلەن مەن پوليپروپيلەن قالدىقتارىنان كەروسين جانە ديزەل وتىنىنا جارامدى كومىرسۋتەك فراكتسيالارىن الۋ. عالىمدار بۇل تەحنولوگيانى بىرنەشە جىلدان بەرى «ونيۋم پليۋس» كومپانياسىمەن بىرگە دامىتىپ كەلەدى.
تەحنولوگيا بىرنەشە كەزەڭنەن تۇرادى. الدىمەن پلاستيك جوعارى تەمپەراتۋرادا وتتەگىسىز ورتادا پيروليزدەنەدى. سونىڭ ناتيجەسىندە پيروليز مايى تۇزىلەدى. الايدا ونى قوزعالتقىشقا بىردەن قۇيۋعا بولمايدى: قۇرامىندا تۇراقسىز قوسىلىستار كوپ بولعاندىقتان، شيكىزاتتى قوسىمشا كاتاليتيكالىق وڭدەۋدەن وتكىزۋ قاجەت.
نوۆوسىبىرلىك عالىمداردىڭ نەگىزگى مىندەتى وسى كەزەڭگە ءتيىمدى كاتاليزاتور تاڭداۋ بولعان. سوڭعى تاجىريبەلەردە قىمبات باعالى مەتالداردى قاجەت ەتپەيتىن نيكەل نەگىزىندەگى جۇيەلەر جاقسى ناتيجە كورسەتكەن. زەرتتەۋشىلەر مۇنداي كاتاليزاتورلاردىڭ پيروليز مايىن وڭدەپ، تومەن تەمپەراتۋرادا قاسيەتىن جوعالتپايتىن كەروسين جانە ديزەل فراكتسيالارىن الۋعا مۇمكىندىك بەرەتىنىن حابارلادى.
بۇعان دەيىن ۋنيۆەرسيتەت زەرتحاناسىندا پلاستيكتەن الىنعان پيروليز ونىمىنەن العاشقى تاجىريبەلىك ءۇش ليتر كەروسين وندىرىلگەن ەدى. كەيىنگى جۇمىستاردا الىناتىن وتىننىڭ تومەن تەمپەراتۋراداعى قاسيەتتەرى دە جاقسارتىلعان: زەرتتەۋشىلەر ءونىمنىڭ لايلانۋ تەمپەراتۋراسىن مينۋس 20 گرادۋستان تومەن، كەيبىر جاعدايدا مينۋس 40 گرادۋسقا دەيىن تۇسىرە العان.
كاتاليزاتوردىڭ قۇرامىن پيروليز مايىنىڭ ەرەكشەلىگىنە قاراي وزگەرتۋگە بولادى. وسىلايشا تەحنولوگيانى قاجەتتى ونىمگە، سونىڭ ىشىندە اۆياتسيالىق كەروسينگە جاقىن فراكتسيالار الۋعا بەيىمدەۋ كوزدەلىپ وتىر.
دەگەنمەن ازىرلەمە تولىق دايىن دەپ ايتۋعا ءالى ەرتە. كاتاليزاتوردىڭ باستاپقى نۇسقاسى نەگىزىنەن پوليەتيلەن مەن پوليپروپيلەننەن تۇراتىن باقىلاناتىن شيكىزاتتا سىنالعان. ەندىگى مىندەت - ونى قالالىق قوقىس پوليگوندارىنان الىنعان ارالاس پلاستيكتەن وندىرىلگەن ناقتى پيروليز مايىنا بەيىمدەۋ.
مۇنداي شيكىزاتتىڭ قۇرامى الدەقايدا كۇردەلى. ونىڭ ىشىندە ءارتۇرلى پلاستيك، قوسپالار جانە بوگدە حيميالىق زاتتار بولۋى مۇمكىن. سوندىقتان مودەلدىك شيكىزاتقا ءتيىمدى بولعان كاتاليزاتور ناقتى وندىرىستىك قالدىقتار ءۇشىن قايتا جەتىلدىرىلۋى قاجەت.
سونىمەن بىرگە تەحنولوگيا وندىرىستىك دەڭگەيگە بىرتىندەپ شىعارىلىپ جاتىر. «ونيۋم پليۋس» كاسىپورنىندا پيلوتتىق قوندىرعىدا ۇزاق مەرزىمدى سىناقتار جۇرگىزىلسە، ن گ ۋ زەرتحاناسىندا عالىمدار كاتاليزاتوردىڭ قۇرامى، تەمپەراتۋرا، قىسىم جانە باسقا تەحنولوگيالىق پارامەترلەردى جەتىلدىرۋدە.
ۋنيۆەرسيتەت بولاشاقتا كاتاليزاتوردى ارنايى پيلوتتىق زەرتحانادا ءوندىرۋدى جوسپارلاپ وتىر. ول ن گ ۋ-دىڭ جاڭا عىلىمي-زەرتتەۋ ورتالىعىندا ورنالاسۋى ءتيىس.
جوبانىڭ تۇپكى ماقساتى - سۇرىپتالعاننان كەيىن دە كادىمگى مەحانيكالىق قايتا وڭدەۋگە جارامايتىن پلاستيكتى پوليگونعا كومۋ نەمەسە جاعۋدىڭ ورنىنا، ونى قايتادان سۇيىق وتىن وندىرىسىنە ارنالعان شيكىزاتقا اينالدىرۋ. كاتاليز ينستيتۋتى بۇعان دەيىن دە پلاستيكتەن الىنعان پيروليز مايىنىڭ ساپاسىن جاقسارتاتىن تەحنولوگيالاردى زەرتتەپ، ونداعى حلور مولشەرىن جۇزدەگەن ەسە تومەندەتۋگە مۇمكىندىك بەرەتىن كاتاليزاتورلاردى سىناعان.