رەسەي بىزگە «ۆيزالىق رەجيم» ەنگىزىپ وتىر - ءماجىلىس دەپۋتاتى

استانا. KAZINFORM - ءماجىلىس دەپۋتاتى ەرمۇرات باپي رەسەيدىڭ ءوز اۋماعىنا كىرەتىن شەتەلدىكتەردى ەلەكتروندى تىركەۋدەن وتۋگە ماجبۇرلەيتىن ەرەجەسى ەۋرازيالىق ەكونوميكالىق وداقتىڭ مۇشەسى سانالاتىن قازاقستان ازاماتتارىنا دا قولدانىلۋىن «ۆيزالىق رەجيم» دەپ باعالادى.

- ەۋرازيالىق ەكونوميكالىق وداقتىڭ نەگىزگى قاعيداتى - ازاماتتاردىڭ، تاۋارلار مەن قىزمەتتەردىڭ ەركىن قوزعالىسى. ال ءبىر ايعا جۋىق ۋاقىت بۇرىن رەسەي ءبىرجاقتى تارتىپپەن قازاقستاندىقتار ءۇشىن «ۆيزالىق رەجيم» ەنگىزدى. نەگە ءبىرجاقتى تارتىپپەن ارەكەت ەتىپ وتىر جانە ءبىزدىڭ جاۋابىمىز قانداي بولادى؟ قارىمتا جاۋاپ بولا ما، الدە ءۇنسىز قالامىز با، - دەپ سۇرادى ەرمۇرات باپي ءماجىلىستىڭ جالپى وتىرىسىندا.

سىرتقى ىستەر ءمينيسترىنىڭ ورىنباسارى رومان ۆاسيلەنكو بۇل ماسەلەدەن حابارى بار ەكەنىن ايتتى.

- شىنىمەن دە ءبىز ەلەكتروندى تىركەۋ ەنگىزىلگەنىن بىلەمىز. بۇل قازاقستاندىقتارعا عانا ەمەس، بارشا مەملەكەتتەردىڭ ازاماتتارىنا ارنالعان. تالاپ وسى ايدىڭ اياعىندا كۇشىنە ەنەدى. قازىرگى تاڭدا ماسەلەنى زەردەلەپ جاتىرمىز. ءبىزدىڭ تارابىمىزدان قابىلداناتىن شارالاردى قاراستىرىپ جاتىرمىز، - دەپ قىسقا قايىردى ديپلومات.

ەسكە سالساق، وتكەن اپتادا قازاقستان مەن رەسەي شەكاراسىنداعى وتكىزۋ بەكەتىندە قوزعالىس شەكتەلگەن بولاتى.