رەسەيگە باراتىن قازاقستاندىقتار بيومەتريالىق دەرەك ۇسىنادى

استانا. KAZINFORM - قازاقستاننىڭ رەسەيدەگى ەلشىلىگى قازاقستاندىقتارعا ۇندەۋ جاسادى.

«رەسەي فەدەراتسياسى ۇكىمەتىنىڭ 2024 -جىلعى 7-قاراشاداعى №1510-قاۋلىسىنا سايكەس رەسەيدە ەلگە كىرۋ جانە شىعۋ كەزىندە شەتەل ازاماتتارىنان (ونىڭ ىشىندە قازاقستان ازاماتتارىنان) جانە ازاماتتىعى جوق ادامداردان بيومەتريالىق دەرەكتەرىن جيناۋ بويىنشا ەكسپەريمەنتتىك جوبا باستالدى»، - دەلىنگەن ەلشىلىك حابارلاماسىندا.

ەكسپەريمەنتتىڭ ءبىرىنشى كەزەڭىندە، 2024 -جىلعى 1-جەلتوقساننان 2026 -جىلعى 30-ماۋسىمعا دەيىن ماسكەۋ قالاسىنىڭ حالىقارالىق اۋەجايلارىنا (دومودەدوۆو، شەرەمەتيەۆو، ۆنۋكوۆو جانە جۋكوۆسكي)، سونداي-اق ورىنبور وبلىسىنداعى «ماشتاكوۆو» اۆتوموبيل وتكىزۋ پۋنكتى ارقىلى كەلەتىن قازاقستان ازاماتتارى بيومەتريالىق دەرەكتەرىن - بەت بەينەسى مەن ساۋساق ىزدەرىن تاپسىرۋعا مىندەتتى.

ەكىنشى كەزەڭدە، 2025 -جىلدىڭ 30-ماۋسىمىنان 2026 -جىلدىڭ 30-ماۋسىمىنا دەيىن ەكسپەريمەنت رەسەيدىڭ مەملەكەتتىك شەكاراسىنداعى بارلىق وتكىزۋ پۋنكتتەرىن قامتيدى. بۇل كەزەڭدە ەلگە كىرۋشى ءاربىر شەتەلدىكتىڭ (ونىڭ ىشىندە قازاقستان ازاماتتارىنىڭ) سيفرلىق بەيىنى قالىپتاستىرىلاتىن بولادى. بۇل رەتتە، مۇنداي بەيىندى RuID قوسىمشاسى ارقىلى ءوز بەتىنشە قۇرۋعا بولادى، ول باسقا مەملەكەتتەردىڭ ازاماتتارى ءۇشىن مەملەكەتتىك قىزمەتتەردىڭ انالوگى بولادى جانە ساپار تۋرالى حابارلاۋعا، سونداي-اق رەسەي اۋماعىندا ءارتۇرلى مەملەكەتتىك قىزمەتتەردى الۋعا مۇمكىندىك بەرەدى (مىسالى، مەديتسينالىق ساقتاندىرۋدى راسىمدەۋ). سيفرلىق بەيىن ءبىرقاتار مەملەكەتتىك جۇيەلەرگە، ونىڭ ىشىندە مەملەكەتتىك كورسەتىلەتىن قىزمەتتەر جۇيەسىنە ەنگىزىلەتىن بولادى.

شەكارادان ءوتۋ پۋنكتتەرىندەگى قوسىمشا تارتىپتەرگە الدىن الا دايىن بولۋدى ۇسىنامىز.

اتالعان جوبا (ەكسپەريمەنت) تالاپتارىنان:

- رەسەيدە اككرەديتتەلگەن ديپلوماتيالىق وكىلدىكتەر مەن حالىقارالىق ۇيىمداردىڭ قىزمەتكەرلەرى جانە ولاردىڭ وتباسى مۇشەلەرى؛

- ديپلوماتيالىق جانە قىزمەتتىك پاسپورتتاردىڭ يەلەرى؛

- 6 جاسقا دەيىنگى بالالار بوساتىلادى.