رەسەي باشار اسادتى سيرياعا ەكستراديتسيالاۋدان باس تارتتى

استانا. KAZINFORM - رەسەي داماسكىدەگى جاڭا ۇكىمەتتىڭ رەسەيگە قاشىپ كەتكەن باشار اسادتى ەكستراديتسيالاۋ تۋرالى ءوتىنىشىن قابىلداعان جوق، دەپ مالىمدەدى سيريانىڭ ۋاقىتشا پرەزيدەنتى احمەد اش-شاراا The New York Times باسىلىمىنا بەرگەن سۇحباتىندا.

 بۇل تۋرالى DW اقپارات اگەنتتىگى حابارلايدى.

رەسەي سيريانىڭ جاڭا ۇكىمەتىنىڭ رەسەيگە قاشىپ كەتكەن پرەزيدەنتى باشار اسادتى ەكستراديتسيالاۋ تۋرالى ءوتىنىشىن قابىلداعان جوق.

بۇل ءوتىنىش رەسەي بيلىگىنە قاڭتار ايىندا جىبەرىلدى، دەپ حابارلادى سيريانىڭ ۋاقىتشا پرەزيدەنتى جانە «حايات تاحرير اش- شام» (HTS) جيھادشىلار توبىنىڭ جەتەكشىسى احمەد اش- شاراا سارسەنبى، 23 -ساۋىردە The New York Times (NYT) گازەتىنە بەرگەن سۇحباتىندا.

باس تارتۋعا قاراماستان، سيريانىڭ جاڭا اكىمشىلىگى رەسەيمەن قارىم-قاتىناستى ۇزۋگە نيەتتى ەمەس جانە «سيريا بيلىگى كرەملمەن كەلىسسوزدەرگە اشىق»، - دەپ جازدى NYT.

- رەسەي - ب ۇ ۇ قاۋىپسىزدىك كەڭەسىنىڭ تۇراقتى مۇشەسى. سيريانىڭ قارۋى تولىعىمەن رەسەيلىك. سيريا ۇزاق جىلدار بويى سۇيەنگەن ازىق-تۇلىك پەن ەنەرگيامەن قامتاماسىز ەتۋ بويىنشا كوپتەگەن كەلىسىمدەر بار، دەپ مالىمدەدى اش-شاراا ونىڭ ۇكىمەتى «سيريانىڭ وسى مۇددەلەرىن ەسكەرەتىنىن» باسا ايتىپ.

سيرياداعى جويقىن ازاماتتىق سوعىس كەزىندە ماسكەۋ اساد رەجيمىن قولداۋ ماقساتىندا ەلگە ۇشاقتار، كەمەلەر، اسكەر مەن اسكەري كەڭەسشىلەر جىبەردى، دەپ ەسكە سالدى NYT.

- ازىرگە ءبىز باسقا ەلدەردەن نەگىزىنەن رەسەيدە شىعارىلاتىن سيريالىق قارۋدى اۋىستىرۋ تۋرالى ەشقانداي ۇسىنىس العان جوقپىز، - دەپ قوستى اش-شاراا.

وتكەن جىلدىڭ سوڭىندا سيريانىڭ بيلىكتەن قۋىلعان پرەزيدەنتى باشار اساد ەلدەن ارميا «سوڭعى پوزيتسيالارىن بەرىپ» جانە «بارلىق مەملەكەتتىك ينستيتۋت سال بولىپ قالعاندا» عانا كەتكەنىن مالىمدەدى.

اۆتور

زارينا تۋعانبايەۆا