ايتا كەتەيىك، 2-قازاندا قۇرىلتاي سپيكەرى ايبەك دادەبايدىڭ توراعالىعىمەن وتكەن بيۋرودا قۇرىلتايدىڭ بۇگىنگى وتىرىسىنىڭ كۇن ءتارتىبى بەلگىلەندى. سوعان وراي «قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى زاڭ جوباسى، سونداي-اق رەسەيمەن مۇناي جانە مۇناي ونىمدەرىن جەتكىزۋ سالاسىنداعى ساۋدا-ەكونوميكالىق ىنتىماقتاستىق، سەربيامەن اسكەري-تەحنيكالىق ىنتىماقتاستىق تۋرالى راتيفيكاتسيالىق قۇجاتتار قاراۋعا شىعارىلىپ وتىر.
«قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى زاڭ جوباسى مەملەكەت باسشىسىنىڭ تاپسىرماسىن ورىنداۋ اياسىندا قۇرىلتاي دەپۋتاتتارىنىڭ باستاماسىمەن ازىرلەندى. زاڭ جوباسى وتاندىق قايراتكەرلەردىڭ ەڭبەگىن لايىقتى باعالاۋعا باعىتتالعان. قۇجاتتا جاڭا ەرەكشەلىك بەلگىلەرىن ەنگىزۋ كوزدەلگەن. اتاپ ايتقاندا، وتاندىق مۋزىكا ونەرى مەن ءان شىعارماشىلىعىن دامىتۋعا سىڭىرگەن ايرىقشا ەڭبەگى ءۇشىن «ءشامشى قالداياقوۆ» مەدالى، سونداي-اق بەينەلەۋ ونەرى سالاسىنداعى كورنەكتى تۋىندىلارى ءۇشىن «قازاقستاننىڭ ەڭبەك سىڭىرگەن سۋرەتشىسى» قۇرمەتتى اتاعىن ەنگىزۋ ۇسىنىلادى.
مۇنان بولەك، ءبىرىنشى وقىلىمدا قازاقستان رەسپۋبليكاسىنا مۇناي جانە مۇناي ونىمدەرىن جەتكىزۋ سالاسىنداعى ساۋدا-ەكونوميكالىق ىنتىماقتاستىق تۋرالى قازاقستان مەن رەسەي ۇكىمەتتەرى اراسىنداعى 2010-جىلعى 9-جەلتوقساندا راسىمدەلگەن كەلىسىمنىڭ قولدانىسىن قايتا باستاۋ جانە وعان وزگەرىستەر ەنگىزۋ تۋرالى حاتتامانى راتيفيكاتسيالاۋ جونىندەگى زاڭ جوباسى قارالادى.
ەكىنشى وقىلىمدا دەپۋتاتتار قازاقستان مەن سەربيا ۇكىمەتتەرى اراسىنداعى اسكەري- تەحنيكالىق ىنتىماقتاستىق تۋرالى كەلىسىمدى راتيفيكاتسيالاۋ جونىندەگى زاڭ جوباسىن قارايدى. قۇجاتتىڭ ماقساتى - تەڭ قۇقىلىق قاعيداتى نەگىزىندە ەكى ەل اراسىنداعى ءوزارا ءتيىمدى اسكەري- تەحنيكالىق ىنتىماقتاستىقتى جولعا قويۋ جانە ودان ءارى دامىتۋ.
قۇرىلتاي كۇن تارتىبىنە قازاقستان رەسپۋبليكاسى قۇرىلتايىنىڭ I شاقىرىلىمى جانىنان ماسليحاتتارمەن ءوزارا ءىس-قيمىل جونىندەگى كەڭەس قۇرۋ ماسەلەسى ەنگىزىلگەن.
قۇرىلتايدىڭ العاشقى سەسسياسىنىڭ اشىلۋىندا مەملەكەت باسشىسى ازاماتتاردىڭ تاعدىرى مەن ومىرىنە قاتىستى زاڭداردى جان-جاقتى قاراپ، كەڭىنەن تالقىلاۋدىڭ ماڭىزىن اتاپ وتكەن بولاتىن. وسى باعىتتا قۇرىلتاي جانىنان ماسليحاتتارمەن ءوزارا ءىس-قيمىل جونىندەگى كەڭەس قۇرۋعا ماڭىزدى ءرول جۇكتەلەدى.
كەڭەستىڭ نەگىزگى مىندەتى -ءماسليحاتتاردىڭ زاڭداردى ازىرلەۋ پروتسەسىنە تۇراقتى قاتىسۋىن قامتاماسىز ەتۋ جانە ولاردىڭ جەرگىلىكتى جەرلەردە قولدانىلۋىنا قاتىستى كەرى بايلانىس ورناتۋ. باسىم باعىتتاردىڭ قاتارىندا زاڭداردى قولدانۋ پراكتيكاسىنا مونيتورينگ جۇرگىزۋ، وڭىرلەرگە ورتاق پروبلەمالاردى انىقتاۋ جانە زاڭنامانى جەتىلدىرۋ جونىندە ۇسىنىستار ازىرلەۋ بار.
ەستەرىڭىزگە سالا كەتسەك، وتكەن اپتادا قۇرىلتاي «قازاقستان ۇكىمەتى مەن قاتار ۇكىمەتى اراسىنداعى قىلمىسقا قارسى كۇرەستەگى ىنتىماقتاستىق تۋرالى كەلىسىمدى راتيفيكاتسيالاۋ تۋرالى»، «2010-جىلعى 10-جەلتوقسانداعى تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ ادامداردى مەملەكەتارالىق ىزدەستىرۋ تۋرالى شارتىنا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى»، «كومپيۋتەرلىك قىلمىستار تۋرالى كونۆەنتسيانى راتيفيكاتسيالاۋ تۋرالى» «1994 -جىلعى 15 -ساۋىردەگى دۇنيەجۇزىلىك ساۋدا ۇيىمىن قۇرۋ تۋرالى مارراكەش كەلىسىمىنە قازاقستان رەسپۋبليكاسىنىڭ قوسىلۋى تۋرالى حاتتاماعا قوسىمشا بولىپ تابىلاتىن كورسەتىلەتىن قىزمەتتەر بويىنشا قازاقستان رەسپۋبليكاسىنىڭ ەرەكشە مىندەتتەمەلەرىنىڭ تىزبەسىنە وزگەرىستەردى راتيفيكاتسيالاۋ تۋرالى» زاڭداردى قابىلدادى.
وتىرىس سوڭىندا قۇرىلتاي دەپۋتاتتارى وزەكتى الەۋمەتتىك جانە ەكونوميكالىق ماسەلەلەر بويىنشا مەملەكەتتىك ورگاندارعا 15 دەپۋتاتتىق ساۋال جولدادى. ماسەلەن، دەپۋتات دانا مەدەۋوۆا مەديتسينا قىزمەتكەرلەرىنىڭ كاسىبي مارتەبەسىنە قاتىستى ۇسىنىس ايتتى.
- ءبىزدىڭ مىندەتىمىز - دارىگەرلەردىڭ تومەن جالاقىعا بايلانىستى ماماندىعىن تاستاپ كەتپەۋىنە جاعداي جاساۋ. ءبىلىمى مەن تاجىريبەسى ەل يگىلىگىنە قىزمەت ەتۋى ءۇشىن ولاردىڭ ەڭبەگىن لايىقتى باعالاۋىمىز كەرەك،-دەدى دانا مەدەۋوۆا.
دەپۋتات ءبورىحان نۇرمۇحامەدوۆ تۇرعىن ءۇي قولجەتىمدىلىگىنىڭ وڭىرلىك كورسەتكىشتەرىنىڭ رەسمي جۇيەسىن ەنگىزۋ قاجەتتىگىن العا تارتتى. ال دەپۋتات رۋسلان ىدىرىسوۆ شاعىن ازىق-تۇلىك ساۋداسىنا مەملەكەتتىك قولداۋ كورسەتۋ تاسىلدەرىن قايتا قاراۋدى ۇسىندى.
- 2020-جىلى قازاقستان ۇلتتىق بانكى الەۋمەتتىك ماڭىزى بار سالالاردا - ءدارىحانا، ءبىلىم بەرۋ جانە مەديتسينادا - بانكارالىق كوميسسيالاردى (ينتەرچەيندج) 1,5 پايىزعا دەيىن شەكتەۋ تەتىگىن ءساتتى قولداندى. بۇل ءتاسىلدى «ءۇي جانىنداعى» دۇكەندەر فورماتىنداعى ازىق-تۇلىك بولشەك ساۋداسىنا دا قولدانۋ قاجەت. دۇكەننىڭ تازا مارجاسى 8-12 پايىز بولعان جاعدايدا، بانك ەكۆايرينگىنە تولەنەتىن 1،5- 2,5 پايىزدىق كوميسسيا دۇكەننىڭ تازا پايداسىنىڭ تورتتەن بىرىنە دەيىن جەتۋى مۇمكىن، - دەدى ول.
سونداي-اق دەپۋتات ايجان سقاكوۆا «تازا قازاقستان» اياسىندا قورشاعان ورتانى قورعاۋ، ماحامبەت حاسەنوۆ جوعارى ءبىلىم بەرۋدىڭ ءۇش جىلدىق مودەلىن كەڭەيتۋ جانە كادر دايارلاۋدى ەكونوميكا قاجەتتىلىكتەرىنە ساي بەيىمدەۋ ماسەلەسىن كوتەردى.