چەرچەسوۆ قازاقستان قۇراماسىنىڭ جەڭىلىسىنە قاتىستى پىكىر ءبىلدىردى

استانا. KAZINFORM - قازاقستان قۇراماسىنىڭ جاڭا باس باپكەرى ستانيسلاۆ چەرچەسوۆ ۇلتتىق قۇرامانىڭ جولداستىق كەزدەسۋلەرى جايلى ويىن ورتاعا سالدى.

«مەن قازاقستان قۇراماسىنىڭ ەكى جولداستىق ويىنىن دا كوردىم. ەريەۆانداعى ويىن ءساتسىز باستالدى، العاشقى مينۋتتاردا گول جىبەرىپ الدى. ءبىراق، ازەربايجانمەن بولعان كەزدەسۋدە جىگىتتەر ءبىرىنشى تايمنىڭ ورتاسىندا العا شىعىپ، مۇلدە باسقاشا وينادى. كەيىن ازەربايجاندىقتار دوپقا كوپ يەلىك ەتە باستادى. جىگىتتەر نەلىكتەن دوپتى قارسىلاسقا وڭاي بەرىپ قويعانىن تۇسىنبەيمىن. ايتا كەتۋ كەرەك، بۇل جولداستىق كەزدەسۋ، ەكى كوماندا دا قورعانىستا ناشار وينادى. ويىننان كەيىن مەن كيىم اۋىستىراتىن بولمەگە كىرىپ، قىركۇيەك ايىنداعى ماتچتارعا دەيىن قاتەلەرىمىزدى تۇزەتىپ الۋىمىز ءۇشىن جىگىتتەرگە نەمەن اينالىسۋ كەرەكتىگىن ايتتىم. شەبەرلىكتەرىڭىزدى سىناۋ ءۇشىن جولداستىق كەزدەسۋلەر قاجەت. ءالى دە شىڭدايتىن دۇنيەلەر كوپ»، - دەدى چەرچەسوۆ.

ايتا كەتەيىك، جولداستىق كەزدەسۋلەردە ۇلتتىق قۇرامانى الاڭعا رۋسلان بالتيەۆ باستاپ شىققان بولاتىن. باس باپكەر قىزمەتىنە 3-ماۋسىمدا تاعايىندالعان چەرچەسوۆ جۇمىسقا كەيىن كىرىسەدى.

ەستەرىڭىزگە سالساق، كەشە جولداستىق كەزدەسۋدە قازاقستان قۇراماسى ازەربايجانعا جەڭىلىپ قالعان بولاتىن.

اۆتور

ورالحان قوجانوۆ