ونىڭ مالىمەتىنشە، بيىل 9 ايدا ترانسفەرتتەردى ەسەپكە الماعاندا، مەملەكەتتىك بيۋجەتتىڭ كىرىستەرى 20,2 تريلليون تەڭگەنى قۇراپ، جوسپار 98,5 پايىزعا ورىندالدى. وتكەن جىلمەن سالىستىرعاندا ءوسىم قارقىنى 16,3 پايىزعا جەتىپ، 2,8 تريلليون تەڭگە بولدى. بۇل رەتتە وتكەن جىلمەن سالىستىرعاندا سالىق تۇسىمدەرى 3 تريلليون تەڭگەگە ارتىپ، جالپى ءوسىم قارقىنى 130,3 پايىزدى قۇرادى.
- وتكەن جىلدىڭ وسى كەزەڭىمەن سالىستىرعاندا رەسپۋبليكالىق بيۋجەت كىرىستەرى 2,7 تريلليون تەڭگەنى قۇراپ، شامامەن 26 پايىزعا ارتتى. تۇسىمدەردىڭ وسىمىنە، ەكسپورتتىق تاۋارلاردىڭ الەمدىك باعاسى، ساۋدا اينالىمىنىڭ ءوسىمى جانە سالىق مولشەرلەمەسىنىڭ وزگەرۋى اسەر ەتتى. تاۋارلار، جۇمىستار مەن كورسەتىلەتىن قىزمەتتەر اينالىمىنىڭ ءوسىمى، شامامەن 14 پايىزعا جەتىپ، 19,7 تريلليون تەڭگەنى قۇرادى. سونىمەن بىرگە، بيزنەسكە قوسىلعان قۇن سالىعىن قايتارۋ پروتسەسى قاتار جۇرگىزىلدى. ەسەپتى كەزەڭدە 811,5 ميلليارد تەڭگە قايتارىلدى، - دەدى ول.
مينيستر دەرەگىنشە، كەدەندىك تولەمدەر 706 ميلليارد تەڭگەگە ءوسىپ، 3,9 تريلليون تەڭگە بولدى. ءۇشىنشى ەلدەرمەن تاۋار اينالىمى - 14,3 پايىزعا، ەۋرازيالىق ەكونوميكالىق وداق ەلدەرىنەن يمپورت 11,5 پايىزعا ارتتى.
- سىرتقى ساۋدانىڭ وسۋىمەن قاتار، كەدەندىك ترانزيت كولەمى دە ارتتى. 9-ايدىڭ ىشىندە 1,2 ميلليون ترانزيتتىك دەكلاراتسيا بەرىلدى. بۇل وتكەن جىلمەن سالىستىرعاندا 18 پايىزعا ارتىق. جالپى تاۋار اينالىمىنىڭ كولەمى 13 پايىزدىق ءوسىم كورسەتىپ، 19,4 ميلليون تونناعا جەتتى. ەسەپتى كەزەڭدە اۆتوموبيل وتكىزۋ پۋنكتتەرى ارقىلى 1,5 ميلليونعا جۋىق اۆتوكولىك قۇرالى تىركەلىپ، وتكەن جىلمەن سالىستىرعاندا 19,3 پايىزعا ءوسىپ، 234,4 مىڭعا ارتقان. وسىعان بايلانىستى شەكارا ينفراقۇرىلىمىن دامىتۋ جانە كەدەندىك رەسىمدەۋدى جەڭىلدەتۋ بويىنشا ارنايى جۇمىستار اتقارىلىپ جاتىر. كىرىستەر ءوسىمىنىڭ ءبىر بولىگى باعا جانە رەتتەۋشىلىك فاكتورلارعا بايلانىستى بولعاندىقتان، اعىمداعى جىلدىڭ اياعىنا دەيىن سالىق بازاسىن كەڭەيتۋگە جانە اكىمشىلەندىرۋ ساپاسىنا باسا ءمان بەرىلەتىن بولادى، - دەدى ءمادي تاكيەۆ.
ايتا كەتەيىك، بيىل 9 ايدىڭ قورىتىندىسىندا ەل ەكونوميكاسىنىڭ ءوسۋى 4,2 پايىزدى قۇرادى.