رەسپۋبليكالىق «اقتوبە- حرومتاۋ- ۇلعايسىن» جولى ءتورت جولاقتى بولادى

  استانا. KAZINFORM - رەسپۋبليكالىق ماڭىزى بار «اقتوبە- حرومتاۋ-ۇلعايسىن» جولى ءتورت جولاقتى بولادى. قازىر قايتا قۇرۋ جۇمىستارى باستالىپ كەتتى.

كولىك مينيسترلىگى ءمالىم ەتكەندەي، بۇل جول I تەحنيكالىق ساناتقا يە بولىپ، ءتورت جولاقتى جولعا اينالادى. قۇرىلىس جۇمىستارى اقتوبە ءوڭىرىنىڭ حرومتاۋ اۋدانىندا ءجۇرىپ جاتىر. جاڭا ءتورت جولاقتى جول حرومتاۋ قالاسىنىڭ قاسىندا باستالىپ، اقجار اۋىلى مەن جازىق بەكەتى ارقىلى وتەدى. بۇل ۋچاسكەدە 2 كوپىر مەن 2 جول ايرىعى سالىنادى.

اقتوبە وڭىرىنە جۇمىس ساپارى اياسىندا قۇرىلىس جۇمىستارىنىڭ بارىسىن كولىك ءمينيسترى مارات قارابايەۆ تەكسەردى.

«نىسان باسىندا 120 مامان مەن 100 بىرلىك ارنايى تەحنيكا جۇمىس ىستەپ جاتىر. قۇرىلىس جۇمىستارى قارقىنىن ارتتىرۋ ماقساتىمەن تاعى دا قوسىمشا ماماندار مەن ارنايى تەحنيكا جۇمىلدىرۋ كوزدەلدى. بيىل مەردىگەر ۇيىمدار بارلىق جەر جۇمىسىن اياقتاپ، سونداي- اق ەرىگەن قار سۋىن وتكىزۋگە مۇمكىندىك بەرەتىن سۋ وتكىزگىش قۇبىرلاردى سالادى»، - دەپ ايتتى مارات قارابايەۆ.