ساۋدا جانە ينتەگراتسيا مينيسترلىگى اكسيا اياسىنداعى باعالارعا تالداۋ جاساپ، تۇتىنۋشىلاردىڭ ءتۇرلى ساناتتاعى تاۋارلاردى ساتىپ الۋ كەزىندە قانشا قاراجات ۇنەمدەي الاتىنىن ەسەپتەدى. تالداۋ وڭىرلەر ۇسىنعان اقپارات نەگىزىندە دايىندالدى.
ازىق-تۇلىك تاۋارلارى
استانادا Bereke Fest اكسياسى اياسىندا كۇندەلىكتى تۇتىناتىن ازىق-تۇلىك تاۋارلارىنا جەڭىلدىكتەر قاراستىرىلعان. ماسەلەن، كۇنباعىس مايى - 1349 تەڭگەنىڭ ورنىنا 889 تەڭگەگە، ماكارون ونىمدەرىن (400 گ) - 499 تەڭگەنىڭ ورنىنا 329 تەڭگەگە، ال 30 دانادان تۇراتىن جۇمىرتقا قاپتاماسىن 2134 تەڭگەنىڭ ورنىنا 1619 تەڭگەگە ساتىپ الۋعا بولادى.
وسىلايشا، اتالعان ءۇش تاۋاردان قۇرالعان ازىق-تۇلىك قورجىنىنىڭ جەڭىلدىكسىز قۇنى 3982 تەڭگە بولسا، اكسيا كەزىندە 2837 تەڭگە بولادى. ساتىپ الۋشى 1145 تەڭگە نەمەسە شامامەن 29 پايىز ۇنەمدەي الادى.
تۇرمىستىق تاۋارلار
ارنايى جەڭىلدىكتەر تۇرمىستىق حيمياعا دا قاراستىرىلعان. استاناداعى ساۋدا جەلىلەرىندە كىر جۋعىش ۇنتاق (5,5 ك گ) 10239 تەڭگەنىڭ ورنىنا 5599 تەڭگەگە، كىر جۋۋعا ارنالعان گەل (2,145 ل) 10865 تەڭگەنىڭ ورنىنا 7389 تەڭگەگە، ىدىس جۋۋعا ارنالعان قۇرال (900 م ل) 1977 تەڭگەنىڭ ورنىنا 1679 تەڭگەگە، ال سابىن 669 تەڭگەنىڭ ورنىنا 469 تەڭگەگە ۇسىنىلىپ جاتىر.
اتالعان ءتورت تاۋاردىڭ جالپى قۇنى 23750 تەڭگەدەن 15136 تەڭگەگە دەيىن تومەندەيدى. وسىلايشا، ساتىپ الۋشى 8614 تەڭگە نەمەسە شامامەن 36 پايىز ۇنەمدەي الادى.
ماۋسىمدىق كيىمدەر
الماتىدا Republic Day اكسياسى اياسىندا كۇزگى كيىمدەرگە جەڭىلدىكتەر ۇسىنىلعان. ماۋسىمارالىق كۇرتەشەلەر 39990 تەڭگەنىڭ ورنىنا 25990 تەڭگەگە، دجينسى شالبارلار 19990 تەڭگەنىڭ ورنىنا 13990 تەڭگەگە، ايەلدەر جەمپىرلەرى 16990 تەڭگەنىڭ ورنىنا 10190 تەڭگەگە، حۋديلەر 17990 تەڭگەنىڭ ورنىنا 10790 تەڭگەگە، ال بالالارعا ارنالعان سپورتتىق كوستيۋمدەر 24990 تەڭگەنىڭ ورنىنا 13740 تەڭگەگە ساتىلىپ جاتىر.
اتالعان بەس تاۋاردىڭ جەڭىلدىكسىز جالپى قۇنى 119950 تەڭگە بولسا، اكسيا اياسىندا 74700 تەڭگە. وسىلايشا، ساتىپ الۋشى 45250 تەڭگە نەمەسە شامامەن 38 پايىز ۇنەمدەي الادى.
ۇسىنىلعان ەسەپتەۋلەر جەكەلەگەن ساۋدا نىساندارى بەرگەن باعالار نەگىزىندە جاسالعان جانە ىقتيمال ۇنەمدەۋ مولشەرىن كورسەتەدى. جەڭىلدىكتەر كولەمى، تاۋار تۇرلەرى مەن ارنايى ۇسىنىستاردىڭ شارتتارى دۇكەنگە جانە وڭىرگە بايلانىستى وزگەرۋى مۇمكىن.
اكسيالار قازاقستاننىڭ بارلىق ءوڭىرىن قامتيدى
ارنايى جەڭىلدىكتەر ەلىمىزدىڭ وزگە وڭىرلەرىندە دە قاراستىرىلعان. شىمكەنتتە تۇرعىندارعا كيىم-كەشەك، اياقكيىم، بالالار تاۋارلارى مەن تۇرمىستىق تەحنيكا جەڭىلدەتىلگەن باعامەن ۇسىنىلىپ جاتىر. اتىراۋ وبلىسىنداعى جەكەلەگەن ساۋدا نىساندارىندا جەڭىلدىكتەر 50 پايىزعا دەيىن جەتەدى.
قاراعاندى جانە شىعىس قازاقستان وبلىستارىندا قۇرىلىس، جوندەۋ جۇمىستارى ماتەريالدارىنا جانە ءۇيدى جابدىقتاۋعا ارنالعان تاۋارلارعا ارنايى باعالار بەلگىلەنگەن. ۇلىتاۋ، باتىس قازاقستان، پاۆلودار جانە باسقا دا وبلىستاردا ازىق-تۇلىك پەن كۇندەلىكتى تۇتىناتىن تاۋارلارعا جەڭىلدىكتەر جاسالىپ جاتىر.
وڭىرلەردىڭ مالىمەتىنشە، ساتىپ الۋشىلار اراسىندا ماۋسىمدىق كيىمدەر مەن اياقكيىم، ازىق- تۇلىك، تۇرمىستىق حيميا، ۇيگە قاجەتتى تاۋارلار مەن ەلەكترونيكا ونىمدەرى سۇرانىسقا يە.
ەسكە سالا كەتەيىك، Republic Day جانە Bereke Fest رەسپۋبليكالىق اكسيالارى 17- 27-قازان ارالىعىندا (قوسا العاندا) وتكىزىلەدى.
قىزىلوردا وبلىسىندا «Republic Day» جانە «Bereke Fest» رەسپۋبليكالىق اكسيالارى ءوتىپ جاتقانىن جازعان ەدىك.