قۋانىشقا ورىلگەن جيىنعا اۋدان اكىمى دارحان شومپاي ۇلى، اۋدان اكىمىنىڭ ورىنباسارى ەرجان سوۆەتبەك ۇلى، اۋداندىق اۋرۋحانانىڭ باس دارىگەرى، مەديتسينا قىزمەتكەرلەرى مەن اۋىل تۇرعىندارى قاتىستى.
دارحان شومپاي ۇلى جينالعان قاۋىمدى ايتۋلى وقيعامەن قۇتتىقتاپ، دەنساۋلىق ساقتاۋ سالاسىن دامىتۋ، مەديتسينالىق كومەكتىڭ ساپاسى مەن قولجەتىمدىلىگىن ارتتىرۋ - اۋداننىڭ الەۋمەتتىك دامۋىنداعى ماڭىزدى باعىتتاردىڭ ءبىرى ەكەنىن اتاپ ءوتتى.
- جوندەۋدەن وتكەن ورتالىقتا تۇرعىندارعا مەديتسينالىق قىزمەت كورسەتۋگە قاجەتتى جاعدايلار جاسالعان. ەمحانا بولىمشەسىمەن قاتار، بالالاردىڭ ءوسۋى مەن دامۋىن باقىلاۋعا ارنالعان دامۋ جانە ەرتە ارالاسۋ ورتالىعى اشىلدى. مۇندا پەدياتر، پسيحولوگ جانە باسقا دا ماماندار قىزمەت كورسەتىپ، بالالاردىڭ دەنساۋلىعىن باقىلاۋعا، دامۋ ەرەكشەلىكتەرىن ەرتە انىقتاۋعا جانە قاجەتتى قولداۋ كورسەتۋگە مۇمكىندىك الادى، - دەلىنگەن اكىمدىك اقپاراتىندا.
سونداي-اق شۇعىل جانە العاشقى مەديتسينالىق كومەك كورسەتۋ داعدىلارىن ۇيرەتۋگە ارنالعان ارنايى كابينەتتەر زاماناۋي قۇرال-جابدىقتارمەن قامتاماسىز ەتىلدى.
رەسپۋبليكا كۇنى قارساڭىندا تارباعاتاي اۋدانىندا تۇرعىندار ءۇشىن ماڭىزدى ءبىرقاتار الەۋمەتتىك نىسان پايدالانۋعا بەرىلىپ جاتىر. مەديتسينالىق-سانيتارلىق العاشقى كومەك ورتالىعىمەن قاتار، جاڭالىق اۋىلىنداعى مەديتسينالىق پۋنكت تە سالتاناتتى تۇردە اشىلدى.
تارباعاتاي دەربەس اۋدان بولعاننان بەرى دەنساۋلىق ساقتاۋ سالاسىندا دا اۋقىمدى جۇمىستار اتقارىلدى. «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 9 مەديتسينالىق پۋنكت سالىنىپ، پايدالانۋعا بەرىلدى. اۋداندىق اۋرۋحانانىڭ جۇقپالى اۋرۋلار بولىمشەسى مەن پەرزەنتحانا عيماراتى، قۇيعان جانە تۇعىل اۋىلدارىنداعى دارىگەرلىك امبۋلاتوريالار كۇردەلى جوندەۋدەن ءوتىپ، زاماناۋي مەديتسينالىق قۇرال-جابدىقتارمەن قامتاماسىز ەتىلدى.
سونىمەن قاتار، سارىولەڭ، شەڭگىلدى، جاڭاتىلەۋ جانە تاۋكە اۋىلدارىنداعى مەديتسينالىق پۋنكتتەر دە جاڭارتىلدى.