رەسپۋبليكا كۇنىنە وراي ەلوردادا فوتو بايقاۋ جاريالاندى
استانا. KAZINFORM - رەسپۋبليكا كۇنىنە وراي استانا قالاسىنىڭ ىشكى ساياسات باسقارماسى جانە ج ق «جاستار كونۆەنتى» الەۋمەتتىك جەلىلەردە «فوتوكامەرادان قالا تۇرعىندارىنىڭ ومىرىنەن ۇزدىك كورىنىس» بايقاۋىن جاريالادى، دەپ جازدى ەلوردا اكىمدىگىنىڭ رەسمي سايتى.
بۇل بايقاۋ ارقىلى ەلوردا تۇرعىندارى اراسىندا قوعامدىق سانانىڭ دەڭگەيىن ارتتىرۋ، مادەني كودىمىزدى نىعايتۋ جانە شىعارماشىلىق الەۋەتتى دامىتۋ كوزدەلەدى. قاتىسۋشىلار وزدەرىنىڭ كۇندەلىكتى ومىرىنەن، ەرەكشە ساتتەرىنەن، تۇرعىنداردىڭ مادەنيەتى مەن داستۇرىنەن تۋىنداعان فوتوسۋرەتتەردى ۇسىنىپ، ەلوردا ءومىرىنىڭ ءارقيلى كورىنىستەرىن كورسەتۋ مۇمكىندىگىنە يە بولماق.
بايقاۋ ماقساتى - ەلوردا تۇرعىندارىنىڭ ءومىرىنىڭ ساتتەرىن، كۇندەلىكتى تىرشىلىگىن، مادەنيەتىن، ادەپ-عۇرپىن جانە ەرەكشە كورىنىستەرىن فوتو ارقىلى كورسەتۋ.
بايقاۋعا قاتىسۋ تالاپتارى:
• بايقاۋعا 14 جاستان اسقان استانا قالاسىنىڭ تۇرعىندارى قاتىسا الادى؛
• ءاربىر قاتىسۋشى 1 فوتوجۇمىس ۇسىنا الادى؛
• فوتوجۇمىستار تەك قاتىسۋشىنىڭ جەكە تۋىندىسى بولۋ كەرەك. اۆتورلىق قۇقىقتارعا قايشى كەلەتىن جۇمىستار قابىلدانبايدى؛
• فوتوجۇمىستار بۇرىن باسقا بايقاۋلارعا جاريالانباعان جانە جۇلدەلى ورىن الماعان بولۋى كەرەك؛
• قاتىسۋشى فوتوجۇمىستى 9-20-قازان ارالىعىندا ءوزىنىڭ الەۋمەتتىك جەلىدەگى پاراقشاسىنا سالۋى كەرەك؛
• فوتوجۇمىستار جوعارى ساپادا تۇسىرىلگەن جانە اۆتورلىق سيپاتتاماسى بولۋى كەرەك؛
• بايقاۋعا قاتىسۋشى الەۋمەتتىك جەلىدەگى @Elorda_madeni.kod اككاۋنتىن بەلگىلەپ، وسى اككاۋنتقا تىركەلۋى كەرەك.
• بايقاۋعا قاتىسۋ ءۇشىن ءوز جۇمىستارىڭىزدى الەۋمەتتىك جەلىلەردە جاريالاعاندا، مىندەتتى تۇردە تومەندەگى حەشتەگتەردى قولدانىڭىز:
ء#قالاومىرى
#مەنىڭقالام
#ەلورداساتتەرى
#قالاتۇرمىسى
#StreetPhotographyKZ
#CityVibesKZ
بايقاۋعا 2024 -جىلدىڭ 9-20-قازان ارالىعىندا جاريالانعان فوتولار قاتىستىرىلادى. قاتىسۋشى ءوز جۇمىستارىن ۋاقتىلى جۇكتەمەگەن جاعدايدا ودان كەيىن بايقاۋعا قاتىسۋ مۇمكىندىگى بولمايدى.
فوتولار وريگينالدىلىق پەن كرەاتيۆتىلىك؛ فوتوسۋرەتتىڭ تاقىرىپقا سايكەستىگى؛ تەحنيكالىق ساپاسى؛ كوركەمدىك ءمانى مەن مازمۇنى كريتەريلەرى بويىنشا باعالانادى. اۆتورلىق قۇقىقتى بۇزاتىن، باسقا ادامنىڭ مەنشىگىندە دەپ تانىلعان فوتوسۋرەتتەر بايقاۋعا قاتىسۋدان شەتتەتىلەدى.
جەڭىمپازدار باعالى سىيلىقتارمەن ماراپاتتالادى.