جوبا ءوڭىردىڭ اۋىل شارۋاشىلىعى القاپتارىندا سىناقتان وتكىزىلدى. ەگىستىكتىڭ جاعدايىن كورىپ، قۇنارسىز ۋچاسكەلەردى انىقتايتىن سيفرلىق جۇيەنى قاراعاندى تەحنيكالىق ۋنيۆەرسيتەتىنىڭ ستۋدەنتتەرى ازىرلەدى. جوبانى جۇزەگە اسىرۋ ءۇشىن كوماندا شامامەن ءۇش ميلليون تەڭگە كولەمىندە گرانت العان. مۋليسپەكترلى كامەرامەن جابدىقتالعان درون اۋىل شارۋاشىلىعى القاپتارىن زەرتتەپ، ارنايى باعدارلاما تۇسىرىلگەن سۋرەتتەردى تالدايدى. ناتيجەسىندە فەرمەر ەگىستىكتىڭ تولىق كارتاسىن كورىپ، قانداي ۋچاسكەلەرگە قوسىمشا كۇتىم قاجەت ەكەنىن انىقتاي الادى.
ميحايل مۋحامەتوۆ، جوبانى ازىرلەۋشى:
- مىسالى، كەي جەردە ەگىستىك دۇرىس وسپەي، ءتىپتى جاقىن ارادا قۋراپ كەتۋى مۇمكىن. ونى وسى باعدارلاما كومەگىمەن الدىن الا بولجاپ، انىقتاۋعا بولادى. استىقتى مول الۋ ءۇشىن ەڭ الدىمەن، جەردىڭ قۇنارىنا، تازالىعىنا بايلانىستى. ياعني تىڭايتقىشتى ناقتى قاجەتتى ۋچاسكەگە سەۋىپ، ەگىننىڭ بىتىك شىعۋىنا جاعداي جاسايمىز.
جاڭا زەرتتەۋ جۇيەسىنىڭ ارقاسىندا ەندى فەرمەرلەر بۇكىل القاپتى تۇتاس وڭدەمەي، تەك قۇنارسىز ۋچاسكەلەرمەن جۇمىس ىستەي الادى. بۇل تىڭايتقىشتى، سۋدى جانە جۇمىس كۇشىن ۇنەمدەۋگە مۇمكىندىك بەرەدى. تەحنولوگيا وڭىردەگى بىرنەشە شارۋاشىلىقتىڭ ەگىستىك القاپتارىندا سىناقتان ءوتتى. سونداي-اق سول القاپتاردان الىنعان توپىراق ۇلگىلەرى استانا قالاسىنداعى زەرتحانادا تەكسەرىلىپ، قورىتىندى كورسەتكىشتەر باعدارلاما مالىمەتتەرىمەن ءىس جۇزىندە سايكەس كەلدى. ناقتىلىق دەڭگەيى 99 پايىزدى قۇرادى.
دميتري وجيگين، جوبا جەتەكشىسى:
- مەنىڭ ويىمشا، بۇل جۇيە اۋىل شارۋاشىلىعىنا وتە قاجەت. ول ونىمدىلىكتى ارتتىرىپ، تىڭايتقىشقا جۇمسالاتىن شىعىندى ۇنەمدەۋگە مۇمكىندىك بەرەدى. فەرمەرلەر جەردى وڭدەۋگە كەتەتىن شىعىندى 30-40 پايىزعا دەيىن ازايتا الادى.
ايتا كەتۋ كەرەك بۇل جۇيە توپىراقتى دا، وسىمدىك يندەكسىن دە زەرتتەۋگە مۇمكىندىك بەرەدى. جوبانى جۇزەگە اسىرۋشىلار جۇيەنىڭ مۇمكىندىكتەرىن كەڭەيتۋدى جالعاستىرىپ جاتىر. جاڭا مىندەتتەردىڭ ءبىرى اۋىل شارۋاشىلىعى القاپتارىنداعى ارامشوپتەردى اۆتوماتتى تۇردە انىقتاۋ. قازىرگى ۋاقىتتا جۇيەگە ەنگىزىلگەن مۇنداي تالداۋدىڭ دالدىگى 90 پايىزعا جەتكەن. ستارتاپ سيفرلىق تەحنولوگيالار سالاسىنداعى حالىقارالىق يننوۆاتسيالىق باعدارلامالار ىرىكتەۋىنەن ءوتىپ، ەلىمىزدەگى ۇزدىك 50 جوبانىڭ قاتارىنا ەندى.
24.kz