ەرمۇرات باپي ەكسپو ءىسىن قايتا كوتەرۋدى ۇسىندى

استانا. KAZINFORM - ءماجىلىس دەپۋتاتى ەرمۇرات باپي ەكسپو-2017 حالىقارالىق كورمەسى بويىنشا سوتتالعان ازاماتتاردىڭ ماسەلەسىن قايتا قاراپ، جەمقورلىق فاكتىلەرىنە شىنايى كىنالىلەردى انىقتاۋدى سۇرادى.

دەپۋتات باس پروكۋرور بەرىك اسىلوۆقا جولداعان ساۋالىندا ەكسپو-2017 ۇلتتىق كومپانياسى باسقارماسى ءتوراعاسىنىڭ ەكس-ورىنباسارى بولىپ ءجۇرىپ سوتتالعان مۇرات وماروۆتىڭ الەۋمەتتىك جەلىدەگى سۇحباتىنداي ايتىلعان مالىمەتتەردىڭ نەگىزىندە ءىستى قايتا كوتەرۋ كەرەكتىگىن ايتادى.

- ادىلەت ەشقاشان جارتىكەش بولمايدى. «ادىلەتتى قازاقستان» يدەياسىن قالىپتاستىرۋ ءۇشىن اقيقاتتى انىقتايتىن كەز كەلدى. بۇل سياقتى «پارا بەرۋ» جانە «جەمقورلىق» جەلەۋىمەن قۋدالانعان، ال انىعىندا، كەزىندەگى جەكە دارا بيلىك «قولىنان جەتەكتەپ اپارىپ سوتتاتقان» تۇلعالاردىڭ قاتارىندا - ارعىسى اكەجان قاجىگەلدين مەن عالىمجان جاقيانوۆتان باستاپ، بەرگىسى - سەرىك احمەتوۆ پەن جاقسىلىق دوسقاليەۆقا دەيىن ءبىرقاتار قياناتتى ءىس بار. باس پروكۋراتۋرا بۇلاردى دا تولىق رەابليتاتسيا جاساۋعا باستاما جاسايتىن ۋاقىت بولدى دەپ ەسەپتەيمىن، - دەدى ەرمۇرات باپي.

بۇعان دەيىن ءماجىلىس دەپۋتاتى ەدىل جاڭبىرشيننىڭ ەنەرگەتيكا مينيسترلىگىن اۋكسيوننان تىس تىكەلەي ۇكىمەت ارالىق كەلىسىمدەر جاساۋعا اۋەستەنىپ كەتتى دەپ سىناعانىن جازعان ەدىك.

اۆتور

ەسىمجان ناقتىباي