وندا كولىك ءمينيسترى نۇرلان ساۋرانبايەۆ، قارجى ءمينيسترىنىڭ مىندەتىن اتقارۋشى ەرجان ءبىرجانوۆ، ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى - شەكارا قىزمەتىنىڭ ديرەكتورى ەرلان الداجۇمانوۆتىڭ باياندامالارى تىڭدالدى.
قارجى مينيسترلىگىنىڭ مالىمەتىنشە، بيىلعى جوسپاردا ەۋرازيالىق ەكونوميكالىق وداقتىڭ سىرتقى شەكارالارىنداعى (ق ح ر، وزبەكستان رەسپۋبليكاسى، تۇرىكمەنستان) 9 وتكىزۋ پۋنكتىن رەكونسترۋكتسيالاۋ جۇمىستارى تۇر. بۇگىنگى تاڭدا ولاردىڭ 4-ەۋىندە: قاپلانبەك، اتامەكەن، قالجات جانە الاكول پۋنكتتەرىندە جۇمىستار اياقتالدى. بەس نىساندى جاڭعىرتۋ جۇمىستارى جىل سوڭىنا دەيىن ءوز مارەسىنە جەتپەك. «جىبەك جولى» جولاۋشىلار وتكىزۋ پۋنكتىن رەكونسترۋكتسيالاۋ جوسپاردان تىس جۇرۋدە، اياقتالۋى 2026 -جىلدىڭ ءبىرىنشى جارتىجىلدىعىندا كوزدەلىپ وتىر.
جاڭعىرتۋ جۇمىستارى كەزىندە التى جولاقتى كىرمە جولدار، ەلەكتروندى قاداعالاۋ جۇيەلەرىمەن قوسا العاندا، بارلىق قىزمەتتەر ءۇشىن ءبىرىڭعاي ينفراقۇرىلىم قۇرۋدى كوزدەيتىن جاعداي جاساۋعا باسا نازار اۋدارىلدى.
- باياندامالاردى تىڭداعان پرەمەر-مينيستر كەدەن قىزمەتىنىڭ، سونداي-اق رەسەي فەدەراتسياسى مەن قىرعىزستان رەسپۋبليكاسى شەكارالارىنداعى اۆتوموبيل وتكىزۋ پۋنكتتەرىن جوندەۋ مەرزىمدەرىنىڭ كەشىكتىرىلۋىنە بايلانىستى سالالىق مينيسترلىكتەر جۇمىسىن سىنعا الدى. ولجاس بەكتەنوۆ ق ر قارجى مينيسترلىگى مەملەكەتتىك كىرىستەر كوميتەتى مەن ق ر كولىك مينيسترلىگى اۆتوموبيل جولدارى كوميتەتىنىڭ ءتوراعالارىن جۇمىستارىن ءتيىستى دەڭگەيدە ۇيىمداستىرماعانى ءۇشىن جاۋاپكەرشىلىككە تارتۋدى تاپسىردى. سونىمەن قاتار مينيسترلىكتەردىڭ جاۋاپتى باسشىلارى جەرگىلىكتى جەرلەردە جۇمىستى ۇيلەستىرۋ ءۇشىن وڭىرلەرگە جىبەرىلدى، - دەلىنگەن حابارلامادا.
كەدەن قىزمەتىنىڭ كادر قۇرامىنا، اسىرەسە وتكىزۋ پۋنكتتەرىنە قاتىستى تالاپتاردى قاتاڭداتۋ، سونداي-اق جابدىقپەن جاراقتاندىرۋ جانە ينتەرنەت جەلىسىنە قولجەتىمدىلىكتى قامتاماسىز ەتۋ ماسەلەلەرى بويىنشا مىندەتتەر قويىلدى.
كولىك، قارجى مينيسترلەرىنە وتكىزۋ پۋنكتتەرىن رەكونسترۋكسيالاۋ بارىسى تۋرالى پرەمەر-مينيسترگە اپتا سايىن ەسەپ بەرۋ تاپسىرىلدى.
بۇعان دەيىن ۇكىمەت باسشىسى ولجاس بەكتەنوۆ تاۋار ءوندىرۋ، ساتۋ جانە توپقا ءبولۋ بويىنشا قۇزىرلى ورگاندارعا تاپسىرما بەردى.