پرەمەر-مينيستر: شاعىن اۋە كەمەلەرىن ساتىپ الۋ مەحانيزمدەرىن پىسىقتاۋ قاجەت

استانا. KAZINFORM - «قازاقستان تەمىر جولى» كورسەتەتىن قىزمەتتەردىڭ تاريفتەرى قايتا قارالادى. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.

«كولىك- لوگيستيكا سەكتورىنىڭ ماسەلەلەرىنە ەرەكشە ءمان بەرۋ كەرەك. كولىك ينفراقۇرىلىمىن قولداۋ جانە دامىتۋ اۋقىمدى ينۆەستيتسيا تارتۋدى تالاپ ەتەدى. وسىنداي شارالاردىڭ ءبىرى - «قازاقستان تەمىر جولى» كورسەتەتىن قىزمەتتەردىڭ تاريفتەرىن قايتا قاراۋ. سوعان وراي، «سامۇرىق- قازىنا» قورى كولىك مينيسترلىگىمەن بىرگە جۇكتەردى تەمىرجول كولىگىمەن تاسىمالداۋدىڭ جاڭا تاريفتىك ساياساتىن ازىرلەۋى قاجەت»، - دەدى ولجاس بەكتەنوۆ.

پرەمەر- مينيستر وبلىسارالىق جانە اۋدانارالىق باعىتتارداعى جولداردى ورتاشا جوندەۋمەن بارىنشا قامتۋعا قاتىستى كولىك مينيسترلىگى ناقتى جوبالاردى، كورسەتكىشتەردى جانە قارجىلاندىرۋ كوزدەرىن ايقىنداپ، 1-جەلتوقسانعا دەيىن ناقتى جوسپار ازىرلەۋى تيىستىگىن باسا ايتتى.

«قاراجاتتىڭ ماقساتقا ساي جۇمسالۋىن باقىلاۋدىڭ ءبارى جانە وسى جۇمىستاردىڭ مونيتورينگى ءبىرىڭعاي سيفرلىق پلاتفورما ارقىلى جۇرگىزىلۋگە ءتيىس. ونەركاسىپ مينيسترلىگىمەن جانە بايتەرەك حولدينگىمەن بىرگە شاعىن اۋە كەمەلەرىن ساتىپ الۋ مەحانيزمدەرىن پىسىقتاۋ قاجەت»، - دەدى ۇكىمەت باسشىسى.

حرومتاۋ، ساتبايەۆ، بالقاش جانە قۇلسارىدا يندۋستريالىق ايماقتار قۇرىلادى.

«ساران قالاسىنىڭ ۇلگىسى بويىنشا حرومتاۋ، ساتبايەۆ، بالقاش جانە قۇلسارى مونوقالالارىندا يندۋستريالىق ايماقتار قۇرۋ جۇمىستارى جۇرگىزىلۋدە. سونىمەن قاتار بارلىق مونوقالالاردا ولاردىڭ ەكونوميكاسىن ءارتاراپتاندىرۋعا باعىتتالعان 10 مىڭنان استام جۇمىس ورنىن قۇرۋمەن جالپى سوماسى 1,4 تريلليون تەڭگەگە 41 ينۆەستيتسيالىق جوبا ىسكە اسىرىلۋدا. سونداي-اق، الەۋمەتتىك- ينجەنەرلىك ينفراقۇرىلىمدى دامىتۋ جونىندە شارالار قابىلدانىپ، مونوقالالاردىڭ اينالاسىندا گەولوگيالىق بارلاۋ جۇمىستارى جۇرگىزىلەدى. جوعارىدا اتالعان شارالار مونوقالالاردىڭ ەكونوميكاسىن ءارتاراپتاندىرۋعا جانە قالا تۇرعىندارىنىڭ ءومىر ءسۇرۋ ساپاسىن ارتتىرۋعا ىقپال ەتەدى»، - دەدى ۆيتسە-پرەمەر.

سونىمەن قاتار ول الاتاۋ قالاسىنىڭ ينفراقۇرىلىمنىڭ سالالىق سحەماسىن جانە جوبالىق- سمەتالىق قۇجاتتامانى ازىرلەۋ جۇمىسى جۇرگىزىلىپ جاتقانىن ايتتى.

«الاتاۋ قالاسىندا وبەكتىلەر سالۋ ءۇشىن الەۋەتتى ينۆەستورلاردى تارتۋ ماقساتىندا «زاكىرلىك» نىسانداردىڭ تىزبەسى ايقىندالاتىن بولادى. قازىرگى ۋاقىتتا IT، كولىك- لوگيستيكالىق كەشەن، تۋريزم جانە باسقا دا سالالارداعى حالىقارالىق كومپانيالارمەن كەلىسسوزدەر باستالدى. ينۆەستورلاردىڭ ۇسىنىستارى مۇددەلى مەملەكەتتىك ورگاندارمەن پىسىقتالۋدا. تىزبە ايقىندالعاننان كەيىن جوبالار ينفراقۇرىلىم سالۋعا، پرەفەرەنتسيالار بەرۋگە جانە باسقالارىنا باعىتتالعان مەملەكەتتىك قولداۋدىڭ قاجەتتى شارالارىمەن قامتاماسىز ەتىلەتىن بولادى»، - دەدى ول.

اۆتور

مارلان جيەمباي