پرەمەر-مينيستر الەۋمەتتىك ماڭىزى بار تاۋارلار باعاسىن تەجەۋدى تاپسىردى
استانا. KAZINFORM - الەۋمەتتىك ماڭىزى بار تاۋارلار باعاسىنىڭ ءوسۋىن تەجەۋ ۇكىمەتتىڭ باسىم مىندەتى بولىپ قالا بەرەدى. بۇل تۋرالى پرەمەر-مينيستر ولجاس بەكتەنوۆ ايتتى.
«سوندىقتان وڭىرلەر وسى جۇمىسقا باسا نازار اۋدارۋعا ءتيىس. ول ءۇشىن قاجەتتى قۇرالداردىڭ ءبارى بار. ناتيجەسىن كورىپ وتىرمىز - بيىل قىركۇيەك ايىندا ينفلياتسيا %8,3 عا دەيىن باياۋلادى. ينفلياتسيا دەڭگەيىن باقىلاۋ مەن تومەندەتۋ جونىندەگى ءىس-شارالار جوسپارىن ورىنداۋ بويىنشا بارلىق قاجەتتى شارالاردى قابىلداۋ قاجەت. اكىمدىكتەر ازىق- تۇلىك تاۋارلارى باعاسىن تۇراقتاندىرۋ بويىنشا بەلسەندى جۇمىستى جالعاستىرۋعا ءتيىس»، - دەدى و. بەكتەنوۆ بۇگىنگى ۇكىمەت وتىرىسىندا.
ۇكىمەت باسشىسى وتاندىق تاۋار وندىرۋشىلەردى قولداۋ تۇراقتى نەگىزدە جۇزەگە اسىرىلىپ جاتقانىن جەتكىزدى.
«نەگىزگى قورلاردى جاڭارتۋعا، نومەنكلاتۋرانى ۇلعايتۋعا جانە ءونىمنىڭ قوسىلعان قۇنىن ارتتىرۋعا باعىتتالعان كاسىپكەرلىك باستامالاردى قولداۋ شارالارىن كۇشەيتۋ قاجەت. ءبىرىنشى كەزەكتە ءوسۋ الەۋەتى جوعارى شاعىن جانە ورتا كاسىپورىنداردى قولجەتىمدى قاراجاتپەن قامتۋ ماسەلەسىنە كوڭىل ءبولۋ كەرەك. وڭىرلەر جەرگىلىكتى قامتۋ جونىندەگى كوميسسيالاردىڭ جۇمىسىن كۇشەيتۋى قاجەت. ونەركاسىپ، قارجى، ۇلتتىق ەكونوميكا مينيسترلىكتەرى «اتامەكەن» پالاتاسىمەن بىرلەسىپ، وتاندىق تاۋارلاردى قولدانۋدىڭ ءتيىمدى مونيتورينگىن قامتاماسىز ەتسىن»، - دەدى پرەمەر.
سونىمەن بىرگە، بيۋدجەتتىك باعدارلاما اكىمشىلەرى قارجىلىق ءتارتىپتى كۇشەيتۋلەرى كەرەك.
«ياعني، قاراجاتتى ۋاقىتىلى يگەرۋگە باسا نازار اۋدارعان ءجون. بيۋدجەتتىك پارامەترلەردى قاتاڭ ساقتاي وتىرىپ، قاراجاتتى ءتيىمدى ءبولۋدى قامتاماسىز ەتۋ قاجەت. قورىتا ايتقاندا، مەملەكەتتىك جانە جەرگىلىكتى اتقارۋشى ورگاندار وسى جىلدىڭ سوڭىنا دەيىن بارلىق رەسۋرستاردى ەكونوميكانىڭ ساپالى وسۋىنە جۇمىلدىرۋى كەرەك. قازىرگى جاعدايدا بۇل وڭاي شارۋا ەمەس. سوندىقتان وسى باعىتتاعى كۇش- جىگەردى ەسەلەي ءتۇسۋ قاجەت»، - دەدى ولجاس بەكتەنوۆ.
بۇعان دەيىن ولجاس بەكتەنوۆ ءۇشىنشى توقساننىڭ قورىتىندىسى بويىنشا ەل ەكونوميكاسىنىڭ ءوسۋ ديناميكاسى وڭ ناتيجە كورسەتكەنىن ايتقان ەدى.
سونداي-اق، 9 ايدا بيۋدجەتكە 14,9 تريلليون تەڭگە كىرىس كىرگەن.