ەرمەك مارجىقپايەۆ پەن گەننادي گولوۆكين ۇلتتىق قۇرامانىڭ وليمپياداعا دايىندىعىن تالقىلادى

استانا. KAZINFORM - استانادا ق ر تۋريزم جانە سپورت ءمينيسترى ەرمەك مارجىقپايەۆ پەن قازاقستان ۇ و ك پرەزيدەنتى گەننادي گولوۆكين فرانسيا استاناسى پاريج قالاسىندا وتەتىن وليمپيادا ويىندارىنا قاتىساتىن قۇرامانىڭ دايىندىعىن تالقىلادى.

ق ر ۇلتتىق وليمپيادالىق كوميتەتتىڭ باسپا ءسوز قىزمەتى اتاپ وتكەندەي، كەزدەسۋدىڭ باستى تاقىرىبى - جازعى ويىندارعا دايىندىقتىڭ سوڭعى كەزەڭى، سونداي-اق، ۇ و ك پەن مينيسترلىك قىزمەتكەرلەرىنىڭ ءتورتجىلدىقتىڭ باستى دوداسىنا دايىندىق دەڭگەيى بولدى.

بۇعان دەيىن ەكى ۇيىم باسشىلارى اراسىندا سپورتتىق دەلەگاتسيانى جاساقتاۋ بارىسىندا باپكەرلەر مەن كەشەندى عىلىمي توپ مۇشەلەرىنە (دارىگەرلەر، ماسساجشىلار) باسىمدىق بەرىلەتىنى جايلى كەلىسىم جاسالعان. وسىلايشا، پاريجدەگى وليمپيادا ويىندارىنا قانشا اتلەت اتتانسا، سونشا باپكەر مەن مەديتسينالىق قىزمەت ماماندارى جول تارتادى.

ەكەۋارا اڭگىمە بارىسىندا تۋريزم جانە سپورت ءمينيسترى مەن قازاقستان ۇوك باسشىسى وتاندىق سپورتتى دامىتىپ، ۇلتتىق قۇراما حالىقارالىق دەڭگەيدە، ونىڭ ىشىندە، جاڭا وليمپيادالىق تسيكلدە جاقسى ناتيجە كورسەتۋ ءۇشىن كۇش بىرىكتىرۋدىڭ ماڭىزدى ەكەنىن تاعى دا اتاپ ءوتتى.

جۇمىستىڭ ناقتى جوسپارى پاريجدەگى وليمپيادا ويىندارى اياقتالعان سوڭ تالقىلانباق.

سونداي-اق، گەننادي گولوۆكين قازاقستان ۇ و ك كومانداسىنىڭ استانادا وتەتىن اۋقىمدى ءىس-شارا كەزىندە حالىقارالىق ىنتىماقتاستىققا جاردەمدەسىپ، دۇنيەجۇزىلىك كوشپەندىلەر ويىندارىن ۇيىمداستىرۋعا كومەكتەسۋگە دايىن ەكەنىن مالىمدەدى.

ەستەرىڭىزگە سالا كەتەيىك، فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىندا وتەدى. ويىندارعا الەمنىڭ 205 ەلىنەن 10500 سپورتشى قاتىسادى دەپ جوسپارلانعان. وندا 32 سپورت تۇرىنەن 329 مەدال جيىنتىعى ساراپقا سالىنادى.

اۆتور
كۇنسۇلتان وتارباي