ەرمەك مارجىقپايەۆ: ۇلتتىق وليمپيادا كوميتەتى پاريجدەگى جاعدايدان ساباق الىپ، ساپالى جۇمىس جۇرگىزۋى قاجەت
استانا. KAZINFORM - پاريج وليمپياداسىنىڭ قورىتىندىسىنا ارنالعان القا وتىرىسى ءوتتى. بۇل تۋرالى تۋريزم جانە سپورت مينيسترلىگىنىڭ باسپا ءسوز قىزمەتى حابارلادى.
«وزدەرىڭىز بىلەسىزدەر، كەشە عانا مەملەكەت باسشىسى قاسىم-جومارت كەمەل ۇلى وليمپيادا جۇلدەگەرلەرىمەن كەزدەستى. سپورتشىلار مەن باپكەرلەردى مەملەكەتتىك ناگرادالارمەن ماراپاتتادى. سپورتقا جۇيەلى قولداۋ كورسەتىپ، جان-جاقتى دامىعان، سالاۋاتتى ۇلت قالىپتاستىرۋ ماڭىزدى ەكەنىن اتاپ ءوتتى. جەكەلەگەن سپورت تۇرلەرى بويىنشا ناتيجەنى جاقسارتۋ كەرەك. ءبىز ءۇشىن ءداستۇرلى سانالاتىن سپورت تۇرلەرى بار. سولاردان دايىندىق تومەن، ناتيجە ناشار بولىپ شىقتى. بىلتىر حاڭجوۋدا ازيا ويىندارى ءوتتى. ازياداعا قاتىسقان سپورتشىلاردىڭ 80 پايىزى بيىل پاريجگە باردى. ال حاڭجوۋدان ۇلتتىق قۇرامانىڭ قانداي ناتيجەمەن كەلگەنى بارىمىزگە بەلگىلى. تاريحتاعى ەڭ ناشار ازيادا بولدى. سوعان قاراماستان از ۋاقىت قالسا دا، جاعداي جاسادىق. ءبىراق پاريجدەگى ناتيجەنى وزدەرىڭىز ءبىلىپ وتىرسىزدار»، - دەدى مينيستر.
ەرمەك مارجىقپايەۆ مىندەتتەمەلەرگە سايكەس ەركىن كۇرەس كومانداسى قولا مەدال الۋعا ۋادە بەرگەنىن اتاپ ءوتتى. الايدا سپورتشىلار شيرەك فينالعا وتە الماي، ءبىرىنشى اينالىمنان شىعىپ قالدى. ءتىپتى مەدال جەڭىپ الۋ جاعىنان ەڭ ءساتسىز دەگەن توكيو وليمپياداسىندا قولا مەدال بولعان ەدى.
«تاريحتا العاش رەت ايەلدەر كۇرەسىنەن سپورتشىلار ويىندارعا قاتىسقان جوق. بۇرىن بىزدە ءداستۇرلى تۇردە جاقسى پوزيتسيالار بولعان»، - دەدى مينيستر.
ەرمەك مارجىقپايەۆ وڭىرلەردىڭ جاعدايىنا توقتالدى.
«ۇلتتىق قۇراماعا 17 ءوڭىردىڭ سپورتشىلارى كىردى. الماتى (17)، استانا (14) جانە شىمكەنت (12) وكىلدەرى كوپ جولداماعا يە بولدى. ال قوستاناي، ۇلىتاۋ جانە ماڭعىستاۋ وبلىستارىنىڭ سپورتشىلارى بىردە-ءبىر ليتسەنزيا العان جوق. جۇلدەگەر سپورتشىلار كەلەسى وبلىستاردان شىقتى: جامبىل وبلىسى (التىن - سمەتوۆ ە.)، الماتى قالاسى (كۇمىس - ن. قۇربانوۆ، 3 قولا: ع. قىرعىزبايەۆ، ن. قىزايباي، ي. ساتپايەۆ جانە ا. لە)، استانا قالاسى (كۇمىس - ن. ورالباي)، الماتى وبلىسى (كۇمىس - د. جادىرايەۆ)»، - دەپ اتاپ ءوتتى مينيستر.
ەرمەك مارجىقپايەۆ جەرگىلىكتى اتقارۋشى ورگاندار وليمپيادالىق سپورت تۇرلەرىنە باسىمدىق بەرىپ، سالانى دامىتۋ ساياساتىن قايتا قاراۋى قاجەت ەكەنىن ايتتى.
«قازىردەن باستاپ مۇددەلى تاراپتارمەن بىرگە اقپاراتتىق-ءتۇسىندىرۋ جۇمىستارىن جۇرگىزۋ كەرەك. 6 ايدان كەيىن حاربيندە 9-قىسقى ازيا ويىندارى وتەدى. ميلان مەن كورتينا- دامپەتستسو قالالارىندا وتەتىن 25-قىسقى وليمپيادا ويىندارىنا دا از ۋاقىت قالدى. ۇلتتىق قۇرامانىڭ دايىندىعىن كۇشەيتۋ قاجەت»، - دەدى مينيستر.
مينيستر پاريج وليمپياداسىنىڭ قورىتىندىسىنا ارنالعان القا وتىرىسىنداعى بايانداماسىن اياقتاي كەلە جوعارىدا اتاعان شارالار الداعى ۋاقىتتا جەمىسىن بەرەتىنىنە سەنىم ءبىلدىردى.
«سپورتتى باسقارۋعا، سپورتشىلاردىڭ دايىندىعىنا جاقسى اسەر ەتەدى دەپ ويلايمىن. ءبىز جاڭا وليمپيادالىق سيكلدى قازىردەن باستادىق. الدا لوس-اندجەلەس وليمپياداسى كۇتىپ تۇر. ماڭىزدى دوداعا قازىردەن دايىندالۋ كەرەك. مينيسترلىك، فەدەراتسيالار، باپكەرلەر، اكىمدىكتەر، ۇلتتىق وليمپيادا كوميتەتى پاريجدەگى جاعدايدان ساباق شىعارىپ، ساپالى جۇمىس جۇرگىزۋى قاجەت. بۇل -بارىمىزگە ورتاق مىندەت»، - دەپ قورىتىندىلادى القا وتىرىسىن.