گەرمانيادا جولاۋشىلار پويىزى رەلستەن شىعىپ كەتتى: قازا تاپقاندار بار
بەرلين. KAZINFORM - بادەن-ۆيۋرتەمبەرگ فەدەرالدى جەرىندەگى ريدلينگەن قالاسى ماڭىندا ايماقتىق جولاۋشىلار پويىزى ساعات 18:10 شاماسىندا رەلستەن شىعىپ كەتتى، دەپ حابارلايدى DW.
Bild دەرەگىنشە، اپات كەزىندە پويىز ۆاگونىندا شامامەن 100 ادام بولعان. شتۋتگارت پوليتسياسىنىڭ مالىمەتىنشە، جاراقات العاندار كوپ، ولاردىڭ ناقتى سانى ءالى بەلگىسىز.
قۇتقارۋشىلار «زارداپ شەككەندەردىڭ كوپ ەكەنىن» حابارلادى.
سوڭعى مالىمەتتەرگە سايكەس، بادەن-ۆيۋرتەمبەرگ فەدەرالدى جەرىندە بولعان تەمىرجول اپاتىندا ءۇش ادام قازا تاۋىپ، 34 ادام ءتۇرلى جاراقات الدى، دەپ حابارلايدى BILD باسىلىمى.
- Deutsche Bahn كومپانياسىنا تيەسىلى ايماقتىق ەكسپرەسس پويىزدىڭ ەكى ۆاگونى رەلستەن شىعىپ كەتتى.
پويىز زيگمارينگەن قالاسىنان ۋلم باعىتىنا قاراي بەت العان. اپات كەزىندە پويىزدا 100 جولاۋشى بولعان. پويىزدىڭ ءبىر بولىگى اۋدارىلىپ جاتىر، ءبىر ۆاگوننىڭ توبەسى اشىلىپ كەتكەن. رەلستەن تولىق شىعىپ كەتكەن ۆاگوندار اعاشتاردىڭ اراسىنا قۇلاعان. وقيعا ورنىندا پوليتسيا، ءورت سوندىرۋشىلەر مەن قۇتقارۋشىلار جۇمىس ىستەپ جاتىر.
الدىن الا بولجام بويىنشا اپاتتىڭ سەبەبى كۇشتى نايزاعاي بولۋى مۇمكىن.
پوليتسيانىڭ مالىمەتىنشە، اپاتقا ۇشىراعان - ۋلم باعىتىنا بەت العان ايماقتىق پويىز. توتەنشە جاعداي تۋرالى العاشقى حابارلاما ساعات 18:10-دا تۇسكەن.
فەدەرالدى پوليتسيانىڭ باسپا ءسوز حاتشىسى اپاتتىڭ ناقتى سەبەبى ءالى انىقتالىپ جاتقانىن حابارلادى.
اپات بولعان ماڭدا تۇراتىن ايەل BILD باسىلىمىنا بەرگەن سۇحباتىندا وقيعا كەزىندە قاتتى نايزاعاي بولعانىن ايتقان. الايدا بۇل اقپاراتتى پوليتسيا ازىرگە راستامادى.