گەرمانيادا دروندارعا شەكتەۋ كۇشەيىپ، بۇعىنىڭ تولدەرىن قۇتقارۋ قيىندادى

استانا. KAZINFORM - گەرمانيادا درون ۇشۋعا قويىلعان شەكتەۋلەردىڭ كۇشەيۋى بۇعىنىڭ جاڭا تۋعان تولدەرىن قۇتقارۋ جۇمىستارىن قيىنداتىپ وتىر، دەپ حابارلايدى DW.

ءشوپ شابۋ ماۋسىمى كەزىندە بۇعىنىڭ تولدەرى بيىك ءشوپتىڭ اراسىندا ءجيى جاسىرىنىپ جاتادى. ءومىرىنىڭ العاشقى اپتالارىندا ولاردىڭ قورعانۋ قابىلەتى تولىق قالىپتاسپايتىندىقتان، قاۋىپ تونگەندە قاشپاي، كەرىسىنشە تىعىلىپ قالادى. سونىڭ سالدارىنان ولار ءشوپ شاباتىن تەحنيكانىڭ استىندا قالىپ قويۋى مۇمكىن.

مۇنداي جاعدايلاردىڭ الدىن الۋ ءۇشىن فەرمەرلەر جىلۋ كامەراسىمەن جابدىقتالعان درونداردى پايدالانىپ كەلگەن. ولاردىڭ ايتۋىنشا، بۇل - قازىرگى تاڭدا ەڭ ءتيىمدى تاسىلدەردىڭ ءبىرى.

الايدا سوڭعى ۋاقىتتا، اسىرەسە اۋەجايلار ماڭىندا درون ۇشىرۋعا رۇقسات بەرۋ ازايعان. بۇل ءوز كەزەگىندە تولدەردىڭ ومىرىنە تونەتىن قاۋىپتىڭ ارتۋىنا اكەلىپ وتىر.

سونىمەن قاتار گەرمانيا زاڭناماسىنا سايكەس فەرمەرلەر جانۋارلاردىڭ قىرىلۋىنا جول بەرمەۋ ءۇشىن ءتيىستى شارالار قابىلداۋعا مىندەتتى. ايتپەسە، ولارعا قاتاڭ جازا قولدانىلۋى مۇمكىن.

ميۋنحەن اۋەجايىنا جاقىن ماڭدا ورنالاسقان القاپتاردىڭ يەسى فەرمەر ميحاەل پەلمايەر بالاما تاسىلدەردى قولدانۋعا نيەتتى. ول، مىسالى، اكۋستيكالىق ۇركىتكىش قۇرىلعىلاردى پايدالانۋدى جوسپارلاپ وتىر. دەگەنمەن ول جانۋارلار ءولىمى ارتۋى مۇمكىن ەكەنىنە الاڭداۋلى.

ايتا كەتەيىك، 2025 -جىلى گەرمانيا اۋە كەڭىستىگىندە دروندار مەن ۇشاقتاردىڭ قاۋىپتى جاقىنداسۋ جاعدايلارى جيىلەگەن. بىلتىر قاڭتار- قاراشا ارالىعىندا مۇنداي 208 وقيعا تىركەلگەن.

بۇعان دەيىن قاراقالپاقستاندا رەزەرۆات قىزمەتكەرلەرى قىزىل كىتاپقا ەنگەن 3 بۇحار بۇعىسىن اۋلاعانى حابارلاندى.