گەرمانيادا ءولى تابىلعان ايگۇل سايلىبايەۆانىڭ دەنەسىنەن پىشاق ىزدەرى تابىلدى

استانا. KAZINFORM - گەرمانيادا ءولى تابىلعان ەكس- سۋديا ايگۇل سايلىبايەۆانىڭ قولىنان، موينىنان جانە بەتىنەن پىشاق جاراقاتى تابىلدى، دەپ حابارلايدى Kazinform اگەنتتىگى BILD- كە سىلتەمە جاساپ.

40 جاستاعى ايگۇل سايلىبايەۆا شەففيلدتە (انگليا) وقىپ، كەيىن استانادا سۋديا بولىپ جۇمىس ىستەگەن. سوڭعى جىلدارى ول گەرمانيانىڭ باتىسىنداعى بەنسحايم قالاسىندا كۇيەۋىمەن، قىزىمەن جانە قايىن ەنەسىمەن بىرگە تۇرعان. 4-ماۋسىم كۇنى تاڭەرتەڭ ا. سايلىبايەۆا ەكى جاسار قىزى جاكليندى بالاباقشاعا اپاردى. سودان بەرى ونى ەشكىم كورمەگەن. جەكسەنبى كۇنى ونىڭ دەنەسى قالا شەتىندەگى پلاستيك قاپشىقتان تابىلدى.

BILD Telegram ارناسىنىڭ حابارلاۋىنشا، مارقۇمنىڭ قولىندا، موينىندا جانە بەتىندە پىشاق جاراقاتتارى بولعان.

«ءبىز توبەلەس بولعان دەپ پايىمدايمىز، ايەلگە شابۋىل جاسالعان جانە ول ءوزىن قورعاۋعا تىرىسقان»، - دەدى تەرگەۋشى.

پروكۋراتۋرا BILD ساۋالىنا بەرگەن جاۋابىندا بۇل ءىس بويىنشا بىردە-ءبىر كۇدىكتى جوق ەكەنىن ايتقان. ا. سايلىبايەۆامەن ءبىر مەزگىلدە رەسەيدەن كەلگەن 49 جاستاعى قايىن ەنەسى ناتاليا دونسوۆا جوعالىپ كەتتى. 4 -ماۋسىمدا ول نەمەرەسىن بالاباقشادان ۇيىنە الىپ كەلگەن. سودان بەرى ونى ەشكىم كورمەگەن. قازىر جاكلين اكەسىمەن بىرگە تۇرىپ جاتىر. قازاقستاننان گەرمانياعا مارقۇمنىڭ 35 جاستاعى ءىنىسى قانات سايلىبايەۆ كەلدى. ول اپكەسىن قازاقستاندا جەرلەگىسى كەلەتىنىن ايتتى.

«ءبىز وتە تىعىز قارىم- قاتىناستا بولدىق، ۋايىمدادىق. ايگۇل ادەتتە حابارلامالارعا بەس مينۋتتا جاۋاپ بەرەتىن. اتا-انامىز ايگۇلمەن كۇن سايىن حابارلاسىپ تۇردى، سوڭعى رەت 3 -ماۋسىمدا تەلەفونمەن سويلەستى. 5 -ماۋسىمدا ءبىز پوليتسياعا حابارلادىق. ايگۇل وتە اشىق جانە جاناشىر ادام بولدى. ول بارىنەن دە قىزىن جاقسى كوردى جانە سۇيىكتى انا بولدى. ايگۇلدىڭ ولىمىنە كىنالى ادام ءادىل جازا الارىنا جانە ادىلدىك ورنايتىنىنا سەنەمىن، - دەيدى قانات سايلىبايەۆ.

ەسكە سالا كەتسەك، گەرمانيادا ەكس-سۋديا ايگۇل سايلىبايەۆانىڭ زورلىق بەلگىلەرى بار ءمايىتى تابىلعانىن جازعان بولاتىنبىز.

اۆتور

ايجان سەرىكجان قىزى