گەرمانياعا كوشىپ بارعان نەمىس وتباسى جەرلەستەرىن ناۋرىز مەيرامىمەن قۇتتىقتادى

كوكشەتاۋ. KAZINFORM - اقمولا وبلىسىنان گەرمانياعا كوشىپ بارعان نەمىس وتباسى الەۋمەتتىك جەلى ارقىلى جەرلەستەرىن ناۋرىز مەيرامىمەن قۇتتىقتادى.

بۇل تۋرالى زەرەندى اۋدانى اكىمدىگىنىڭ الەۋمەتتىك جەلىدەگى پاراقشاسىندا بەينەجازبا جاريالاندى. وندا «قىزىلسايا ەلىنىڭ تۋمالارى بوكي پاۆەل جانە يرما حانىم گەرمانيا مەملەكەتىنەن جالىندى سالەم جولدادى!»، دەپ جازىلعان.

«مەن بوكي پاۆەل يۆانوۆيچتىڭ بالاسىمىن. زەرەندى اۋدانىنىڭ قىزىلساي اۋىلىندا تۋدىم. 1996-جىلى گەرمانياعا كوشىپ كەتتىك. سىزدەردى ناۋرىز مەرەكەسىمەن قۇتتىقتايمىز. سىزدەر اندا، ءبىز مىندا امان بولايىق! اسپانىمىز اشىق بولسىن!»، دەپ ايتادى بەينەجازباداعى قۇتتىقتاۋ سوزىندە گەرمانيالىقتار.

28 جىل بۇرىن گەرمانياعا كوشىپ كەتسە دە، قازاق ءتىلىن ۇمىتپاعان نەمىس ۇلتىنىڭ وكىلىنە ەل ءسۇيسىندى.

«جارايسىڭدار جەرلەستەر»، «راقمەت جاندارىم. تۋعان جەرگە دەگەن ساعىنىش ءارقاشان ءتىلدىڭ ۇشىندا تۇرماق قوي. عۇمىرلى، ءۇبىرلى-ءشۇبىرلى بولىڭدار، باۋىرلار. راقمەت سىزدەرگە. گەرمانيادا تۇرىپ قازاقشا سويلەگەندەرىنە راقمەت، اينالايىندار»، دەپ پىكىر قالدىردى جەلى قولدانۋشىلار.

ايتا كەتسەك، بۇدان بۇرىن امال مەرەكەسى كۇنى قىزىلجارلىق ونەرپازدار اقمولالىق ارىپتەستەرىمەن كورىسكەنىن جازعان ەدىك.

اۆتور

اسلان وسپانوۆ