گەرمانيا مەن نيدەرلاند ءوز ازاماتتارىن ليۆاننان كەتۋگە شاقىردى

استانا. KAZINFORM - ءبىر كۇن بۇرىن كانادا يزرايل مەن ليۆانداعى «حەزبوللا» توبى اراسىنداعى شيەلەنىستىڭ كۇشەيۋىنە بايلانىستى ەسكەرتۋ جاساعاننان كەيىن گەرمانيا مەن نيدەرلاند ءوز ازاماتتارىن ليۆاننان كەتۋگە شاقىردى، دەپ حابارلايدى The Times of Israel.

گەرمانيانىڭ سىرتقى ىستەر مينيسترلىگى ءوز ۆەب-سايتىنداعى جاڭارتىلعان ەسكەرتۋىندە سوڭعى اپتالاردا يزرايل- ليۆان شەكاراسىنداعى قاقتىعىستار كۇشەيگەندىكتەن «ايماقتاعى قاۋىپسىزدىك جاعدايى وتە تۇراقسىز» ەكەنىن مالىمدەدى.

«جاعدايدىڭ ودان ءارى شيەلەنىسۋى مەن قاقتىعىستىڭ كەڭەيۋىن جوققا شىعارۋعا بولمايدى. بۇل اسىرەسە ليۆاننىڭ وڭتۇستىك بولىكتەرىنە، سونىڭ ىشىندە بەيرۋتتىڭ وڭتۇستىك قالالىق اۋداندارىنا، سونداي- اق بەكاا القابىنا، سونىڭ ىشىندە باالبەك- گەرمەل ايماعىنا قاتىستى»، - دەلىنگەن ساياحاتشىلارعا ارنالعان ەسكەرتۋدە.

«ودان ءارى شيەلەنىسۋ رافيك حاريري اۋەجايىنان اۋە قوزعالىسىنىڭ تولىق توقتاتىلۋىنا اكەلۋى مۇمكىن. ودان كەيىن ليۆاننان اۋە ارقىلى كەتۋ مۇمكىن بولمايدى»، - دەلىنگەن حابارلامادا.

جاڭارتىلعان ساياحات تۋرالى ەسكەرتۋ گەرمانيانىڭ سىرتقى ىستەر ءمينيسترى اننالەنا بەربوكتىڭ ايماققا ساپارى كەزىندە جاسالدى. گەرمانيا سياقتى نيدەرلاند تا ازاماتتاردى ليۆاننان كەتۋگە شاقىرادى.

«سىرتقى ىستەر مينيسترلىگى ليۆانعا بارماۋ تۋرالى ۇندەۋىن قايتالايدى. ءسىز ءالى سونداسىز با؟ كوممەرتسيالىق رەيستەر بولعان كەزدە ەلدەن كەتىڭىز»، - دەپ جازدى مينيسترلىك X الەۋمەتتىك جەلىسىندە.

نيدەرلاند سىرتقى ىستەر مينيسترلىگىنىڭ ۆەب- سايتىنداعى مالىمەتكە سايكەس، قازىرگى ۋاقىتتا ليۆاننىڭ بارلىعى قىزىل تۇسكە جاتقىزىلعان، ياعني وعان «كىرۋگە بولمايدى».

نيدەرلاند سىرتقى ىستەر مينيسترلىگى ليۆاندا جۇرگەن ازاماتتاردى «قاۋىپسىز بولعان جاعدايدا ەلدەن كەتۋگە» شاقىرادى.

بەس مەملەكەت ليۆاننان كەتۋگە شاقىرادى

بۇگىنگە دەيىن بەس مەملەكەت يزرايلمەن سوعىسۋ قاۋپىنە بايلانىستى ازاماتتارىن ليۆاننان كەتۋگە شاقىردى، دەپ حابارلايدى Anadolu.

گەرمانيا، نيدەرلاند، كانادا، سولتۇستىك ماكەدونيا جانە كۋۆەيت ءوز ازاماتتارىنان ليۆاننان كەتۋىن سۇرادى.

سولتۇستىك ماكەدونيا دا جەكسەنبى كۇنى ءوز ازاماتتارىنان قاۋىپسىزدىك جاعدايىنىڭ ناشارلاۋىنا بايلانىستى ليۆاننان تەزىرەك كەتۋ كەرەگىن ايتتى. بۇعان دەيىن كانادا ۇكىمەتى ليۆان- يزرايل شەكاراسىنداعى شيەلەنىستىڭ كۇشەيۋىنە بايلانىستى ليۆانداعى ءوز ازاماتتارىن ەلدەن كەتۋگە شاقىرعان.

«كانادالىقتاردىڭ ەلدەگى جانە شەتەلدەگى قاۋىپسىزدىگى مەن قورعالۋى - كانادانىڭ باستى باسىمدىعى»، - دەدى سەيسەنبىدە ەلدىڭ سىرتقى ىستەر ءمينيسترى مەلاني دجولي.

كۋۆەيت جۇما كۇنى ءوز ازاماتتارىن ليۆانعا بارماۋعا جانە ەل ىشىندەگىلەردى «ايماقتاعى قاۋىپسىزدىك جاعدايىنا بايلانىستى» مۇمكىندىگىنشە تەزىرەك كەتۋگە شاقىردى.

ۇلى بريتانيا مەن ا ق ش ساياحاتتاۋدان باس تارتۋدى ۇسىنادى

سارسەنبىدە ۇلىب ريتانيا ءوز ازاماتتارىنا ليۆانعا بارۋدان باس تارتۋعا كەڭەس بەردى.

«FCDO يزرايل مەن وككۋپاتسيالانعان پالەستينا اۋماقتارى اراسىنداعى قاقتىعىس تۋدىراتىن قاۋىپتەرگە بايلانىستى ليۆانعا كەز كەلگەن ماقساتتا بارۋدان باس تارتۋعا كەڭەس بەرەدى»، - دەلىنگەن ۇلى بريتانيانىڭ سىرتقى ىستەر، دوستاستىق ىستەرى جانە دامۋ مينيسترلىگىنىڭ مالىمدەمەسىندە.

5-ماۋسىمدا ا ق ش- تىڭ بەيرۋتتاعى ەلشىلىگى ليۆانداعى امەريكالىق ازاماتتارعا يزرايل جانە سيريامەن شەكارالاس ايماقتارعا بارماۋعا كەڭەس بەردى. ليۆاننىڭ «حەزبوللا» توبى مەن يزرايل كۇشتەرى اراسىنداعى شەكارالىق شابۋىل سالدارىنان ليۆاننىڭ يزرايلمەن شەكاراسىندا شيەلەنىس كۇشەيدى.