گەرمانيا ءوز اسكەرىنىڭ سانىن 60 مىڭ ادامعا دەيىن ارتتىرادى
استانا. KAZINFORM - ناتو- نىڭ قارۋلانۋ مەن جەكە قۇرامعا قويىلعان جاڭا ماقساتتارىنا سايكەس، گەرمانياعا قوسىمشا 60 مىڭعا جۋىق اسكەري قىزمەتشى قاجەت بولادى، دەپ جازادى ازەرتادج.
بۇل تۋرالى گەرمانيانىڭ قورعانىس ءمينيسترى بوريس پيستوريۋس مالىمدەدى. ونىڭ ايتۋىنشا، بۇل شەشىم اليانستىڭ كۇشتەرىن ۇلعايتۋ اياسىندا قابىلدانىپ وتىر.
- ءبىز ەۋروپاداعى ەڭ ءىرى ەكونوميكا رەتىندە جاۋاپكەرشىلىكتى ءوز موينىمىزعا الامىز، - دەدى مينيستر بريۋسسەلدە ناتو ارىپتەستەرىمەن كەزدەسۋ الدىندا جۋرناليستەرگە.
ناتو قورعانىس جوسپارلارىن جاساعاندا، ءبىرقاتار ولقىلىقتى انىقتاعان: سوعىسقا قابىلەتتى ءىرى قۇرلىق كۇشتەرىنىڭ جەتىسپەۋى، الىس قاشىقتىققا ارنالعان قارۋدىڭ، وق-ءدارى قورى مەن سەنىمدى بايلانىس قۇرالدارىنىڭ تاپشىلىعى بايقالعان، دەپ حابارلايدى Reuters اگەنتتىگى.
- ءبىز اۋە شابۋىلىنان قورعانىس جۇيەلەرىنە، الىس قاشىقتىقتاعى زىمىراندارعا، مانيەۆرلىك قۇرلىق كۇشتەرىنە، باسقارۋ جانە باقىلاۋ جۇيەلەرىنە ينۆەستيتسيا سالۋىمىز كەرەك. مۇنىڭ ءبارى ۇلكەن قارجى سالىمدارىن تالاپ ەتەدى، - دەدى پيستوريۋس.
ءمينيستردىڭ ايتۋىنشا، جالپى گەرمانيا قارۋلى كۇشتەرىنە (بۋندەسۆەرگە) بارلىق اسكەري سالالار بويىنشا قوسىمشا 50- 60 مىڭ اسكەري قىزمەتكەر قاجەت بولادى. بۇل اسكەردىڭ جالپى سانى 250- 260 مىڭ ادامعا جەتەتىنىن بىلدىرەدى.
ناتو گەرمانيادان قوسىمشا جەتى ارميالىق بريگادا، ياعني شامامەن 40 مىڭ سارباز ءبولۋىن سۇراعان. الايدا ونداعان مىڭ ادامدى اسكەرگە تارتۋ بەرلين ءۇشىن ۇلكەن سىن بولماق جانە 2011 -جىلى جويىلعان مىندەتتى اسكەري قىزمەتتى قايتا ەنگىزۋ تۋرالى پىكىرتالاستاردى كۇشەيتۋى مۇمكىن.
گەرمانيا قورعانىس مينيسترلىگىنىڭ مالىمەتىنشە، بۋندەسۆەر ءالى 2018 -جىلى بەلگىلەنگەن 203 مىڭ ادامدىق مەجەگە جەتە الماعان. قازىرگى ۋاقىتتا 20 مىڭعا جۋىق تۇراقتى اسكەري ورىن بوس تۇر.
پيستوريۋستىڭ ايتۋىنشا، ۇكىمەت الداعى ۋاقىتتا ەرىكتى اسكەري قىزمەت جۇيەسى جەتكىلىكتى بولا ما دەگەن ماسەلەنى شەشۋى كەرەك. دەگەنمەن، ول قازىرگى تاڭدا اسكەري جاتاقحانالار مەن ينسترۋكتورلار جەتىسپەيتىنىن، سوندىقتان كوپ مولشەردە سارباز قابىلداۋ قيىن ەكەنىن اتاپ ءوتتى.
جاقىندا گەرمانيا قورعانىس شىعىندارىن ارتتىرۋ ماقساتىندا «قارىز تەجەگىشىن» جەڭىلدەتىپ، ناتو باس حاتشىسى مارك ريۋتتەنىڭ اليانستىڭ ماقساتتى شىعىندارىن جىلدىق ىشكى ءونىمنىڭ 5 پايىزىنا دەيىن جەتكىزۋ جوسپارىن قولدادى.